قارلۇق شىركىتى بىلەن بىلقۇت شىركىتى ھەمكارلىشىپ «مەشھۇر شەخىسلەر» ناملىق كىتابلار توپلىمىنىڭ ئايفون نۇسخىسىنى ئىشلىدى. بۇ ئەپ ئارقىلىق ئۇيغۇرلار تارىخىدا ئۆچمەس ئىزلارنى قالدۇرغان كىشلەرنىڭ ھاياتى بىلەن قىسقىچە تونۇشۇپ چىقالايسىز ياكى ئوماق پەرزەنتلىرىڭىزگە ھېكايە قىلىپ بېرەلەيسىز.

قىسقىچە تەسىرات:

10 مىنۇتلۇق ۋاراقلاپ كۆرۈپ بېقىشىمغا ئاساسلانغاندا، مەزكۇر ئەپ بىزنى يەنە بىر كۆچمە ماتېرىيال مەنبەسى بىلەن تەمىن ئېتىدىغان شارائىت ھازىرلاپتۇ دەپ قارىدىم. ئەلۋەتتە، ئەپنىڭ ئىشلەتكۈچى تەسىراتى ھەققىدە ھېس قىلغان ۋە چوقۇم تۈزىتىش كېرەك دەپ قارىغان بىر قانچە مەسىلىنى بايقىدىم. ئاۋال ھېس قىلغىنىم، ئەپ يانتۇ ئېكران ھالىتىدە كۆرۈنىدىغان بولۇپ، دەسلىۋىدە ئۈچ دانە شەخىسنىڭ سۈرىتى بېسىلغان كىتاب مۇقاۋىسى جاھازىدا كۆرۈنىدۇ. بۇ ھالەتتە كاللامغا تۇنجى قېتىم كەلگەن خىيال، باشقا كىتابلارنى كۆرۈپ بېقىش ئۈچۈن ئېكراننى گورزېنتال يۆنىلىشتە سىيرىش كېرەكتەك بىلىندى، بىراق نەچچە سكونت ھەپىلىشىش ئارقىلىق ئەسلىدە، ئاستىدىن ئۈستىگە سىيرىپ كۆرىدىغانلىقىمىزنى ھېس قىلدىم. بەلكىم مەندەك ھېس قىلغانلار يەنە بولۇشى مۇمكىن.

يەنە بىر مەسىلە شۇكى، قايتىش كۇنۇپكىسىنىڭ ئورۇنلاشتۇرىلىشى مۇۋاپىق ئەمەس. بىر شەخىسنىڭ ماتېرىيالىنى ئېچىپ بىر قانچە ۋاراق كۆرگەندىن كېيىن(مۇشۇ قانداق كۆرۈش ئۇسۇلىنىمۇ ئېكراننى نەچچىنى سىيلاپ تاپتىم – -)، قايتىش كۇنۇپكىسىنى تاپالماي تۇرۇپ قالدىم. ئادەتتە مۇتلەق كۆپ قىسىم ئەپلەردە، پۈتۈن ئېكراندا مەزمۇن كۆرۈۋاتقان چاغدا، ئېكراننى بىر چەكسەك ئۈستىدە بىر ستون پەيدا بولۇپ قايتىش كۇنۇپكىسى كۆرۈنەتتى. مەن ئەپنى بىراق تاقىۋېتىپ قايتا ئېچىپ باشقا بىر قانچە كىتابنى ئېچىپ، ئەسلىدە قايتىش كۇنۇپكىسىنىڭ كۆرۈمسىز ۋە سەت بىر تال ئاق سىترىلكا شەكلىدە سول بۇرجەككە ئورۇنلاشتۇرۇپ قويۇلغانلىقىنى بايقىدىم، دەسلىۋىدە تاپالماسلىقىدىمكى سەۋەپ، ئەسلىدە تەگلىكمۇ ئاق رەڭدە بولغانلىقىنىڭ سەۋەبىدىن ئىكەن. بۇ خىلدىكى قايتىش ئۇسۇلى ئوكيان خەۋەرلىرى ناملىق ئەپتىمۇ قوللىنىلغان، ئوكيان خەۋەرلىرىدىكى قايتىش كۇنۇپكىسىنى تېپىش گەرچە تەس بولمىسىمۇ، بىراق ھېلىقى ئاق سترېلكا ئۈستى ئوڭ تەرەپكە ئورۇنلاشتۇرۇپ قويۇلغان، بۇ دائىم سول تەرەپ ئۈستىدىكى قايتىش كۇنۇپكىسىنى بېسىپ ئادەتلەنگەن iOS ئىشلەتكۈچىلىرى ئۈچۈن ئاز بولمىغان قولايسىزلىقلارنى ئېلىپ كېلىدىكەن.

ئەلۋەتتە، ئەپنىڭ كۆرۈنمە يۈزى ۋە مەزمۇن دائىرىسى جەھەتتىن ئېيتقاندا، ئىنتايىن مول ۋە كۆركەم چىققان دېيىشكە بولىدۇ. شەخىسلەر ھەققىدىكى مەزمۇنلار ئۇيغۇرچە ۋە خەنچە ئىككى خىل مەزمۇندا تەييارلانغان بولۇپ، خەنزۇۋان بىر قىسىم پەرزەنتلەرنى مەشھۇر شەخىسلىرىمىز ھەققىدە چۈشەنچىگە ئىگە قىلىشتىمۇ ئالاھىدە ئەھمىيەتكە ئىگە. ئاخىرىدا قارلۇق شىركىتى ۋە بىلقۇت شىركىتىنىڭ ئۆزىدىكى ئەۋزەللىكلەردىن پايدىلىنىپ ھەمكارلىق سۈپىتىدە بىزگە سۇنغان بۇ ئەپنى ھەقسىز ئىشلىتىش پۇرسىتىگە ئېرىشكىنىمگە كۆپ رەھمەت ئېيتىمەن ۋە بۇ ھەمكارلىقنىڭ تېخىمۇ كۆپ مېۋىلەرنى بېرىشىگە تىلەكداشمەن.