تىرىك كۆيدۈرىۋېتىلگەن ئەر     

 مەنبە : « شىنجاڭ قانۇنچىلىق گېزىتى »     
ئونسۇ ناھىيىسى قىزىل يېزىسىدا ئولتۇرۇشلۇق پەيزۇللا بىلەن زۇلپىيە توي قىلىپ ئۇزاق ئۆتمەي ئائىلىسىدە جىدەل قۇرىمىدى . بىر كۈنى قوشنا دۇكاندىكى يىگىت زۇلپىيەنىڭ ساتىراشخانىسىغا كىرىپ چاچلىرىنى تاراپ ئۆزىنى تۈزەشتۈردى . دەل بۇ چاغدا پەيزۇللا ساتىراشخانىغا كىرىپ كەلدى . --- مۇلازىمىتىڭ ياخشىكەن -- ھە؟ ئەرلەر ئۈچۈنمۇ مۇلازىمەت قىلىدىغان بولدۇم دىگىن ، -- دىدى پەيزۇللا خوتۇنىغا تەنە قىلىپ . يىگىت ئاھۋالنىڭ ئۇنداق ئەمەسلىكىنى چۈشەندۈرۈپ چىقىپ كەتتى ، ئەمما پەيزۇللا زۇلپىيەنى ئىككى تەستەك سالدى . شۇنىڭدىن باشلاپ زۇلپىيە ئېرىدىن دائىم تاياق يىدى . بىر قېتىم ئۇ ئاتا - ئانىسىنىڭ ئۆيىگە بېرىپ ئاھۋالنى ئېيتىپ ئاجرىشىپ كېتىش نىيىتىگە كەلگەنلىكىنى ئېيتقاندا ، دادىسى قوشۇلمىدى . ئائىلىدە ئايىقى ئۈزۈلمەيۋاتقان جىدەل زۇلپىيەنىڭ كۆڭلىنى سوۋۇتتى . بولۇپمۇ پەيزۇللانىڭ ساتىراشخانىغا كېلىپ زۇلپىيەنى خېرىدارلارنىڭ ئالدىدىلا ھاقارەتلىشى ئۇنى تېخىمۇ ئازاپلىدى . تۇرمۇشتىكى بۇ خىل كۆڭۈلسىزلىك ، جىدەل سەۋەبىدىن ئۇلار ئاخىر ئاجرىشىپ كەتتى ، ئەمما ئۇزاق ئۆتمەي پەيزۇللا ئۆزىنىڭ خاتا قىلغانلىقىنى ، بۇنىڭدىن كېيىن ئۇنى ئۇرمايدىغانلىقىنى ئېيتىپ يارىشىۋالماقچى بولدى . زۇلپىيەمۇ ئىلگىرىكى ئىشلارنى ئۇنتۇپ ئۇنىڭ بىلەن يارىشىۋېلىش نىيىتىگە كەلدى . 19 - نويابىر پەيزۇللا ھاراق ئىچكەندىن كېيىن زۇلپىيەنى ئىزدەپ كەلدى ۋە كەچتە ئوينىتىپ كېلىدىغانلىقىنى ئېيتتى . كەچتە زۇلپىيە ئىنىسى ئاسىمنى بىللە ئېلىۋالدى . زۇلپىيە پەيزۇللانىڭ ھاراق ئىچسىلا ئۆزىنى تۇتالمايدىغانلىقىنى ئويلاپ ئۇيقۇ دورىسى ئېلىۋالغانىدى . ئۈچەيلەن ئاقسۇ دارىلمۇئەللىمىن مەكتىپى يېنىدىكى بىر ئارامگاھقا كىرىپ ئولتۇردى . زۇلپىيە پەيزۇللانىڭ قىزىپ قالغانلىقىنى كۆرۈپ ئالدىن تەييارلىۋالغان ئۇيقۇ دورىسىنى ئۇنىڭ چېيىغا سېلىۋەتتى . ئۇلار ئارامگاھتىن چىققاندا پەيزۇللا بىرنەچچە قەدەم ماڭا - ماڭمايلا يىقىلدى . ئاسىم تاكسى توسۇشقا كەتكەندە ، زۇلپىيە پەيزۇللانى يۆلەپ : --- ئۆيگە كېتەيلى ، ئورنىڭىزدىن تۇرۇڭ ، -- دىۋىدى . پەيزۇللا : --- ئۆزۈڭ كەت ، مەن كەتمەيمەن ، بۇنىڭدىن كېيىن بىزنىڭ ھىچقانداق ئالاقىمىز يوق ، -- دىدى . تېخى بايىلا كۆڭۈلگە ياقىدىغان گەپلەرنى قىلغان پەيزۇللانىڭ قوپال تېگىشى زۇلپىيەنىڭ ئوغىسىنى قايناتتى . ئۇ ئاسىمنى چاقىرىپ : --- بۇ ئەبلەخنى ئۆلتىرىۋېتەيلى، -- دىدى . --- نىمە ؟ ئۇنداق قىلساق بولمايدۇ ، -- دىدى ئاسىم قورققان ھالدا . --- ئۇ ھېلى ئۇنداق ، ھېلى بۇنداق دەپ مېنى بەك ئەخمەق قىلىۋاتىدۇ ، ئۇنى نىمە قىلىۋەتسەم بولار ؟ -- دىدى زۇلپىيە ئاچچىقىدا . ئاسىم ھىچنىمە دىمىدى . زۇلپىيە پەيزۇللاغا بېنزىن چېچىپ ئوت قويۇپ ئۆلتۈرىۋەتمەكچى بولدى -- دە ، يېقىن ئەتراپتىكى ماي پونكىتىدىن بېنزىن سېتىۋېلىپ كەلدى . پەيزۇللا ئۇخلاپ قالغانىدى . زۇلپىيە ئۇنىڭ يانچۇقلىرىنى ئاقتۇرۇپ بىر يېرىم يۈئەن پۇل ۋە يانفوننى ئېلىۋېلىپ بېنزىننى پەيزۇللاغا چاچتى . --- ئاسىم ، چاقمىقىڭنى بېرە ؟ -- دىدى زۇلپىيە غەزەپ بىلەن ۋە ئىنىسى بەرگەن چاقماقنى ئېلىپ ئۇنىڭغا ئوت ياقتى . . . دېلو مەلۇماتىدىن خەۋەر تاپقان ئاقسۇ شەھەرلىك ج خ ئىدارىسى جىنايى ئىشلار ساقچى چوڭ ئەترىتىدىكى ساقچىلار نەق مەيداننى ئىنچىكىلىك بىلەن كۈزىتىش ، ماي قاچىلاش پونكىتىدىكى خادىملاردىن ، ئارامگاھتىكى مۇلازىمەتچىلەردىن ئەھۋال ئىگىلەش ئارقىلىق قاتىلنى زۇلپىيە بىلەن ئاسىم دەپ جەزىملەشتۈرۈپ سوراق قىلدى . سوراقتا ئۇلار قىلمىشىنى ئىقرار قىلدى ۋە يانفوننى تاپشۇردى . بۇلتۇر 27 - نويابىر ئۇلار قانۇن بويىچە توختىتىلدى . 18 - دېكابىر ئاقسۇ شەھەرلىك تەپتىش مەھكىمىسى زۇلپىيە بىلەن ئاسىمنىڭ قىلمىشىدىن قەستەن قاتىللىق قىلىش جىنايىتى شەكىللىنىدۇ ، دەپ قاراپ قولغا ئېلىشنى تەستىقلىدى . زۇلپىيە پەيزۇللانى ئۆلتۈرىۋېتىش ئارقىلىق ئازاپتىن قۇتۇلماقچى بولغان بولسىمۇ ، تېخىمۇ ئېغىر ئازاپقا قالدى . ئۇ سوراق جەريانىدا ئىنىسىنىمۇ بۇ ئىشقا چېتىۋالغانلىقىدىن پۇشايمان قىلغانلىقىنى ئېيتتى . بەختلىك تۇرمۇشقا ئىنتىلگەن 21 ياشلىق بۇ قىز مانا ئەمدى قاتىلغا ئايلاندى . ئۇ پەيزۇللادىن قۇتۇلۇپ بەختلىك تۇرمۇش كەچۈرمەكچى بولغانىدى ، ئەمما بەخت ئۇنىڭدىن تېخىمۇ يىراقلاشتى . . .

 ( تېمىدىكى كىشى ئىسىملىرى ئۆزگەرتىلگەن )
مەنبە : « شىنجاڭ قانۇنچىلىق گېزىتى »