ئىز تورى-爱智网

2010-يىللىق دۇنيا لوڭقىسى پۇتبول مۇسابىقىسىنىڭ 2-ئايلانما گۇرۇپپا مۇسابىقىلىرى تۈنۈگۈن كەچ كەينى-كەينىدىن باشلاندى . A گۇرۇپپىدىكى بىر مەيدان ھالقىلىق مۇسابىقىدە مېكسىكا كوماندىسى 2-0 نەتىجىدە فرانسىيە كوماندىسىنى مەغلۇب قىلىپ گۇرۇپپىدىن چىقىشتىكى ئەۋزەل شارائىتنى قولغا كەلتۈردى ،  فرانسىيە بولسا ئالدىنقى 2 مەيدان مۇسابىقىدە بىر تەڭلىشىپ بىر ئۇتتۇرۇپ گۇرۇپپىدىن شاللىنىپ كېتىش خەۋپىگە دۇچ كەلمەكتە .

مۇسابىقىنىڭ ئالدىنقى يېرىم مەيدانىدا ھەر ئىككى تەرەپ ئاكتىپ ھۇجۇم قىلغان بولسىمۇ يەنىلا توپ كىرگۈزەلمىدى ، كېيىنكى يېرىم مەيداندا مېكسىكا كوماندىسىنىڭ ياش ماھىرى خېرناندىس قارشى تەرەپنىڭ سەۋەنلىكىدىن پايدىلىنىپ بىر توپ كىرگۈزدى ، ئارقىدىنلا يەنە بىر نۇقتا توپقا ئېرىشىپ نەتىجىنى 2-0 دە مۇقىملاشتۇردى .

مەزكۇر گۇرۇپپىنىڭ 1-ئايلانما مۇسابىقىسىدە تۆت كوماندا ئۆز-ئارا تەڭلىشىپ بىردىن نومۇر ئالغان بولۇپ ، نۆۋەتتە ئۇرۇگۋاي كوماندىسى 2-ئايلانما مۇسابىقىدە ساھىبخان جەنۇبىي ئافرىقىنى 3-0 مەغلۇب قىلىپ مېكسىكا بىلەن تەڭ 4 نومۇر ئېلىپ بولدى . ئەگەر ئاخىرقى ئايلانمىدا بۇ ئىككى كوماندا ئۆز-ئارا تەڭلىشىۋالسىلا فرانسىيە جەنۇبىي ئافرىقىنى قانداق يېڭىشىدىن قەتئىينەزەر بەرھەق شاللىنىپ كېتىدۇ !