ئىران ئامېرىكىنىڭ قورال كۈچى ئېغۋاگەرچىلىكىگە قەتئىي قايتۇرما زەربە بېرىدىغانلىقىنى بىلدۈردى
شىنخۇا تورى ، تېھران 2–ئاۋغۇست تېلېگراممىسى : ئىران ئىسلام ئىنقىلابىي مۇھاپىزەتچى قىسمىنىڭ سىياسىي ئىشلارغا مەسئۇل مۇئاۋىن قوماندانى يادۇلا ھاۋانى 2–ئاۋغۇست ئىران ئىسلام جۇمھۇرىيىتى ئاگېنتلىقىنىڭ زىيارىتىنى قوبۇل قىلغاندا ، ئىران قوراللىق قىسمىنىڭ ئامېرىكا ياكى ئىسرائىلىيە ئارمىيەسىنىڭ ئىرانغا ھۇجۇم قوزغاش پىلانىغا تاقابىل تۇرۇش تەييارلىقى كۆرۈپ قويغانلىقىنى ئېيتقان .
ھاۋانى ، ئامېرىكا ئارمىيەسىنىڭ ئىشتاب باشلىقلىرى بىرلەشمە يىغىنىنىڭ رەئىسى مارۇن 1–ئاۋغۇست ئامېرىكا ئارمىيەسىنىڭ ئىرانغا ھۇجۇم قىلىش پىلانىنىڭ ھەقىقەتەن بارلىقىنى ئېيتقاندىن كېيىن بۇ سۆزنى قىلغان ھەمدە ئامېرىكىنىڭ ئىلگىرىمۇ ئىرانغا بۇنىڭغا ئوخشاش تەھدىتلەرنى سالغانلىقىنى ، بىراق بۇ ئامېرىكىنىڭ يادرو مەسىلىلىرىدىكى ئىرانغا بېسىم ئىشلىتىشى ۋە ئەخمەق قىلىپ ، ھىيلە–نەيرەڭ ئوينىتىشىدىن ئىبارەت ئىكەنلىكىنى بىلدۈرگەن .
ھاۋانى ئاگاھلاندۇرۇپ مۇنداق دېدى ، ئامېرىكىلىقلار سادىر قىلغان ھەر بىر خاتالىق پۈتۈن پېرسىيە قولتۇقىنىڭ خەۋپسىزلىكىگە تەسىر يەتكۈزىدۇ ، ئەگەردە بۇ رايوننىڭ خەۋپسىزلىكى خەتەرلىك ئەھۋالدا قالسا ، ئامېرىكىلىقلارنىڭ مەنپەئىتىمۇ زىيانغا ئۇچرايدۇ شۇنداقلا ئىران تەرەپ قەتئىي قايتۇرما زەربە بېرىدۇ .
ئامېرىكا ۋە ئىسرائىلىيە ئىراننىڭ يادرو مۇئەسسەسەلىرىگە قارىتا تاق يۆنىلىشلىك ھەربىي ھەرىكەت قوللىنىشنى بىردەك چەتكە قېقىپ كەلگەن .1–ئاۋغۇست مارۇن ئامېرىكا مەملىكەتلىك رادىيو شىركىتىنىڭ زىيارىتىنى قوبۇل قىلغاندا ، ئامېرىكىنىڭ ئىرانغا ھۇجۇم قىلىش پىلانى بارلىقىنى ، بىراق ئۇ ھەربىي ۋاسىتىنىڭ ئامېرىكىنىڭ ئەڭ ياخشى تاللىشى دەپ قارىمايدىغانلىقىنى ، دېپلوماتىيە جەھەتتىكى تىرىشچانلىق ھەمدە خەلقئارا ئىقتىسادىي جازا ، نۆۋەتتە ئىران ھۆكۈمىتىنى بەس ــ مۇنازىرىلىك يادرو پىلانىدىن ۋاز كەچتۈرۈشنىڭ ئەڭ ياخشى لايىھەسى ئىكەنلىكىنى بىلدۈرگەن .
ئامېرىكا زۇڭتۇڭى ئوباما ئاق سارايغا كىرگەندىن بۇيان ، ئامېرىكا تەرەپ باشتىن ــ ئاخىر دېپلوماتىك مۇرەسسە قىلىش ۋە ئىقتىسادىي جازادىن ئىبارەت ‹‹ قوش يۆنىلىشلىك ئىستىراتېگىيە ›› ئارقىلىق ئىران ھۆكۈمىتىنى يادرو پىلانىدىن ۋاز كېچىشكە مەجبۇرلىغان .
