بالىلىرىڭلارنى ياخشى كۆرگەنلىكىڭلار ئۈچۈن، قارىغۇ-گاسقا ئايلىنىپ قالماڭلار. كەلگۈسىدە ھەسرەت چەكمەيلى دېسەڭلار، بالىلىرىڭلاردىن كىچىكىدىنلا ھەرقانداق ئۇششاق سۆز-ھەرىكەتلىرىگە سەل قارىماڭلار.
ئىنسان تەبىئىتىگە بالىلىقتا سىڭدۈرگەن پەزىلەتلەر ئەڭ ئىشەنچىلىك بولىدۇ.
گۈزەل تەربىيە ئىنسانغا شان- شەرەپ بېغىشلايدۇ. تەربىيىدىن مەھرۇم قالغان ئىنسان شەرەپ-كامالەتتىن مەھرۇمدۇر.
بالا-چاقا كىچىك چاغدا ئۇلارغا بەك بېخىللىق قىلماسلىق كېرەك. چۈنكى ئۇلار چوڭ بولغاندا پۇرسەتپەرەسلىك قىلىپ، پەسكەش ئېقىمغا قوشۇلۇپ كېتىدۇ. كېيىنچە ئۇ ئىشلەپ مال- دۇنياغا ئىگە بولغاندىمۇ، ئۇنى ئۆز يولىدا ئىشلەتمەيدۇ. ئەقىللىق ئاتا- ئانىلار بالا- چاقىسىنى قاتتىق باشقۇرىدۇ، ئەمما پۇل- ئىقتىسادنى بەك قىسمايدۇ. بۇنداق قىلىشنىڭ بالا ئۈچۈن ئۈنۈمى يۇقىرى بولىدۇ.
ئىنسان تەربىيىسى-تۇغۇلغان ھامان باشلىنىدۇ، بۇۋاق تېخى گەپ قىلالمايدۇ، ئانىسىنىڭ سۆزىگە قۇلاق سالمايدۇ، لېكىن بىلىشكە ئىنتىلىدۇ.