ئوقۇش باشلاش پەسلى: بالىلار يەتتە ياخشى ئادەتنى يېتىلدۈرۈشى، ئاتا-ئانىلار تۆت خىل ئىللەتنى تۈزىتىشى كېرەك

  يەنە ئوقۇش پەسلى يېتىپ كەلدى ، مۆلچەر بويىچە 3-سىنتەبىردىن باشلاپ ، شەھىرىمىزدىكى ئوتتۇرا ، باشلانغۇچ مەكتەپلەر ئارقا-ئارقىدىن ئوقۇش باشلايدۇ . بالىڭىز تەييارلىق قىلىپ بولدىمۇ ، تېخىمۇ مۇھىمى ، سىز تەييارلىق قىلىپ بولدىڭىزمۇ ؟

    تۈنۈگۈن نەنئەن رايونى شەنخۇ تەجرىبە باشلانغۇچ مەكتىپىنىڭ 1-يىللىقىدىكى 500 دىن ئارتۇق يېڭى ئوقۇغۇچىنىڭ ئاتا-ئانىلىرى دەرسخانىغا كىرىپ ، خۇددىي كىچىك ئوقۇغۇچىلارغا ئوخشاش رەتلىك تىزىلىپ ئولتۇرۇپ ، باشلانغۇچ مەكتەپ ئوقۇغۇچىلىرىنىڭ ئاتا-ئانىلىرى سۈپىتىدە مەكتەپكە كىرىش تەربىيەسىنى قوبۇل قىلدى . ‹‹ بالىلارنىڭ ياخشى ئادەت يېتىلدۈرۈشىگە بىر ئاي ھەيدەكچىلىك قىلساڭلار ، بۇندىن كېيىنكى 10 نەچچە يىلدا بالىلارنىڭ ئۆگىنىشىدىن ئاز غەم يەيدىغان بولىسىلەر›› دېدى مەكتەپ مۇدىرى تەن جىڭ .

    تەن مۇدىر بالىلار باغچىسىدىن تارتىپ باشلانغۇچ مەكتەپكىچە بولغان مەزگىل بالىلارنىڭ ھاياتىدىكى بىر مۇھىم بۇرۇلۇش نۇقتىسى بولىدىغانلىقىنى ئېيتتى . ‹‹ بالىلار باغچىسىدىكى تارقاق ئۆگىنىشتىن ئۆگىنىشكە ماسلىشىش باسقۇچىغا كىرىشتە، باشلانغۇچ مەكتەپنىڭ 1-يىللىقىدا قانچىلىك بىلىم ئۆگىنىش ئانچە مۇھىم ئەمەس ، مۇھىمى ياخشى ئادەتنى يېتىلدۈرۈش ›› . تەن مەكتەپ مۇدىرى مۇنداق دەيدۇ : ئوقۇش باشلىغان 1-ئايدا بالىلار خۇددىي بىر پارچە ئاق قەغەزگە ئوخشايدۇ، ناھايىتى نۇرغۇن ئادەتلەر مۇشۇ چاغدا شەكىللىنىشكە باشلايدۇ . شۇڭا ئاتا-ئانىلار بالىلارنىڭ ياخشى ئادىتىنى كىچىك ئىشلاردىن باشلاپ يېتىلدۈرۈشى كېرەك .بىر مەزگىلدىن كېيىن ، بالىلار ئاڭلىق ئادەتنى يېتىلدۈرگەندە ، ئاندىن بوش قويۇۋەتسىمۇ ، ھېچقانداق چاتاق چىقمايدۇ .

    ئادەت بىر-ئىككى كۈندىلا يېتىلمەيدۇ . ئاتا-ئانىلار بالىلارنىڭ ياخشى ئادىتىنى قانداق يېتىلدۈرىشى كېرەك؟

    تۈنۈگۈن مەن شەنخۇ تەجرىبە باشلانغۇچ مەكتىپىنىڭ شەھەر بويىچە مۇنەۋۋەر سىنىپ مۇدىرى شۈ يەن مۇئەللىمنى زىيارەت قىلدىم . شۈ مۇئەللىم 10 نەچچە يىللىق سىنىپ مۇدىرىلىق تەجرىبىسىگە ئىگە بولۇپ ، باشلانغۇچ مەكتەپكە يېڭىدىن كىرگەن ئوقۇغۇچىلارنىڭ يېتىلدۈرۈشكە تېگىشلىك يەتتە ياخشى ئادىتىنى يەكۈنلەپ چىقىپتۇ ، سىلەرمۇ پايدىلىنىپ كۆرۈپ باقساڭلار ئارتۇقلۇق قىلمايدۇ .

    تۆت يامان ئىللەتنىڭ ئۆزىڭىزدە بار-يوقلۇقىغا قاراپ بېقىڭ

    1- خاتالىق : ئېغىزدا نازارەتچىلىك قىلىش

    ئەسلەتمە: يېڭى مەكتەپكە كىرگەن بالىلارنىڭ ئۆزىنى تىزگىنلىشى يېتەرسىز بولىدۇ ، شۇڭا چوڭلار قاتتىق نازارەت قىلىشى كېرەك .

    شۈ مۇئەللىم مۇنداق دەيدۇ : نۇرغۇن ئاتا-ئانىلار بالىسى باشلانغۇچ مەكتەپكە كىرگەندىن كېيىن ، ئۇنىڭ ئۆگىنىشىنى باشقۇرۇشنى بىلىدۇ، لېكىن پەقەت ئېغىزدا سۆزلەش بىلەنلا توختاپ قېلىپ ، ئۇنى ئەمەلىيەتتە ئىشقا ئاشۇرمايدۇ . ‹‹نۇرغۇن ئاتا-ئانىلار بالىلار مەكتەپتىن قايتىپ كەلگەندىن كېيىن پەقەت ئېغىزدىلا تاپشۇرۇقلىرىڭنى ئىشلە ، دەپ ئەسكەرتىدۇ ياكى بالىسى تاپشۇرۇقلىرىنى ئىشلەپ بولغاندىن كېيىن ئۆزەڭ تەكشۈرۈپ باق ، دەيدۇ . بالىنىڭ تاپشۇرۇقنى ئىشلىشىگە، ئىشلەپ بولغاندىن كېيىن تەكشۈرۈشىگە ئەستايىدىل ھەيدەكچىلىك قىلمايدۇ ›› . شۈ مۇئەللىم مۇنداق دەيدۇ . يېڭىدىن مەكتەپكە كىرگەن بالىلارنىڭ ئۆزىنى تىزگىنلىشى يېتەرسىز بولىدۇ ، ئەگەر ئاتا-ئانىلار پەقەت ئېغىزدىلا دەپ قويۇپ ، ئاسانلا ئۆز مەيلىگە قويۇۋەتسە، ئۇلارنىڭ ياخشى ئادىتىنى ئاسان يېتىلدۈرگىلى بولمايدۇ .

    2- خاتالىق : قوش ئۆلچەم

    ئەسلەتمە : بالىلارنىڭ ، بولۇپمۇ مۇنداق كىچىك بالىلارنىڭ ئالدىدا ئېغىزدا بىرخىل ، ئەمەلىيەتتە يەنە بىرخىل بولماسلىق كېرەك .

    بەزى ئاتا-ئانىلار بالىسىنىڭ دەرسكە كېچىكمەسلىكىنى تەلەپ قىلىدۇ ، ئۆزى بولسا داۋاملىق كېچىكىدۇ . ھەپتە ئاخىرىدا ئۆيدىكى چاغدا بالىسىنى كىتاب ئوقۇ ، خەت ياز ، دەيدۇ . ئۆزى شىشىخال قاتارلىقلارنى ئوينايدۇ . شۈ مۇئەللىم مۇنداق دەيدۇ: ئەمدىلا مەكتەپكە كىرگەن بالىلارنىڭ قىممەت قارىشى تېخى شەكىللەنمىگەن بولۇپ ، مۇنداق ئۇسۇل بالىلارنىڭ قەلبىدە ئاسانلا بىر يامان ئۈلگىنى شەكىللەندۈرۈپ ، ئۇلارنى شۇ ئۈلگىدىن ئۆگىنىپ ، ئېغىزدا بىر خىل ، ئەمەلىيەتتە باشقا بىرخىل ئىش قىلىدىغان قىلىپ قويىدۇ .

    3- خاتالىق : ئاتا-ئانىلار ياردەملىشىش

    ئەسلەتمە : بالىلارنىڭ ئىقتىدارى بىراقلا يېتىلمەيدۇ ، يېقىلغاندا ئاندىن ئورنىدىن تۇرۇشنى ئۆگىنەلەيدۇ

    شۈ مۇئەللىم مۇنداق دەيدۇ : ياردەملىشىشمۇ يېڭى ئوقۇغۇچىلارنىڭ ئاتا-ئانىلىرى ئاسان سادىر قىلىدىغان بىر خىل خاتالىق. بەزى ئاتا-ئانىلار بالىسىنىڭ بوغچىسىنى رەتلىگەندىكى ھەرىكىتىنىڭ بىر قەدەر ئاستا بولىۋاتقانلىقىنى كۆرۈپ ، سەۋىر قىلالماي ياردەملىشىدۇ ، ھەتتا ھەر قېتىم ئۇلارغا ياردەملىشىپ رەتلەپ بېرىدۇ . ۋاقىت ئۇزارغانسېرى ، بالىلار يۆلىنىۋالىدىغان بولۇپ قالىدۇ ، ھەتتا بەزىلىرى بالىسىنىڭ ئىشلەپ بولالمىغان تاپشۇرۇقلىرىنى ئىشلەپ بېرىدۇ . بۇنداق قىلىشنىڭ بالىغا ھېچقانداق ياردىمى تەگمەيدۇ ، ئەكىسچە ، بالىنىڭ مۇستەقىل پىكىر قىلىش پۇرسىتىنى يوقىتىدۇ .

    4- خاتالىق: بالىنى قورقۇتۇش

    ئەسلەتمە: بەزىدە ئاتا-ئانىلارنىڭ دىققەتسىزلىكتىن قىلغان بىر ئېغىز سۆزىنىڭ بالىلارغا يەتكۈزىدىغان زىيىنىنى تولدۇرۇش قىيىن .

    شۈ مۇئەللىم مۇنداق دەيدۇ : يېڭى ئوقۇغۇچىلارنىڭ ئاتا-ئانىلىرى دائىم ‹‹پەقەت نەتىجەڭ ياخشى بولسىلا بولدى ، باشقا ئىشلار بىلەن كارىڭ بولمىسۇن ››، ‹‹ باشلانغۇچ مەكتەپكە كىرگەندىن كېيىن بالىلار باغچىسىدىكىگە ئوخشاش ئۇنداق كۆڭۈللۈك ئىشلار يوق ، ئوقۇتقۇچىلار سىلەرنى چىڭ تۇتۇپ تەربىيەلەيدۇ ›› ، ‹‹ بۈگۈنكى ئۈنلۈك ئوقۇش مەشىقىنى قىلما، ئىشقىلىپ مۇئەللىمىڭ بىلمەيدۇ ›› دېگەندەك خاتا گەپلەرنى قىلىدۇ .

    شۈ مۇئەللىم مۇنداق دەيدۇ : مۇنداق سۆزلەر بالىلارنىڭ مەكتەپكە كىرىشىگە قارىتا قورقۇش تۇيغۇسى پەيدا قىلىپلا قالماي، يەنە بالىلارنىڭ ئۆگىنىش ئاكتىپلىقىغا زەربە بېرىپ ، تېگىشلىك بولمىغان بېسىملارنى پەيدا قىلىدۇ.

    1 - ئادەت

    مەسئۇلىيەتچانلىقنى ئۆگىنىشى كېرەك

    شۈي مۇئەللىم مۇنداق دەيدۇ : بىرمۇنچە بالىلارنىڭ سومكىسى ناھايىتى ئېغىر . بۇنىڭ سەۋەبى دەرسلىك كىتابلارنىڭ كۆپلىگىدىن ئەمەس ، بەلكى ئۇلار سومكىسىنى رەتلىك تۇتمايدۇ ، شۇ كۈنى ئىشلەتمەيدىغان دەرسلىك كىتابلىرىنىمۇ سومكىسىغا سېلىۋېلىپ ، مەكتەپكە ئاپىرىپ يەنە ئۆيىگە قايتۇرۇپ كېلىپ ، كۈچىنى بىكار ئىسراپ قىلىدۇ .

    « ئوقۇغۇچىلار ئوقۇش باشلىغاندىن كېيىن يېتىلدۈرىدىغان بىرىنچى ئادەت شۇكى ، سومكىسىنى رەتلىك تۇتۇشنى ئۆگىنىۋېلىشى كېرەك » . شۈي مۇئەللىم مۇنداق دەيدۇ : ئائىلە باشلىقلىرى بالىلىرىنى ھەر كۈنى كەچتە دەرس سېتكىسى بويىچە ئىككىنچى كۈنى ئىشلىتىدىغان دەرسلىكلەرنى ، ئوقۇتۇش قوراللىرىنى تەرتىپلىك ھالدا سومكىسىغا سېلىۋېلىشقا يېتەكلەش كېرەك . ئارتۇق تاپشۇرۇق دەپتەرلىرىنى ئەڭ ياخشىسى بىر ماتېرىيال خالتىسىغا سېلىپ ئاندىن سومكىسىغا سېلىۋالسا بولىدۇ. بۇنداق قىلغاندا تېپىش ئاسان ھەمدە تاپشۇرۇق دەپتەرلىرىنىڭ رەتلىك ھەم پاكىزلىقىنى ساقلىغىلى بولىدۇ.

    مەكتەپ مۇدىرىنىڭ تەكىتلەيدىغىنى : سومكىنى رەتلىك تۇتۇش بالىلارنىڭ ئۆگىنىشكە بولغان مەسئۇلىيەتچانلىقىنى يېتىلدۈرۈپ ، ئۆگىنىشنى ئۆزىنىڭ ئىشى دەپ قاراشقا يېتەكلەيدۇ .

    2-ئادەت

    توپلاشنى ئۆگىنىۋېلىشى كېرەك

    كۆپلىگەن ئائىلە باشلىقلىرى بالىلىرى يۇقىرى يىللىقلارغا چىققاندىن كېيىن ، ئاندىن بالىلىرىنىڭ ماقالا يېزىشنى بىلمەيدىغانلىقىنى ، يازغان خەتلىرىنىڭ رەتلىك ئەمەسلىكىنى بايقايدۇ ، بۇنىڭ سەۋەبى ، ئەمەلىيەتتە بالىلاردا كۈندىلىك توپلاشنىڭ يېتەرسىزلىكىدىن بولىدۇ . شۈي مۇئەللىم مۇنداق دېدى : « توپلاش ئادىتىنى مەكتەپكە كىرگەن بىرىنچى كۈنىدىن باشلاش كېرەك » .

    شۈي مۇئەللىمنىڭ تەكلىپى : ئائىلە باشلىقلىرى بالىلىرىغا مەخسۇس خاتىرە قالدۇرىدىغان بىر كىچىك دەپتەرنى تەييارلاپ بېرىشى كېرەك . « بۇ چاغدىكى بالىلارنىڭ ئوقىيالايدىغان ھەم يازالايدىغان خەتلىرى ئانچە كۆپ ئەمەس . شۇڭا، پەقەت بىر سۆزنى ، بىر تۇراقلىق ئىبارىنى خاتىرىلىۋېلىپ ، ئاندىن بۇ سۆزنىڭ مەنىسىنى ياكى تۇراقلىق ئىبارىنىڭ ھېكايىسىنى ئېغىزچە سۆزلەپ بېرىش تەلەپ قىلىنىدۇ . مۇشۇنداق قىلغاندا ، بالىلارنىڭ تىلى خۇددى ھەسەل ھەرىسى ھەسەل يىغقاندەك ، ئاستا-ئاستا جۇغلىنىپ كۆپىيىدۇ ».

    مەكتەپ مۇدىرىنىڭ تەكىتلەيدىغىنى: ئاز-ئازدىن جۇغلاش كۆپ ھوسۇل بېرىدۇ ، بالىلار چوڭ بولغاندىن كېيىن بۇنىڭ ئاساسىنى چۈشىنىۋالىدۇ .

    3-ئادەت

    ئالاقە باغلاشنى ئۆگىنىۋېلىشى كېرەك

    شۈي مۇئەللىم مۇنداق دەيدۇ : ھەر بىر ئوقۇغۇچىدا بىردىن ئائىلە بىلەن مەكتەپ ئالاقىلىشىدىغان دەپتەر بولۇشى ، ئۇنىڭغا مۇئەللىم ھەر كۈنى ئورۇنلاشتۇرغان تاپشۇرۇقلار يېزىلىشى كېرەك ، بۇ تاپشۇرۇقلارنىڭ يېزىقچە تاپشۇرۇق بولۇشى ناتايىن ، بەزىدە كىتابنىڭ بىر قانچە بېتىنى ئوقۇپ كېلىش ، بەزىدە بىر شېئىرنى يادلاپ كېلىش تاپشۇرۇلىدۇ .

    «بەزى ئائىلە باشلىقلىرى پەقەت بۇ دەپتەردە يېزىلغان مەزمۇنلارغىلا دىققەت قىلىدۇ ، بۇنداق قىلىش توغرا ئەمەس » . شۈي مۇئەللىم مۇنداق دەيدۇ : ئەڭ ياخشىسى بالىلار ئۆيىگە قايتقاندىن كېيىن ، بالىلار دەپتەرنى ئېلىپ ئاتا-ئانىلىرىغا بۇ تاپشۇرۇقلارنىڭ نېمە ئىكەنلىكىنى ، ئوقۇتقۇچىنىڭ قانداق تەلەپ قويغانلىقىنى ، ئۆزىنىڭ ئىشلىيەلەيدىغان- ئىشلىيەلمەيدىغانلىقى قاتارلىقلارنىڭ بىر رەت سۆزلەپ بېرىشى كېرەك . « بالىلار دەسلەپتە پەقەت تاپشۇرۇقنىلا سۆزلەپ بېرىشى مۇمكىن . كېيىنچە ئۇلار ئائىلىسىگە قايتقاندا ئاتا-ئانىسىغا مەكتەپتىكى بىر قىسىم قىزىقارلىق ئىشلارنى ، ئوقۇغۇچىلار ئارىسىدىكى قىزىقارلىق ھېكايىلەرنى سۆزلەپ بېرىشكە ئاستا-ئاستا ئادەتلىنىدۇ ».

    مەكتەپ مۇدىرىنىڭ تەكىتلەيدىغىنى: ئاتا-ئانىلارغا تاپشۇرۇقلارنى سۆزلەپ بېرىش ، يالغۇز ئوقۇغۇچىلارنىڭ تىل بىلەن ئىپادىلەش ئىقتىدارىنى يېتىلدۈرۈپلا قالماستىن ، يەنە ئاتا-ئانىلىرى بىلەن پىكىرلىشىش ئادىتىنى يېتىلدۈرىدۇ .

    4-ئادەت

    ھۈرمەتلەشنى ئۆگىنىۋېلىشى كېرەك

    شۈي مۇئەللىم مۇنداق دەيدۇ : ھازىرقى بالىلارنىڭ كۆپىنچىسى يالغۇز پەرزەنتلەر بولۇپ ، ئاتا-ئانىلار كۆپرەك ئۆز مەيلىگە قويۇپ بېرىپ كۆيۈنگەچكە ، كۆپلىگەن بالىلاردا ئاتا-ئانىلىرىنى ۋە چوڭلارنى ھۈرمەتلەش كەمچىل .

    مەكتەپلەردە ، ئوقۇتقۇچى ئوقۇغۇچىلاردىن مۇئەللىملەرنى كۆرگەندە سالام بېرىشنى ، ساۋاقداشلىرى بىلەن ئۇچراشقاندا ئەھۋال سوراشنى تەلەپ قىلسىمۇ ، ئەمما ئائىلىسىگە قايتقاندىن كېيىن ، كۆپ ساندىكى ئاتا-ئانىلار بالىلىرىغا مۇشۇ قائىدە-يۇسۇن بويىچە تەلەپ قويمايدۇ .

    شۈي مۇئەللىم مۇنداق تەكلىپ بېرىدۇ : ئائىلە باشلىقلىرى ئائىلىدىمۇ مەكتەپنىڭ قائىدە-يۇسۇنلىرىغا ماسلىشىپ، بالىرىدىن ھەر كۈنى ئائىلىسىگە قايتقاندا ئاتا-ئانىسىغا سالام بېرىشنى تەلەپ قىلىشى ، ھەمدە باشقىلارغا ئەدەپلىك مۇئامىلە قىلىش، ئوقۇتقۇچىلارنى ھۈرمەتلەش ياخشى ئادىتىنى يېتىلدۈرىشى كېرەك .

    مەكتەپ مۇدىرىنىڭ تەكىتلەيدىغىنى : باشقا مەدەنىي قائىدە-يۇسۇن ئادەتلىرىنى يېتىلدۈرۈشمۇ ، ئەمەلىيەتتە ئاتا-ئانىلارغا سالام بېرىشتىن باشلىنىشى كېرەك .

    5-ئادەت

    زېھنىنى يىغىشنى ئۆگىنىۋېلىش كېرەك

    شۈي مۇئەللىم مۇنداق دەيدۇ : ھازىر باشلانغۇچ مەكتەپ ئوقۇغۇچىلىرىنىڭ مەكتەپتىن قايتىش ۋاقتى نىسبەتەن بالدۇر بولۇپ، سائەت تۆتتىن ئاشقاندا مەكتەپتىن چىقىپ بولىدۇ . بالىلار ئائىلىسىگە بارغاندا ، دائىم دېگۈدەك ئويۇنغا بېرىلىپ ۋاقىتنى ئۇنتۇپ ، تاپشۇرۇقنى ئىشلەشكە يېتىشەلمەي ، تېگىشلىك مەشىقلەرنى ئورۇندىيالماي بالىلارنىڭ تەرەققى قىلىشىغا تەسىر يېتىدۇ . شۈي مۇئەللىم مۇنداق دەيدۇ : ئائىلە باشلىقلىرى چوقۇم بالىلاردا تاپشۇرۇقنى ئىشلەپ بولغاندىن كېيىن ئويناش ئادىتىنى يېتىلدۈرىشى كېرەك . « بەزى بالىلار تاپشۇرۇق ئىشلەۋېتىپ بىردەم بىر نەرسە يەيدۇ ، بىردەم سۇ ئىچىدۇ ، بىردەم تېلېۋىزور كورىدۇ ، بىردەم نەرسىلىرىنى ئوينايدۇ . ئائىلە باشلىقى چوقۇم ئۇلارنىڭ زېھنىنى يىغىشىغا ھەيدەكچىلىك قىلىشى كېرەك ».

    مەكتەپ مۇدىرىنىڭ تەكىتلەيدىغىنى: زېھنىنى يىغىشنى يېتىشتۈرۈش بىلەن بىر ۋاقىتتا، يەنە بالىلارنىڭ ئىشلارنىڭ ئېغىر-يېنىكلىكى ۋە ئاستا-جىددىلىكىنى ئېنىق ئايرىشىنى يېتىشتۈرۈشى ، ئىشلىگەن ئىشىنىڭ ئۈنۈمىنى ئۆستۈرۈشى كېرەك.

    6-ئادەت

    ھالەتنى تۈزىتىش كېرەك

    ئوقۇش باشلاندى . ئوقۇغۇچىلار توغرا بولغان خەت يېزىش ھالىتى ۋە ياخشى بولغان خەت يېزىش ئادىتىنى يېتىلدۈرۈشى كېرەك. «بەزى بالىلار خەت يېزىشنى ئۆگەنگەندىن كېيىن ، يامان ئادەتكە كۈنۈپ قېلىپ ، پارتىغا يېتىۋېلىپ بېشىنى ساڭگىلىتىپ خەت يازىدۇ . بۇ ئومۇرتقا تۆۋرۈكىنىڭ يېتىلىشىگە تەسىر كۆرسىتىدۇ ھەمدە يېقىننى كۆرۈشنىكەلتۈرۈپ چىقىرىدۇ » . شۈي مۇئەللىم مۇنداق دەيدۇ : بەزى بالىلار بالىلار باغچىسىدا خەت يېزىشنى بالدۇرلا مەشىق قىلغاچقا ، ياخشى بولغان قەلەم تۇتۇش ھالىتىنى يېتىلدۈرمىگەن . يەنە بەزى بالىلار خەت يازغاندا كۈچەپ ، دائىم دېگۈدەك قەلەمنى تۇتقاندا ئۇچىغا يېقىن تۇتىۋالىدۇ . بۇنىڭ بىلەن كۆز دەپتەرگە بەك يېقىن ھالدا تۇرىدۇ ، كۈنلەرنىڭ ئۆتۈشى بىلەن كۆزنىڭ كۆرۈش قۇۋۋىتىگە تەسىر يېتىدۇ .

    شۈي مۇئەللىم مۇنداق دەيدۇ : ئائىلە باشلىقلىرى بالىلىرىنىڭ خەت يېزىش ھالىتىنىڭ دۇرۇس ئەمەسلىكىنى سەزگەندە چوقۇم ئۆز ۋاقتىدا تۈزىتىشى كېرەك .

    مەكتەپ مۇدىرىنىڭ تەكىتلەيدىغىنى : كىتاب ئوقۇش ، خەت يېزىش ھالىتى ئىنتايىن مۇھىم ، شەكىللەنگەن ئادەتنى چوڭ بولغاندىن كېيىن ئۆزگەرتىش تەسكە توختايدۇ . خاتا ھالەت بالىلارغا بىر ئۆمۈر تەسىر كۆرسۈتىدۇ.

    7-ئادەت

    باشقۇرۇشنى ئۆگىنىۋېلىشى كېرەك

    شۈي مۇئەللىم مۇنداق دەيدۇ : يېڭىدىن مەكتەپكە كىرگەن بالىلارنىڭ يېشى كىچىك ، ئۆزىنى باشقۇرۇش ئىقتىدارى نىسپەتەن ناچار بولغاچقا دائىم دېگۈدەك سىنىپ ئىچى سىرتىدا قەغەز پارچىسى ، قەلەم قىرىندىلىرى ، يېمەكلىك ئورىغان قەغەز قاتارلىق ئۇششاق-چۈششەك ئەخلەتلەرنى تاشلايدۇ . بالىلارنىڭ ئۆزىنى باشقۇرۇشنى ئۆگىنىۋېلىش ، كىچىك ۋاقتىدىن باشلاپ پاكىزلىقنى سۆيۈش ئادىتىنى يېتىلدۈرۈشىگە ياردەم بېرىشئۈچۈن ، شۈي مۇئەللىم ئائىلە باشلىقلىرىغا مۇنداق دەيدۇ : بالىلارغا بىر كىچىك خالتا تىكىپ بېرىپ ، ئۇنى « سومكىسى ئىچىگە سېلىپ ئەخلەت خالتىسى قىلىش ، بالىلارنى ئۆگىنىش ، تۇرمۇش جەريانىدىكى ئۇششاق ئەخلەتلەرنى ئۇنىڭغا سالىدىغان قىلىش كېرەك » .

    مەكتەپ مۇدىرىنىڭ تەكىتلەيدىغىنى : شۇنىڭ بىلەن بىر ۋاقىتتا، بالىلاردا كىچىك ۋاقتىدىن باشلاپ ئەخلەتلەرنى قالايمىقان تاشلىمايدىغان ياخشى ئادەتنى يېتىلدۈرۈش كېرەك.

    ئوقۇش باشلاش پەسلى : بالىلار يەتتە ياخشى ئادەتنى يېتىلدۈرۈشى ، ئاتا-ئانىلار تۆت خىل ئىللەتنى تۈزىتىشى كېرەك

    مەكتەپ مۇدىرى : بۇ چاغدا بالىلارغا ھەيدەكچىلىك قىلىش بىر ئاي داۋاملاشتۇرۇلسا ، بۇندىن كېيىنكى 10 نەچچە يىلدا غەم يېيىش ناھايىتى ئاز بولىدۇ ، دەيدۇ .

  تەرجىمە قىلغۇچى: مۇسا ئەخمەت،مەھەممەت بارات

(تەھرىر : بەشتاش)

• ئويلىغانلىرىمىزنى بالىلىرىمىزغا زورلا
• ئاتا مىراس نەسىھەتلەر
• بالىلار بىلەن ئوچۇق يورۇق مۇناسىۋەتتە ب
• ئىللىق ئائىلە شارائىتى ھازىرىلاش
• ئاتا ئانىلار تەربىيە پوزىتىسىيىسى ۋە ئۇ
• قانداق قىلغاندا ياخشى دادا بولغىلى بولى
• دادا سەن يوق
• جۇڭگولۇق ئانىلار بىلەن غەرپ دۆلەتلىرىد
• ئانا مىھرى(چوقۇم كۆرۈڭ)
• ئاتا –ئانا بىر تۈپ سۆيگۈ دەرىخى
• ئائىلە-بۈيۈك قۇرۇلۇش
• ئانا، بالىلارنى بۈركۈتتەك تەربىيەلەڭ
• بالىسى بار ئەرلەر بالىسى يوق ئەرلەرگە ق
• بالىلاردا مۇستەقىل ياشاش ئىقتىدارىنى ي
• ئاتا-ئانىلار بالىلارغا كەسىپ ئېڭىنى سىڭ
• بالا تەربىيەسىدىكى يەنە بىر مۇھىم تەكلى