بوۋاقنى ئانا سۈتى بىلەن بېقىش پۈتۈن دۇنيادا تەشەببۇس قىلىنىدۇ. بوۋاققا ئانىنىڭ سۈتىدىن ياخشىراق ئوزۇقلۇق بار، دېگەننى دوختۇرلار ياكى تەتقىقاتچىلارنىڭ ئاغزىدىن ئاڭلاپ باقمىدىم. پەقەت بىر قىسىم بىلەرمەن ئادەملەر ياكى بالا ئېمىتىشنى خالىمايدىغانلار ئانىلارنىڭ ئۆزىنىڭ تېنىدىمۇ ئەسلىدىن ئوزۇقلۇق كەمچىل بولسىچۇ، سۈت چىقمىسىچۇ، ئاقىلەي-شاقىلەي دەپ گەپ توقۇشىدۇ. مۇتەخەسىسلەرنىڭ قارىشىچە، جاھاندا سۈتى چىقمايدىغان ئانا يوق، پەقەت بالىسىغا سۈت بېرىشنى خالىمايدىغان ياكى ئېمىتىش ھەققىدە ساۋادى كەمچىل بولغان ئانىلار بار. بۇغۇ بىراز كۆپتۈرمە گەپ، راستىنى دېگەندە، سۈت ھورمۇنى كېسەللىكىگە گىرىپتار بولغان نەچچە مىڭدا بىر ئايالنىڭ ھەقىقەتەن سۈتى ئاز بولۇشى مۇمكىن. نورمال ئەھۋالدا، ئېمىتىش ھەققىدە يېتەرلىك ساۋاتقان ئىگە بولغاندا بالىغا يېتەرلىك سۈت بەرگىلى بولىدۇ.

كۆرگەن-بىلگەنلىرىمىزگەقارىغاندا، دۇنيانىڭ ھەرقايسى جايلىرىدا ساپ ئانا سۈتى بىلەن بېقىش تەشەببۇس قىلىنىدىغان ۋاقىت ئوخشىمايدىكەن. ئامېرىكا ۋە كانادادا ئەڭ كەم دېگەندەك تۆت ئاي ۋاقىت ساپ ئانا سۈتى بېرىشنى، بۇ جەرياندا بالىغا ھېچقانداق قوشۇمچە يېمەكلىك بەرمەسلىكنى، ھەتتا سۇمۇ بەرمەسلىكنى تەشەببۇس قىلىدۇ. تۈركىيەدە بۇ ۋاقىت ئالتە ئاي بولسا كېرەك. شىمالىي ياۋروپادا بولسا ئالدىنقى تۆت ئاينىڭ ئىچىدىمۇ ئانچە-مۇنچە باشقا قوشۇمچە يېمەكلىك بېرىشكە رۇخسەت قىلىدىكەن. نېمە ئۈچۈن قوشۇمچە يېمەقلىك بېرىشكە ئالدىرايمىز؟ ئەمەلىيىتىمىز، چوڭلارنىڭ قىرقى ئىچىدە تاماق تەمىنى تېتىمىسا كېيىن تاماق يېمەس بولۇۋالىدۇ، دېگەن گېپىنىڭ ئاساسىي يوقلىقىنى ئىسپاتلاپ بولدى. بالىلارنىڭ كېيىن تاماق يېيىش-يېمەسلىكىنىڭ قىرىقىدا نېمە يېيىشى بىلەن ھېچ ئالاقىسى يوقكەن. مېنىڭچە كۆپىنچە ئانىلارنىڭ تاماق بېرىشكە ئالدىراپ كېتىشىدىكى سەۋەب سۈتىنىڭ ئازلىقىدىن ئەنسىرەش بولۇشى مۇمكىن. مەنمۇ كىچىك بالامدا تۆت ئاي بولاي دېگەندە، كېچىسى بىر قانچە قېتىم ئويغانغىنىنى كۆرۈپ قورسىقىنى تويغۇزالمايۋاتسام كېرەك، دەپ ئەنسىرەپ قوشۇمچە يېمەكلىك بېرىشنى ئويلاشقان. كېيىن ماتېرىيال كۆرۈش ئارقىلىق سۈتۈمنى كۆپەيتسەم بولىدىغانلىقىنى ھېس قىلدىم ۋە يېمەكلىك بېرىشنى كېچىكتۈردۈم. سۈتنى قانداق سەۋەبلەر كېمەيتىۋېتىدىغانلىقىنى بىلىشتىن بۇرۇن، ئانىلار داۋاملىق ئەنسىرەيدىغان بىر قانچە مەسىلە ئۈستىدە توختىلايلى:

1. بەزى ئانىلار بالىلىرىنىڭ تولا ئەمگىنىنى كۆرۈپ ئەنسىرەيدۇ، ۋە بالىسىنىڭ تويمايۋاتقانلىقىدىن گۇمان قىلىدۇ. ئەمەلىيەتتە بوۋاقنىڭ 24 سائەت ئىچىدە 10-12 قېتىم، ھەتتا ئۇنىڭدىنمۇ كۆپ ئېمىشى ئەنسىرىگۈدەك ئىش ئەمەس. ئەسلىدە بالىلار ئانىلارنىڭ ئۆزلىرىنى قۇچاققا ئېلىشى ئۈمىد قىلىدۇ، ۋە ئانىسىنى ئېمىپ تۇرغان ھالەتتىن خاتىرجەملىك تۇيغۇسىغا ئېرىشىدۇ. بالىلار مۇتەخەسىسلىرى تولا ئېمىدىغان بالىلاردىن ئەمەس، ئەمگىنىنىڭ تايىنى يوق، تولا ئۇخلايدىغان بالىلاردىن ئەنسىرەيدۇ. چۈنكى تولا ئۇخلايدىغان بالىلارنىڭ ئوزۇقلۇق قوبۇل قىلىشى توسقۇنلۇققا ئۇچراپلا قالماي، مېڭە تەرەققىياتىمۇ ياخشى بولمايدۇ. بالىلىرى بىردەم-بىردەم ئويغىنىدىغان ئانىلار بالىلىرىنىڭ ئۇيقۇسىنىڭ تايىنى يوقلىقىدىن قاقشايدۇ. ئەگەر بۇنداق ئۇيقۇنىڭ مېڭە تەرەققىياتىغا ئەڭ پايدىلىق ئىكەنلىكىنى ئېيتساق، بەلكىم بىراز خوشال بولۇشىڭىز مۇمكىن. گېپىمىزگە قايتىپ كەلسەك، بالىلار تۇغۇلۇپ 10 كۈندىن ئىككى ھەپتىگىچە بىر قېتىم، 3 ھەپتىلىكتە بىر، 6 ھەپتىلىكتە بىر، 3 ئايلىقتا ۋە ئالتە ئايلىقتا بىر قېتىم تۇيۇقسىز چوڭىيىش دەۋرىيلىكى بولىدۇ. بالىڭىز دەسلەپتە تۇغۇلغاندا بىر تەرەپتىن ئېمىتسىڭىز يەنە بىر تەرىپىڭىزدىن سۈت ئېقىپ كېتىدىغانلىقىغا دىققەت قىلغانسىز، بارغانسېرى بۇنداق ئەھۋالنىڭ يوقىشى سىزنى خاتىرجەمسىز قىلمىسۇن، بۇ بەدىنىڭىزنىڭ بالىڭىزنىڭ ئېمىش مىقدارىغا كۆنگەنلىكىنىڭ بەلگىسى. ئاندىن بالىڭىز تۇيۇقسىز چوڭىيىش باسقۇچىغا كىرگەندە ئىشتىھاسىمۇ چوڭىيىدۇ، ۋە بەدىنىڭىزنىڭ سۈت تەمىنلىشى ئازراق بولغانلىقتىن، بىر ئىككى كۈن نورمالدىكىدىن جىقراق ئېمىشى مۇمكىن. بۇنىڭ بىلەن ئالاھىدە ئەنسىرەپ كېتىشىڭىزنىڭ ھاجىتى يوق. ئۇلىشىپلا، بەدىنىڭىزنىڭ سۈت ئىشلەپچىقىرىشى بالىنىڭ ئېھتىياجىغا لايىقلىشىدۇ ۋە بالىڭىزنىڭ ئېمىدىغان ۋاقتىمۇ نورماللىشىدۇ. بالىلارنىڭ ئۇيقۇسى نورماللاشقانچە ئۇخلاشتىن بۇرۇن بەك جىق ئېمىدۇ، ھەم جاھىللىشىپ كېتىدۇ. بۇنى سۈت چىقماسلىقتىن يىغلىغانمىكىن، دەپ ئويلىماڭ. بۇ نورمال ئەھۋال. ئادەتتە سۈت پاراشوكى بىلەن بېقىلغان بالىلارمۇ يىغلايدۇ، لېكىن ئۇلارنىڭ ئېمىدىغىنى سوسكا بولغاچ ئانىسىدىن ئالىدىغان خاتىرجەملىكنى ئالالمايدۇ، شۇڭا سوسكىدا باققان بالىلار بەكرەك يىغلاڭغۇ كېلىدۇ.

2. بالىلىرىڭىزنىڭ ئېمىش ۋاقتىنىڭ ئۇزۇن-قىسقىلىقى، ھەرقېتىم ئېمىش ۋاقتىنىڭ ئارىلىقى، ئېغىرلىق ئېشىش ئەھۋالى، ئۇيقۇسى دېگەندەكلەرنى باشقىلارنىڭ بالىلىرى بىلەن، ياكى ئۆزىڭىزنىڭ باشقا بالىلىرىڭىز بىلەن سېلىشتۇرۇپ جىددىيلەشمەڭ، ھەربىر بالا بىر دۇنيا، بالا-بالىغا ئوخشىمايدۇ. سۈتىڭىزنىڭ يېتەرلىك ئەمەسلىكىدىن گۇمان قىلماڭ.

3. بالىڭىزنىڭ باشقىلارنىڭ بالىلىرىدەك سېمىز ئەمەسلىكى سىزنى ئەنسىرەتمىسۇن. ئامېرىكىدا 1950-يىللاردا سېمىز بالىلار ساغلام دەپ قارىلاتتى، ۋە ئېغىرلىقى تېز ئاشمىغان بالىلار ساغلام ئەمەس، دەپ قارىلاتتى. كېيىن بوۋاقلىق مەزگىلىدىكى سېمىزلىكنىڭ ھەرگىزمۇ بالىنىڭ ساغلاملىقىنى كۆرسىتىپ بېرەلمەيدىغانلىقىنى، ئەكسىچە بوۋاقلىقىدا سېمىز بالىلاردا چوڭ بولغاندا سېمىزلىك ۋە سېمىزلىك ئەگەشمە كېسەللىكلىرىنىڭ ئاسانلا كۆرۈلىدىغانلىقىنى ئىسپاتلاپ چىققاندىن كېيىن، ھازىر بالىنىڭ ئېغىرلىقىنى كونترول قىلىشنى تەشەببۇس قىلىدىغان بولدى. ئەگەس بالىڭىزنى ئانا سۈتى بىلەن باقسىڭىز بالىڭىزنىڭ ئېغىرلىقى ھەرگىزمۇ ئېشىپ كەتمەيدۇ.:

ئەمدى تۆۋەندە سۈتنى ئازلىتىۋېتىدىغان بەزى سەۋەبلەر ئۈستىدە توختىلىمىز.
1. بوۋاقنىڭ سۈتنى يېتەرلىك ئەممەسلىكى. ئالدىنقى يازمىمىزدا دەپ ئۆتكىنىمىزدەك، ئانىنىڭ كۆكسى ئاجايىپ بىر ئورگان. ھەممىگە قادىر ئاللاھ بۇ ئورگاننى ئاجايىپ بىر شەكىلدە ياراتقانكى، سىز سۈت چىقماسلىقىدىن ئەنسىرىگەن چېغىڭىزدا، بەلكى كۆكسىڭىز ئىككى ياكى ئۈچ بالىنى ئېمىتىشىڭىزگە يېتەرلىك سۈت ئىشلەپچىقىرالىشى مۇمكىن. لېكىن ئەگەر بوۋىقىڭىز يېتەرلىك سۈت ئەممىسە كۆكسىڭىز تەبىئىيلا سۈت ئىشلەپچىقىرىش مىقدارىنى ئازايتىدۇ. ئەگەر بالا بەك ئۇيقۇچان بولسا، ياكى بەك كۆكسىڭىز بەك بوش شورىسا يېتەرلىك سۈت ئېمەلمەي بالىڭىزمۇ ئاچ قالىدۇ ھەم سۈتىڭىزمۇ ئازلاپ كېتىدۇ.
2. بالىدىن خىزمەت قاتارلىق سەۋەبلەر تۈپەيلى ئۇزۇنراق ۋاقىت ئايرىلىپ تۇرۇش (مەسىلەن، ئەتىگىنى كېتىپ كەچتە كېلىش دېگەندەك) ياكى ۋاقىت بەلگىلەپ ئېمىتىش ۋاقتىنى بەك ئۇزۇنغا بېكىتىش. دوختۇرلار بالىنى قەرەللىك ئېمىتىشنى تەۋسىيە قىلىدۇ، بەزى دوختۇرلارنىڭ قارىشىچە بالا ھەر تۆت سائەتتە بىر قېتىم ئەمسە بولىدىكەن. كارل ۋىتتىنىڭ پەرزەنت تەربىيىسى دېگەن كىتابتا دېيىلىشىچىمۇ بالىلارغا ۋاقىت بەلگىلەپ ئېمىتىش كېرەككەن. بەلكىم بۇنىڭ توغرا يېرىمۇ باردۇ، لېكىن ۋاقىت بەلگىلەش ھەممىلا بالىغا ماس كېلىۋەرمەيدۇ. چوڭلارغا ئوخشاشلا بالىلارنىڭ مېتابولىزىم سېستىمىسىمۇ بىر-بىرىگە ئوخشىمايدۇ. بالىنىڭ قورسىقى ئاچقاندا كۆكسىڭىز شۇنىڭغا قارىتا ئىنكاس قايتۇرىدۇ، لېكىن داۋاملىق ۋاقىت توشمىغانلىقىنى باھانە قىلىپ بالىنى ۋاقتىدا ئېمىتمىسىڭىز ئەلۋەتتە سۈتىڭىز ئازلاپ كېتىدۇ. ئەگەر ئەسلىدىنلا سۈتىڭىز ئاز بولسا ئىككى قېتىم ئېمىتىش ئارىلىقىنى ئەڭ ئۇزۇن بولغاندىمۇ ئۈچ سائەتتىن ئاشۇرۇۋەتمەسلىكىڭىز لازىم.
3. بالا تۇغۇلغان دەسلەپكى بىر قانچە ھەپتىدە، ئانىلارنىڭ بالىسىنىڭ ئېمىش ۋاقتىغا چەك قويۇشى سۈت ئازلاپ كېتىشنى كەلتۈرۈپ چىقىرىدۇ. چۈنكى دەسلەپكى بىر قانچە ھەپتىدە كۆكسىڭىزدىن دەسلەپتە ئىنتايىن سۇيۇق، ئوزۇقلۇق مىقدارى ئىنتايىن تۆۋەن بولغان تۆۋەن كالورىيىلىك سۈت چىقىدۇ، بالا بىر قانچە قېتىم شورىغاندىن كېيىن ئاندىن مايلىق قىسمى چىقىشقا باشلايدۇ. شۇڭا دەسلەپكى بىر قانچە ھەپتىدە ئۇزۇن بولغاندا ئىككى سائەتتە بىر قېتىم، ھەر قېتىمدا 20-45 مىنۇت ئەتراپىدا ئېمىتىلسە، كېيىنكى مەزگىللەردىمۇ كۆكسىڭىزدىن يېتەرلىك سۈت چىقىشقا كاپالەتلىك قىلغىلى بولىدۇ، ئىنشائاللاھ. ئۇنىڭدىن باشقا دەسلەپكى مەزگىللەردە ھەرئىككىلا تەرىپىڭىزدىن تەڭ ئېمىتىشكە ئەھمىيەت بېرىشىڭىز لازىم.

4. سىزدىكى ئاغرىق، ئۇيقۇسىزلىق ياكى ناچار كەيپىيات سۈتىڭىزنىڭ ئازلاپ كېتىشىنى كەلتۈرۈپ چىقىرىدۇ. بەلكىم ھەممە ئانىلار بۇنى بېشىدىن كەچۈرۈپ باققان بولۇشى مۇمكىن. ئادەتتە سۈتى ئىنتايىن كۆپ ئانىمۇ شۇنداقلا بىر زۇكام بولۇپ قالسا، ياكى بىرەر ئاخشام ئۇيقۇسىز قالسا سۈتى بىراقلا ئازلاپ قالىدۇ. ئەگەر ئانىنىڭ سالامەتلىكىدە مەسىلە كۆرۈلسە، ياكى تەركىبىدە ھورمون بار دورىلارنى ئىستېمال قىلىۋاتقان بولسا بۇمۇ سۈتكە تەسىر قىلىدۇ.
ئەگەر ئانىلار ئۇزۇن مەزگىل ناچار كەيپىيات ياكى روھىي بېسىم ئاستىدا بولسا سۈتى ئازلاپ كېتىدۇ. ئانا بولۇش بەكمۇ ئەجىرلىك، شەرەپلىك ھەم خوشاللىنارلىق بىر ئىش، ھەم شۇنداقلا ئىنتايىن جاپالىق بىر ئىش. ھەر كۈنى بالىلىرىڭىزنىڭ يىغا سىمفونىيەسىنىلا ئاڭلاپ ئۆتۈش، بالىڭىز تۇغۇلغاندىن كېيىن ئەينەكتىن ئۆزگىرىپ كەتكەن بەدەن شەكلىڭىزنى كۆرۈشىڭىز، چىرايلىق كىيىملىرىڭىزنىڭ ئەمدى پاتماسلىقى، كېچىلىرى تالاي قېتىملاپ بالا ئېمىتكەنلىك سەۋەبىدىن كۆز چۆرىڭىزنىڭ قارىداپ، قورۇق چۈشۈشكە باشلىغانلىقىنى كۆرۈش ھەركىمنى روھىي بېسىمغا سېلىپ قويىدۇ. بۇنداق ھالەت داۋاملاشسا ھورمونلارغا تەسىر قىلىپ سۈتنىڭ بىراقلا ئازلاپ كېتىشىنى كەلتۈرۈپ چىقىرىدۇ.

5. بالىنى قوشۇمچە يېمەكلىك، سۈت پاراشوكى ياكى ئېمىزەككە بەك بالدۇر كۆندۈرىۋېتىشمۇ سۈتنى ئازلىتىۋېتىدۇ. ئانىنىڭ كۆكسىدىكى سۈت بەكرەك شورىسا ئاندىن چىقىدۇ. باشقا يېمەكلىكلەر بولسا ئاغزىنى ئاچسىلا كىرىدۇ. بۇنداق ئەھۋالدا بالا ئەلۋەتتە ئاسىنىغا تۇرىدۇ. ئېسىڭىزدە بولسۇنكى، بۇ بالىنىڭ سالامەتلىكى ئۈچۈن زىيانلىق بولۇپلا قالماي، يەنە پىسخىكىسى ئۈچۈن ئىنتايىن زىيانلىق. ئەگەر بالىڭىزنى تىرىشچان، ئۆزىگە تايىنىدىغان ئادەم بولسۇن دېسىڭىز ئۇزۇنراق ئېمىتكەيسىز.(ئاللاھنىڭ بۇيرۇقلىرىدا گۈزەل ھېكمەتلەر باردۇر)

6. ئەگەر كۆكسىڭىزنىڭ توپچىسى ئاغرىپ قالغان بولسا، سىز بالىڭىزنىڭ ئېمىشىنى خالىمايدىغان بولۇپ قالىسىز، ھەم بالىڭىزنىڭ ئېمىۋاتقاندا ئاغرىق سەۋەبىدىن بەدىنىڭىزنى قاتتىق تۇتۇۋالىسىز. بۇنداق ئەھۋالدا سۈت تۈزۈك چىقالمايدۇ. بۇنداق ئەھۋال داۋاملاشسا كۆكسىڭىزنىڭ سۈت ئىشلەپچىقىرىشىمۇ چېكىنىپ كېتىدۇ. ئېسىڭىزدە بولسۇن، بالىڭىز دەسلەپكى تۇغۇلغان چاغدىكى ئېمىتىشىڭىز كېيىنكى ئەھۋالىڭىزغا زور تەسىر كۆرسىتىدۇ.
ئەگەر كۆكسىڭىزنىڭ توپچىسى ئاغرىپ قالغان بولسا بۇنىڭ نېمە سەۋەبتىن ئىكەنلىكى ھەققىدە ئىزدىنىپ بېقىڭ. مېنىڭ ئوغلۇم تۇغۇلغان كۈنى پۈتۈن بىر كۈن دېگۈدەك ئېمىپ چىقتى، كۆزى يۇمۇق ھالەتتىمۇ ئېمەتتى، كېچىسىمۇ ئاساسەن دېگۈدەك ئېمىپ چىقتى، شۇنىڭ بىلەن بالا تۇغۇلۇپ بىر كۈن بولار-بولمايلا ئىككىلا تەرەپ ئۇچى يېرىلىپ شەلۋەرەشكە باشلىدى، ئاغزىمدا ”ۋاي مەن ئوغۇزخان تۇغدۇممۇ نېمە؟ قانداق بالىسەن، تۇغۇلۇپلا بۇنچە ئېمىپ كېتىدىغان؟ “ دەپ چاقچاق قىلاتتىميۇ، ئاغرىققا چىداپ تۇرالمىدىم. شۇنىڭ بىلەن دوختۇرنىڭ چاقىرىپ ئەھۋالنى دېدىم. دوختۇر ئاڭلاپلا بالىنىڭ ئاغزىنى ئېچىپ قارىۋېدى، ئەسلى بالامنىڭ تىلىنىڭ ئىلمىكى باركەن، شۇنىڭ بىلەن ئىشخانىسىغا ئېلىپ چىقىپ ئىلمىكىنى ئېلىۋېتىپتۇ. شۇنىڭدىن كېيىن ئېمىشىمۇ نورماللاشتى. مەنمۇ دورا قىلىپ يۈرۈپ دەرھال ئوڭشىلىۋالدىم، ئەلھەمدۇلىللاھ. ئەگەر بوۋاقلارنىڭ تىلىنىڭ ئىلمىكى بولسا، قانچە ئۇزۇن ئەمسىمۇ تۈزۈك بىر نەرسىنى شوراپ چىقىرالمايدىكەن، شۇنىڭ بىلەن شوراۋېرىدىكەن. ئەگەر بالىڭىزدا شۇنداق ئەھۋال كۆرۈلسە بالىڭىزنى دوختۇرغا كۆرسىتىپ ئىلمىكىنى ئالدۇرۇۋېتىڭ.
ئادەتتە يېڭى بالىلىق بولغان ئانىلاردا ئومۇميۈرلۈك ھالدا بۇنداق ئاغرىش ئەھۋاللىرى كۆرۈلىدۇ. شۇڭا ئانا بولۇش ئالدىدا تۇرغان ھەمشىرىلەرنىڭ بۇ ھەقتە ئىزدىنىپ قويۇشىنى ئۈمىد قىلىمەن، بىزمۇ يازىمىز ئىنشائاللاھ. ئەلۋەتتە تۆۋەندە“قوي مېيىنى قىزىتىپ باسىمىز، بىردەمدە ئوڭشىلىدۇ“ دېگەندەك يەرلىك ئۇسۇللارنى تەۋسىيە قىلىدىغانلارمۇ چىقىشى مۇمكىن. مەن ھەممىنى سىناپ باققان، ھېچقايسىسى پايدا قىلماي دورا ئىشلىتىشكە مەجبۇر بولغان. بەلكىم پايدا قىلىدىغانلىرىنى مەن ئاڭلىمىغان بولۇشۇم مۇمكىن. شۇڭا كۆپرەك ئىزدىنىپ قويغاننىڭ زىيىنى يوق.

7. ئەگەر كۆكسىڭىزنى بۇرۇن ئوپېراتسىيە قىلدۇرغان بولسىڭىز بۇ سۈتنى ئازلىتىۋېتىشى مۇمكىن. ئېسىڭىزدە بولسۇن، ھەرقانداق ۋاقىتتا سۈت بېزىنى ئوپېراتسىيە قىلدۇرۇشنىڭ سۈتنىڭ چىقماسلىقنى كەلتۈرۈپ چىقىرىش خەۋپى بار.

8. ھامىلىدارلىقنى چەكلەش دورىلىرى ياكى تەركىبىدە ئېستروگېن ۋە پروجېسترون بولغان ھامىلدارلىقنى چەكلەش ئەسۋابلىرىنى ئىشلەتكەندە سۈتكە تەسىر كۆرسىتىش ئېھتېماللىقى يۇقىرى.

ئاخىرىدا سەمىڭىزگە سېلىپ قويىدىغىنىم، بالا تۇغۇلۇپ بىر قانچە كۈنگىچە ئېغىرلىقى تۆۋەنلىشى مۇمكىن. چۈنكى بالا تۇغۇلۇشتىن بۇرۇن بالىنىڭ بەدىنىدە زور مىقداردا يىغىلىپ قالغان سۇ ۋە تەرەت بولىدۇ. بۇ نەرسىلەر چىقىپ كەتكۈچە بولغان ئارىلىقتا ئېغىرلىقى 5-10% ئەتراپىدا يىنىكلەيدۇ. شۇڭا بۇ چاغدا بالىڭىزنىڭ يېتەرلىك ئېمەلمەيۋاتقانلىقىدىن بەك ئەنسىرەپ كەتمىسىڭىزمۇ بولىدۇ.
(داۋامى بار)
مەزكۇر يازما ئەيبالام بلوگىدىن ئېلىندى، يازما ئاپتورى meryem: