كورېيە ۋىزىسىنى ئىلتىماس قىلىشتىكى ئۆلچەم تۆۋەنلىدى

يېقىنقى بىر نەچچە يىلدىن بۇيان كورېيەگە ساياھەتكە بارىدىغان جۇڭگولۇق ساياھەتچىلەرنىڭ سانى ئۈزلۈكسىز كۆپىيىۋاتقان بولۇپ، كورېيەنىڭ جۇڭگودا تۇرۇشلۇق ئورگانلىرىنىڭ كورېيە ۋىزىسىنى بېجىرىش ئۈچۈن كېتىدىغان ۋاقتى بارغانسېرى ئۇزىراپ كەتكەن. بۇنىڭ بىلەن كورېيە قانۇن مىنىستىرلىقى، 4-ئاينىڭ 6-كۈنى جۇڭگولۇق ساياھەتچىلەرگە قارىتىلغان بىر قاتار ۋىزا ئىلتىماسىنى ئاسانلاشتۇرۇش سىياسەتلىرىنى ئوتتۇرىغا قويغان.

كورېيە قانۇن مىنىستىرلىقىدىكى مۇناسىۋەتلىك ئەربابنىڭ ئېيتىشىچە، كورېيە قانۇن مىنىستىرلىقى كېلەر يىلى 1-ئايدىن باشلاپ جۇڭگولۇق كوللېكتىپ ساياھەت قىلغۇچىلارغا نىسبەتەن ئېلېكتىرونلۇق ۋىزا مۇلازىمىتىنى يولغا قويىدىكەن. بۇندىن بۇرۇن پەقەت پىروفېسسور دەرىجىسىدىكى مۇتەخەسسىسلەرلا بۇ خىل ئىمتىيازدىن بەھرىمەن بولالايدىغان بولۇپ، يېڭى سىياسەت يولغا قويۇلغاندىن كېيىن ساياھەت كوپىراتىپلىرىنىڭ كورېيە كونسۇلىغا بېرىشى ھاجەتسىز ئىكەن.

بۇنىڭدىن باشقا، كورېيە قانۇن مىنىستىرلىقى 4-ئاينىڭ 20-كۈنىدىن باشلاپ كۆپ قېتىم بېرىپ-كېلىش ۋىزىسىنىڭ ۋاقتىنى ئەسلىدىكى 1 يىل ۋە 3 يىلدىن 5 يىلغا ئۇزارتىدىكەن، ئەسلىدىكى  17 ياشتىن 60 ياشقىچە بولغان ياش چەكلىمىسىنى ئەمەلدىن قالدۇرىدىكەن. ئىلتىماس قىلغۇچىنىڭ ئوقۇش پۈتتۈرگەن مەكتىپىگە قويۇلىدىغان ئۆلچەم جەھەتتە، ئەسلىدىكى «211 قۇرۇلۇشى» غا تەۋە مەكتەپلەردىن بارلىق 4 يىللىق تولۇق كۇرس ئالىي مەكتەپلىرىگە كېڭەيتىدىكەن.