مىھماندارچىلىق - قارىماققا ئاددىي پائالىيەت بولسىمۇ ، لىكىن ئۇنىڭ كىشىلىك ئىجتىمائىي مۇناسىۋەتتە رولى ئىنتايىن چوڭ . ئۇ كىشىلەر ئارىسىدىكى دوستانە بېرىش- كېلىش ، ئىتتىپاقلىق - ئىناقلىقنى كۈچەيتىدۇ . لىكىن گەپ كەلگەن مىھماننى قانداق كۈتۈۋىلىشتا ، ئەلۋەتتە مېھمان دەسلەپ كەلگەندە ئالاھىدە جىددىي ھېسسىياتتا يەنى تارتىنىش ، قورۇنۇش ھالىتىدە بولىدۇ . ئۆي ئىگىسىنىڭ ھەر بىر سۆز ھەرىكىتىگە نىسبەتەن يۈكسەك دەرىجىدە سەزگۈر بولىدۇ . ئەگەر مېھمان كۈتۈش جەريانىدا سۆز ھەرىكىتىڭىزدە ئازراقلا كەتكۈزۈپ قويسىڭىز ، بۇ خىل مىھماندارچىلىق ئىناقلىقنى ئەمەس ، كۆڭۈل ئاغرىقىنى كەلتۈرۈپ چىقىرىدۇ . شۇڭا مىھمان كۈتۈشتە تۆۋەندىكى بىر قانچە جەھەتلەرگە ئالاھىدە دىققەت قىلىشى كېرەك ؛
1. مىھماننى ئوچۇق چىراي بىلەن قارشى ئىلىش ، ئەھۋال سوراش ، مىھماننىڭ نەرسە -كېرەكلىرى بولسا دەرھال قولىدىن ئېلىش .
2. ئۆيگە كىرگەندىن كېيىن ئولتۇرۇشقا تەكلىپ قىلىش ، چاي قۇيۇش ( ئەگەر ئۇزاق يولدىن كەلگەن مىھمان بولسا ئالدى بىلەن يۈز - كۆزىنى يۇيۇش ئۈچۈن ئىسسىق سۇ بىرىش ، لۆڭگە - سوپۇنلارنى تەق قىلىپ بىرىش ) ئەگەر ئۆيدە كىرىسلو بولسا ئورۇندۇققا تەكلىپ قىلماسلىق ، چاي ئۇزاتقاندا ئىككى قول بىلەن ئۇزىتىش ، چاي قۇيغاندا بەكمۇ لىق قۇيماسلىق كېرەك .
3. كەلگۈچى ئۆزىدىن چوڭ بولسا ئۇدۇلمۇ ئۇدۇل ئولتۇرۇش ، مىھماننىڭ گېپىگە دىققەت بىلەن قۇلاق سېلىش ، مىھمان گەپ قىلىۋاتقاندا ئۇياق بۇياققا قارىماسلىق ، سائەتكە قاراشتىن ، ئۇياق بۇياققا تەلمۈرۈشتىن ، ئەسنەشتىن ، ئۈگدەشتىن ھەزەر ئەيلەش ، ئەگەر ھەقىقەتەنمۇ زۆرۈر ئىش تۈپەيلى ئولتۇرۇشقا ئىمكانىيەت يار بەرمىسە ، ئوچۇق چۈشەندۈرۈپ ئىزاھات بېرىش ، كەچۈرۈم سوراش كېرەك .
4. مىھمان كەلگەندە ئائىلىنىڭ باشقا ئەزالىرىمۇ شۇ مەيداندا بولسا مىھمانغا تونۇشتۇرۇش ، ئۆيدىكى كىشىلەر ئىشىكنى ئاستا يىپىش، ئىش قىلغاندا جابدۇقلارنى تاراقلاتماسلىق ، بالىلارنى ئۇرۇپ تىللىماسلىق ، پاراڭنى ئامال بار تۆۋەن ئاۋازدا قىلىش ، مىھمان ئولتۇرغاندا يەر سۈپۈرمەسلىك ، يەرگە تۈكۈرمەسلىك .
5. يىراقتىن كەلگەن تونۇشلار بولسا ئامال بار تاماققا تۇتۇپ قىلىش ، ئىمكانىيەت يار بەرسە قوندۇرۇپ قىلىش ، .
6. مىھمان ئۈچۈن ئاچىقىلغان نەرسىلەر ( كىتاپ ، ژورنال ، گىزىت ) نى ياكى مىھمان سوۋغا قىلغان نەرسىلەرنى مىھماننىڭ كۆز ئالدىدا يىغىشتۇرماسلىق .
7.مىھمان خوشلاشقاندا ئىشىككىچە ئۇزىتىپ چىقىش ، ئۇزاتقاندا مىھماننىڭ كەينىدە مىڭىش ، كېچە بولسا چىراغ بىلەن يولنى يورۇتۇپ بىرىش ، قىرى، ئاجىز ، مىيىپ كىشىلەر بولسا يول يۈرۈشتە ، پەلەمپەيگە چىقىپ - چۈشۈشتە يۆلىۋىلىش، مىھمان كېتىۋاتقاندا ئارقىدىن بىر نەرسە تۆكمەسلىك .
مىھمان كۈتۈشتە دىققەت قىلىشقا تىگىشلىك ئىشلار بۇنىڭ بىلەنلا تۈگىمەيدۇ ، ئەلۋەتتە . بىر مۇنچە ئىشلار ھەممىلا ئورۇنغا ئورتاق بولسىمۇ ، يەنە بەزى جەھەتلەردە ئالاھىدىكلەرمۇ بولىدۇ . يەنى كىشىلەرنىڭ يەرلىك ئۆرپ - ئادىتى ، تۇرمۇش شەكلى ، ئىقتىسادىي ، مەدەنىيەت سەۋىيىسىنىڭ يۇقىرى - تۆۋەنلىكى، شۇ جاينىڭ تەرەققىيات ئەھۋالىمۇ مىھمان كۈتۈشتە ھەر بىر ئادەم ئۆز جايىنىڭ ئەمەلىيىتىگە يارىشا ئۆز-ئارا ھۆرمەت قىلىش ، ئۆز-ئارا ئىناقلىق ۋە ئەدەب-ئەخلاقنى كۆزدە تۇتقان ھالدا مۇئامىلە قىلساق بولىدۇ .
