يېشىلگەن سىر
ساداقەتجان ھاجى
تاڭ سەھەردە كۆردۈم مەن سېنى،
شېئىر يادلاپ يۈرۈپسەن باغدا.
يېقىن كەلسەم سەزمىدىڭ مېنى،
سەزدۈرمىدىم مەنمۇ شۇ چاغدا.
سەزدۈرمىدىم مەن ساڭا زىنھار،
سەن شېئىرغا بولغانتىڭ ئەسىر.
قەلبىمنىمۇ قىلمىدىم ئىزھار،
چۈنكى شۇ چاغ يېشىلگەنتى سىر.
سۆيگۈم سىڭگەن شېئىرلىرىمنى
باغدا تەنھا يادلاپ يۈرۈپسەن.
ماڭا بولغان چىن ئەقىدەڭنى،
شېئىرىمغا باغلاپ يۈرۈپسەن.
