|
−− سايمەن، شۇنچە ئۇزاق ۋاقىتنى چىداپ ئۆتكۈزدۇق. يەنە ئازراق بەرداشلىق بېرەيلى. بەلكىم تەڭرى بىزنى بۇنداقمۇ ئۆلۈمگە بۇيرۇماس، −− تەسەللى بەردى دوماس ئاستا بېشىنى كۆتۈرۈپ.
−− ياق دوماس... يەنىلا سەن چىشىڭنى چىشلەپ، بەرداشلىق بەر. مەن... راستتىنلا بولالمىدىم. قولۇمنى قويۇۋېتىمەن دوماس، −− سايمەننىڭ ئاۋازىدىن قاتتىق ھەسرەت ھەم ئەلەم چىقىپ تۇراتتى، −− ئەگەر سەن تىرىك قايتىپ كېتەلىسەڭ، مېنىڭ لوسايىمغا شۇنى ئېيتىپ قويۇشنى ئۇنتۇما. مەن ئۆلۈش ئالدىدا تۇرۇپمۇ ئۇنى ياخشى كۆرۈۋاتىمەن...
دوماس ئۇنىڭ گەپلىرىنى ئاڭلىمايۋاتقاندەك پەرۋاسىز ئىدى، سايمەن داۋاملىق سۆزلەۋەردى.
−− يەنە... سەن لوساغا چوقۇم ئوبدان قاراپ قوي، ماڭا ۋەدە بەرگىن دوماس. ئۇنىڭغا ئوبدان قارا. ئەگەر شۇنداق قىلمىساڭ ئۆلسەممۇ كۆزۈم يۇمۇلمايدۇ...
دوماس يەنىلا جاۋاب بەرمىدى. سايمەننىڭ ئاۋازى بارا - بارا پەسلەپ كېتىۋاتاتتى:
−− دوماس، بىلەمسەن؟... لوسانىڭ بويىدا بار. بالام تۇغۇلغاندىن كېيىن چۇقۇم مېنىڭ ئىسمىمنى قويسۇن... دوماس، دوستۇم. مەن قولۇمنى قويۇۋەتتىم، ئەلۋىدا...
−− سايمەن! −− بايىنىڭ ياقى بىر ئېغىزمۇ زۇۋان سۈرمىگەن دوماس توساتتىن ئېغىز ئاچتى، −− سەن ئۆلۈپ كېتىشتىن ئىلگىرى مۇنداق بىر مەخپىيەتلىكنى ئېيتىپ قويغۇم كېلىۋاتىدۇ، ساڭا دېمىسەم بولمايدىغان بىر مەخپىيەتلىك بار.
−− نېمە مەخپىيەتلىك ئۇ؟
−− خوتۇنۇڭنىڭ ئاشنىسى بار...
−− نېمە؟! سەن نېمە دەۋاتىسەن؟ −− سايمەن خۇددى يۈرەك قوزغاتقۇچى ئوكۇلى ئۇرۇلغان بىماردەك بىردىنلا جانلىنىپ كەتتى.
−− سېنىڭ لوسايىڭ ئاللىقاچان بىر ئەر بىلەن تېپىشىۋالغان، سەن ئەخمەق تېخىچە ئۇنىڭدىن پەخىرلىنىپ يۈرۈۋاتىسەن، تېخى خوتۇنۇڭنى شۇ قەدەر دىيانەتلىك ساناۋاتىسەن، بىلەمسەن، ھېلىقى بىلەزۈكنىمۇ ئۇنىڭغا ئاشۇ ئاشنىسى ئېلىپ بەرگەن.
−− دوماس! −− سايمەن ئەمدى غەزەپتىن يېرىلغۇدەك بولدى، −− سەن دېگەن ئىشلارنىڭ ھەممىسى راستما؟
−− ھازىرلا لەھەڭگە يەم بولۇش ئالدىدا تۇرغان بىر ئادەم ساڭا يالغان ئېيتىپ نېمە قىلاي.
−− ئەمىسە ئېيتە، ئۇنىڭ ئاشنىسى كىم؟ زادى كىم؟
لېكىن دوماس بۇ قېتىم پەقەت باش چايقاپ قويۇش بىلەنلا كۇپايىلەندى، شۇنىڭدىن كېيىن قايتا بىر نەرسە دېگىلى ئۇنىمىدى.
|
