ئەنگىلىيە ‹‹ كۈندىلىك پوچتا گېزىتى ›› نىڭ 24- مايدىكى خەۋىرىگە قارىغاندا ، فوتوگراف جىن كىرىستىئان كوتۇ ھىندىستاننىڭ شەرقىي شىمالىدىكى ناگالاندا بىر يۈرۈش جاككۇس ناگالىقلارنىڭ سۈرىتىنى تارتىپ ، غايىپ بولۇش ئالدىدىكى مەدەنىيەتنى خاتىرىلىگەن .

جاككۇس ناگالىقلار جەڭ مەيدانىدىكى جەڭگىۋارلىقى بىلەن كىشىلەرگە تونۇش . ئۇلارنىڭ جەڭ قىلىش مۇساپىسى تاكى 1960-يىلىغىچە داۋام ئەتكەن . ئۇلارنىڭ يۈزىدىكى ئالاھىدە چەكمىلەر ، ھايۋانلارنىڭ تېرىسىدىن تىكىلگەن كىيىم ۋە مۇڭگۈزلەردىن ياسالغان زىبۇ-زىننەتلەر ئۇلارنىڭ جەسۇر ئەزمەتلەردىن ئىكەنلىكىنىڭ سىمۋولىدۇر . ئىگىلىنىشىچە ، كەلگۈسى 10 ~ 15 يىلغىچە ، بۇ ئەزىمەتلەرنىڭ كۆپىنچىسى ۋە ئۇلارنىڭ ئاياللىرى ئۆلۈپ كېتىشى مۇمكىن ئىكەن . بۇ ياشانغان ئەرلەر ۋە ئاياللار قەبىلىلەر ئارىسىدىكى جەڭ بىلەن زېمىن ئۇرۇشىنى بىر تەرەپ قىلغان . ئۇلارنىڭ دۈمبىسى ، بەدىنى ۋە يۈزلىرىدىكى چەكمىلەر شۇ ئۇرۇشلارنىڭ دەلىلىدۇر .