ئافرىقا ئەللىرى ئىتتىپاقى تىنچلىق ۋە بىخەتەرلىك كېڭىشى 17-ئىيۇن كەچتە يىغىن ئېچىپ، مىسىرنىڭ ئافرىقا ئەللىرى ئىتتىپاقىنىڭ ئەزالىق سالاھىيىتىنى ئەسلىگە كەلتۈرۈشنى قارار قىلدى. مىسىر دىپلوماتىيە مىنىستىرلىقى ئارقىدىن بايانات ئېلان قىلىپ بۇنى قارشى ئالدى ھەمدە ھەر قايسى ساھەلەردىكىلەرنىڭ رايون ئىچىدىكى دۆلەتلەر بىلەن بولغان ھەمكارلىقنى كۈچەيتىپ، ئافرىقا ئەللىرى ئىتتىپاقىدا مۇھىم رولىنى داۋاملىق جارى قىلدۇردىغانلىقىنى بىلدۈردى.

ئۆتكەن يىلى ئىيۇلدا مىسىر ئارمىيە دائىرىلىرى مۇرسىنى زۇڭتۇڭلۇق ۋەزىپىسىدىن ئېلىپ تاشلىغاندىن كېيىن، ئافرىقا ئەللىرى ئىتتىپاقى مىسىرنىڭ ئەزالىق سالاھىيىتىنى ۋاقتىنچە توختاتقان ئىدى. تەھلىلچىلەر مىسىرنىڭ بىر يىلغا يېقىن ۋاقىتتىن كېيىن مۇشۇنداق ئوڭۇشلۇق ھالدا ئافرىقا ئەللىرى ئىتتىپاقىغا قايتىپ كېلەلىشىدە بىر قانچە سەۋەب بار دەپ ھېسابلىدى: بىرىنچىدىن، مىسىرنىڭ ئافرىقا ئەللىرى ئىتتىپاقىغا بولغان مۇھىملىقى ئافرىقا ئەللىرى ئىتتىپاقىنىڭ مىسىرغا بولغان مۇھىملىقىدىنمۇ ئۈستۈن ئورۇندا تۇرىدۇ.
مىسىر، لىۋىيە، ئالجىرىيە، جەنۇبىي ئافرىقا ۋە نىگېرىيە ئافرىقا ئەللىرى ئىتتىپاقىدىكى «بەش ماگنات»، ھەر يىلى تاپشۇرىدىغان ئەزالىق بەدەل پۇلى ئافرىقا ئەللىرى ئىتتىپاقى مالىيەسىدە ناھايىتى مۇھىم ئورۇننى ئىگىلەيدۇ. ئافرىقا ئەللىرى ئىتتىپاقى مىسىرنى بۇ ئىتتىپاقدىن چىقىرىۋەتسە ئۆزى تىجەشلىك كۈن ئۆتكۈزۈشى كېرەك.

مىسىرنى ئېلىپ ئېيتساق، گەرچە ئۇ ئافرىقا قىتئەسىدە بولسىمۇ، لېكىن بىر ئەرەب دۆلىتى بولۇش سۈپىتى بىلەن مىسىر بىلەن غەربىي ئاسىيانىڭ مۇناسىۋىتى ئافرىقىدىنمۇ يېقىن، ناسىر، ساداد، مۇبارەك قاتارلىق بىر قانچە نۆۋەتلىك ھۆكۈمەتلەر مىسىرنى ئەرەب دۇنياسىدىكى بىرىنچى چوڭ دۆلەت قىلغان، شۇنداق بولغاچقا، ئافرىقا ئەللىرى ئىتتىپاقى مىسىرنى چىقىرىۋەتكەنلىكىنى جاكارلىغاندا، مىسىر دىپلوماتىيە مىنىستىرلىقى دەرھال قاتتىق پوزىتسىيەدە بولۇپ، ئافرىقا ئەللىرى ئىتتىپاقى ۋە ئۇنىڭ قارمىقىدىكى تەشكىلاتلاردىكى خىزمەتچى خادىملىرىمىزنى قايتۇرۇپ كېلىمىز، ئافرىقا ئەللىرى ئىتتىپاقى بىلەن بولغان بارلىق مۇناسىۋىتىمىزنى تەشەببۇسكارلىق بىلەن ئۈزىمىز، مەبلەغ ياردەم بېرىشنى توختىتىمىز دەپ تەھدىت سالدى. ئەكسىچە ئافرىقا ئەللىرى ئىتتىپاقى بۇنىڭغا يۇمشاق پوزىتسىيەدە بولۇپ، مىسىر دېموكراتىك سايلام ئۆتكۈزۈپ، ئاساسىي قانۇن تەرتىپىنى ئەسلىگە كەلتۈرسىلا ئۇنىڭ ئەزالىق سالاھىيىتىنى ئەسلىگە كەلتۈرۈشنى ئويلىشىمىز ھەمدە ۋەكىللەر ئۆمىكىنى ئارمىيە دائىرىلىرى قوللاۋاتقان مىسىر ۋاقىتلىق ھۆكۈمىتىنىڭ رەھبىرى بىلەن كۆرۈشۈشكە ئەۋەتىمىز دېدى.
ئىككىنچىدىن، ئافرىقا ئەللىرى ئىتتىپاقىنىڭ مىسىرنى چىقىرىۋېتىش قارارى ئامالسىزلىقتىن چىقىرىلغان.
‏
‏
‏ئۇزۇندىن بۇيان، ئافرىقا ئەللىرىنىڭ ھەممىسى دېگۈدەك ھەربىي سىياسىي ئۆزگىرىشنىڭ خىرىسىغا دۇچ كەلدى، كۆپلەپ يۈز بەرگەن ھەربىي سىياسىي ئۆزگىرىش ئافرىقا ئەللىرىنىڭ سىياسىي، ئىقتىسادى، جەمئىيىتى ھەتتا رايون تەرتىپىگە ئېغىر زەربە ئېلىپ كەلدى، بۇ ئافرىقا ئەللىرى ئىتتىپاقىنى ئەزالىرىنىڭ ھەربىي سىياسىي ئۆزگىرىشلىرىگە قارىتا ھەرگىز سەۋر قىلىپ تۇرماسلىق پوزىتسىيىسىنى قوللىنىشقا مەجبۇر قىلدى، شۇڭا ئۇ قۇرۇلغان دەسلەپكى ۋاقىتتا ماقۇللىغان نىزامنامە، بەلگىلىمىلەردە ھەر قانداق بىر ئەزا دۆلەت پەقەت ئاساسىي قانۇن شەكلى ئارقىلىقلا خەلق سايلىغان ھۆكۈمەتنى ئاغدۇرۇۋېتەلەيدۇ، ھەممىسى ئەزا دۆلەتلىك سالاھىيىتىدىن توختىتىلىدۇ دېيىلگەن. مىسىردىن ئىلگىرى ئافرىقا ئەللىرى ئىتتىپاقى مۇشۇ بەلگىلىمىگە ئاساسەن، مالى ۋە ئوتتۇرا ئافرىقا جۇمھۇرىيىتىنىڭ ئەزالىق سالاھىيىتىنى ۋاقتىنچە توختاتقان ئىدى.
ئۈچىنچىدىن، سېسى رەھبەرلىكىدىكى مىسىر يېڭى ھۆكۈمىتى ئافرىقا ئەللىرى ئىتتىپاقىغا قايتىپ كېلىشنى دىپلوماتىيە جەھەتتىكى قاتماللىقنى بۇزۇپ تاشلاشنىڭ مۇھىم قەدەم دەپ قاراپ، بۇ مۇساپىگە پائال تۈرتكە بولىدۇ.
ھازىر ياۋروپا ئەللىرى ئىتتىپاقى، ئامېرىكىنىڭ مىسىرغا بولغان پوزىتسىيىسىدە ئۆزگىرىش بولدى. لېكىن مىسىرنىڭ دېموكراتىك سىياسىي تۈزۈلمىگە ئوڭۇشلۇق ئۆتۈش ياكى ئۆتەلمەسلىكىدىن يەنىلا گۇمانلانماقتا، مىسىرنىڭ قورال ئىمبارگوسىمۇ پۈتۈنلەي بىكار قىلىنمىدى. بۇنىڭدىن سىرت، تۈركىيە، قاتار قاتارلىق دۆلەتلەرنىڭ سېسىنىڭ سىياسىي ئۆزگىرىش قوزغاش مەيدانىنى ئەيىبلىشىدىمۇ كۆرۈنەرلىك ئۆزگىرىشلەر بولمىدى، مىسىرنىڭ دىپلوماتىيە مۇھىتى يەنىلا ناھايىتى كەسكىن بولماقتا. ئافرىقا ئەللىرى ئىتتىپاقىغا قايتىپ كېلىش يېڭى ھۆكۈمەتنىڭ خەلقئارانىڭ ئېتىراپ قىلىشىغا ئېرىشىشىدىكى مۇھىم بىر بەلگە، بۇ ناھايىتى زور دەرىجىدە ئۇنىڭ خەلقئارادىكى قانۇنلۇقلىقىنى ئۆستۈرىدۇ، بۇ دىپلوماتىيە جەھەتتىكى قاتماللىقنى بۇزۇپ تاشلاش، دىپلوماتىيە مۇھىتىنى ياخشىلاشتا مۇھىم ئەھمىيەتكە ئىگە. بۇنىڭدىن شۇنى مۆلچەرلەشكە بولىدۇكى، كەلگۈسىدە مىسىر ئافرىقا ئەللىرى ئىتتىپاقىنىڭ پائالىيەتلىرىگە پائال قاتلىشىش ئارقىلىق ئۆزىنىڭ خەلقئارا سىياسىي سەھنىدە تېخىمۇ جانلىق بولۇپ، ئۆزىنىڭ بۇ رايوندىكى چوڭ دۆلەتلىك تەسىرىنى تەدرىجىي ئەسلىكە كەلتۈرەلەيدۇ.