شىنجاڭ مەركىزىي شەھەر گېزىتى خەۋىرى: ئاپتاپتىن توسۇش ئەينىكى، ئاپتاپتىن توسۇش قالپىقى، ھاۋا تەڭشىگۈچ، مۇزلىتىلغان سۇ، تاۋۇز، سايە جاي، سۇ ئۈزۈش كۆلچەكلىرى ... بۇلارنىڭ ھەممىسى 25-ئىيۇن شىنجاڭلىقلارنىڭ ئىسسىق ئۆتۈشتىن ساقلىنىدىغان مۇھىم «قورالى» بولۇپ قالدى. بۇ كۈنى شىنجاڭدىكى 29 جايدا تېمپېراتۇرا ℃35تىن يۇقىرى بولدى.
شىنجاڭ ئۇيغۇر ئاپتونوم رايونلۇق مېتېئورولوگىيە ئىستانسىسىنىڭ باش مېتېئورولوگىيە مۇلازىمىتى ئەمەلدارى دوۋ شىنيىڭنىڭ تونۇشتۇرۇشىچە، ئىللىق ھاۋا ماسسىسىنىڭ كونتروللۇقىغا ئۇچرىغانلىقتىن 24-ئىيۇندىن باشلاپ شىمالىي، شەرقىي شىنجاڭدىكى 18 جايدا ئومۇميۈزلۈك يۇقىرى تېمپېراتۇرىلىق ھاۋارايى كۆرۈلگەن. 25-ئىيۇن بۇ خىل ھاۋا ماسسىسىنىڭ كۈچىيىشى بىلەن تەسىر دائىرە كېڭىيىپ، ئاپتونوم رايونىمىزدىكى 29 جايدا يۇقىرى تېمپېراتۇرىلىق ھاۋارايى بولغان. بۇنىڭ ئىچىدە تۇرپان ۋىلايىتى بۇ جەھەتتە ئۇدا ئىككى كۈن ئالدىنقى قاتاردا تۇرغان، 25-ئىيۇن تېمېپراتۇرا ℃42.1 قا چىققان، پىچاندىكى تۇيۇق چوڭ جىلغىسىدا ئەڭ يۇقىرى تېمپېراتۇرا ھەتتا ℃43.1 بولغان.
يۇقىرى تېمپېراتۇرىلىق ھاۋارايى تېخى ئاياغلاشقىنى يوق. دوۋ شىنيىڭنىڭ ئېيتىشىچە، بۈگۈن (26-ئىيۇن) بورتالا ۋە شىمالىي شىنجاڭنىڭ تەڭرىتاغ بويلىرى، بايىنغۇلىننىڭ جەنۇبى، تۇرپان-پىچان-توقسۇن ئويمانلىقى، قومۇل قاتارلىق جايلاردىكى بىر قىسىم رايونلاردا تېمپېراتۇرا ℃37تىن يۇقىرى بولىدىكەن، تۇرپان-پىچان-توقسۇن ئويمانلىقىدا بولسا يۇقىرى تېمپېراتۇرا ℃40 تىنمۇ ئېشىپ كېتىدىكەن.
يۇقىرى تېمپېراتۇرىلىق ھاۋارايى بىلەن ئوخشىمايدىغىنى، جەنۇبىي شىنجاڭدىكى نۇرغۇن جايدا 24-ئىيۇندىن باشلاپ يامغۇرلۇق ھاۋارايى كۆرۈلگەن. 25-ئىيۇن سائەت 17:00گىچە، ئاتۇشنىڭ ھۆل-يېغىن مىقدارى 20.8 مىللىمېتىر بولغان.
دوۋ شىنيىڭنىڭ تونۇشتۇرۇشىچە، بۈگۈن(26-ئىيۇن) ئۆتۈپ كەتكەندىن كېيىن يۇقىرى تېمپېراتۇرىمۇ ئاياغلىشىدىكەن. 26-ئىيۇندىن 27-ئىيۇن سەھەرگىچە ئىلى دەريا ۋادىسى، تەڭرىتاغ تاغلىق رايونلىرى، جەنۇبىي شىنجاڭنىڭ غەربىي قىسىملىرى، ئاقسۇ ۋىلايىتى قاتارلىق جايلاردا ئازراق ياكى ئوتتۇاھال يامغۇر ياغىدىكەن، بۇنىڭ ئىچىدە، ئىلى ۋادىسىنىڭ شەرقىي جەنۇبى، قەشقەر، ئاقسۇ قاتارلىق جايلارنىڭ قىسمەن رايونلىرىدا قاتتىق يامغۇر ياغىدىكەن، جەنۇبىي شىنجاڭنىڭ شەربىدىكى تاغلىق رايونلار، قەشقەرنىڭ شەرقىي جەنۇبى، ئاقسۇنىڭ غەربى، شىمالى قاتارلىق قىسمەن رايونلاردا قارا يامغۇر ياغىدىكەن، بەزى جايلاردا يامغۇر بىلەن تەڭ چاقماق چېقىش، مۆلدۈر يېغىشتەك كونۋېكسىيەلىك ھاۋارايى كۆرۈلىدىكەن.