جۇڭگو ساياھەتچىلىكىگە نىسبەتەن 2013 – يىلى تارىخىي ئەھمىيەتكە ئىگە بىر يىل بولدى. تۇمانلىق ھاۋا رايى قاتارلىق كۆپلىگەن پايدىسىز ئامىللار ساياھەتچىلىك تەرەققىياتىغا پاسسىپ تەسىر كۆرسەتتى. يەنە بىر تەرەپتىن ‹‹خەلق ساياھەتكە چىقىپ ئارام ئېلىش پىروگراممىسى›› رەسمىي ئېلان قىلىندى، ‹‹ساياھەت قانۇنى››نىڭ يولغا قويۇلۇپ، دەم ئېلىشقا قويۇپ بېرىش لايىھەسى تەڭشىلىپ، جۇڭگونىڭ ساياھەتچىلىك كەسپىنىڭ تەرەققىياتىغا چوڭقۇر تەسىر كۆرسەتتى.

كەسپىي ساھەدىكى تەھلىلچىلەرنىڭ كۆرسىتىشىچە، 2014 – يىلى جۇڭگو ساياھەتچىلىكىدە تۆت چوڭ تەرەققىيات يۈزلىنىشى بولىدىكەن.

1. ئەقىل – ئىدراكلىق ساياھەت رەڭدار تۇرمۇش بەرپا قىلىدۇ

2013 – يىلى 6 – نويابىر دۆلەت ساياھەت ئىدارىسىنىڭ تور بېكىتىدە ئېلان قىلىنغان ئۇقتۇرۇشتا: ‹‹گۈزەل جۇڭگو سەپىرى ئەقىل – ئىدراكلىق ساياھەت››نىڭ 2014 – يىلى جۇڭگو ساياھەت تەشۋىقاتىدىكى ئاساسى تېما بولىدىغانلىقى جاكارلانغان ھەم ئەقىل – ئىدراكلىق مۇلازىمەت، ئەقىل – ئىدراكلىق باشقۇرۇش ۋە ئەقىل – ئىدراكلىق تىجارەت قاتارلىق ئۈچ تەرەپتىن كۈچەپ، ساياھەت بايلىقى ۋە مەھسۇلاتلىرىنى ئېچىش ھەم بىرلەشتۈرۈشنى ئىلگىرى سۈرۈپ، ئۇچۇرلاشتۇرۇش ئارقىلىق ساياھەتچىلىكنىڭ زامانىۋى مۇلازىمەت كەسپىگە بۇرۇلۇشىغا تۈرتكە بولۇش تەكىتلەندى.

بۇ يىل كىرگەندىن بۇيان، جياڭسۇ، تيەنجىن، گۇاڭدوڭ، گۇاڭشى قاتارلىق جايلار ‹‹ئەقىل – ئىدراكلىق ساياھەت يىلى››غا مۇناسىۋەتلىك پائالىيەتلەرنى باشلىۋەتتى. جايلارنىڭ بىر يىللىق تەرەققىيات پىلانى بىزگە مۇنداق بىر كارتىنىنى سىزىپ بەردى: ئىستېمالچىلار تېخىمۇ كۆپ يېڭى تاراتقۇ، يېڭى تېخنىكا ئارقىلىق ساياھەت مەھسۇلاتلىرى ئۇچۇرلىرىنى قوبۇل قىلالايدۇ؛ تور، يانفون ئارقىلىق مېھمانخانا، ئايروپىلان بېلىتى، ساياھەت ئورۇنلىرىنىڭ ئىشىك بېلىتىنى زاكاز قىلالايدۇ؛ خاسلىققا ئىگە خۇسۇسىي ساياھەت لىنىيەلىرىنى زاكاز قىلالايدۇ؛ ئەقىل – ئىدراكلىق مەنزىرە رايونى تېخىمۇ كۆپ مەنبەلىك، ئىندىۋىدۇئال مۇلازىمەت بىلەن تەمىنلەپ، مەۋھۇم سىستېما ئارقىلىق ساياھەتچىلەرنى ساياھەت تۇرمۇشىدىن بەھرىمەن قىلىدۇ؛ ساياھەتچىلەر بىلەن ساياھەت رايونى ئوتتۇرىسىدا ئېلىپ بېرىلغان كۆپ خىل ئۇچۇر ئالماشتۇرۇش ساياھەت رايونىنىڭ مۇلازىمەت مەزمۇنى ۋە شەكلىدە ئۈزلۈكسىز يېڭىلىق يارىتىشىنى ئىلگىرى سۈرۈپ، ساياھەتچىلەرگە ئوخشىمىغان تۇيغۇ ئاتا قىلىدۇ.

2. مەدەنىي ساياھەت قىلىش يەنىمۇ تەشەببۇس قىلىنىدۇ

2013 – يىلى جۇڭگولۇق ساياھەتچىلەرنىڭ چەت ئەلنى ساياھەت قىلغاندىكى بىر قاتار مەدەنىيەتسىز قىلمىشى شۇ دۆلەت كىشىلىرىنىڭ غەزىپىىنى كەلتۈرۈپ، تاراتقۇلار كۆڭۈل بۆلىدىغان قىزىق نۇقتىغا ئايلاندى. 2013 – يىلى ئىيۇندا دۆلەت ساياھەت ئىدارىسى ‹‹جۇڭگو پۇقرالىرىنىڭ چېگرادىن چىقىپ ساياھەت قىلىشتىكى مەدەنىي ھەرىكەت قىبلىنەماسى››نى تۈزۈپ،بۇ ھەقتىكى تەشۋىقاتنى كۈچەيتتى.

جۇڭگو ساياھەت تەتقىقات جەمئىيىتى يېقىندا ئېلان قىلغان ‹‹جۇڭگو ساياھەت ئىگىلىكى توغرىسىدىكى كۆك تاشلىق كىتاب››تا، 2013 – يىلى ئېلىمىزنىڭ ساياھەت ئىگىلىكى تەكشى يۈرۈشكەن بولۇپ، مۆلچەرلىنىشىچە، دۆلەت ئىچىدە ساياھەت قىلغان ساياھەتچىلەر 3 مىليارد 300 مىليون ئادەم/قېتىمدىن ئاشىدىكەن. دۆلەت ساياھەت ئىدارىسىنىڭ باشلىقى شاۋ چىۋېينىڭ ئاشكارىلىشىچە، 2014 – يىلى چېگرادىن چىقىپ ساياھەت قىلىدىغان جۇڭگولۇق ساياھەتچىلەر 100 مىليون ئادەم /قېتىمغا يېتىدىكەن.

3.ياشانغاندا كۈتۈنۈش ساياھىتى يارقىن نۇقتىغا ئايلىنىدۇ

ياشانغانلار ئائىلىلىرىنىڭ كۆپىيىشى، ياشانغاندا كۈتۈنۈش كۆز قارىشىنىڭ ئۆزگىرىشى ۋە ياشانغانلارنىڭ ئىستېمال ئىقتىدارىنىڭ ئۈزلۈكسىز ئۆسۈشىگە ئەگىشىپ، ياشانغانلار بارغانسېرى سىرتقا چىقىپ ساياھەت قىلىشنى تاللايدىغان بولدى.

4. سەھرا ساياھەتچىلىكىنىڭ بازىرى چىقىدۇ

2013 – يىلىنىڭ ئاخىرىدا مەركەزنىڭ شەھەر – بازارلاشتۇرۇش خىزمىتى يىغىنىدا سەھرا ساياھىتىنىڭ كەلگۈسى تەرەققىياتى ئۈچۈن ئېنىق نىشان كۆرسىتىپ بېرىلدى: ‹‹شەھەرلەرنى چوڭ تەبىئەتكە قويۇش، ياپيېشىل تاغ – دەريالارنى شەھەر ئاھالىلىرىگە قالدۇرۇش كېرەك. مەدەنىيەتكە ۋارىسلىق قىلىپ، تەرەققىياتتا ئەسلىمە قالدۇرۇش، يەرلىك ئالاھىدىلىك ۋە مىللىي خۇسۇسىيەتكە ئىگە گۈزەل شەھەر – بازار بەرپا قىلىشتا تەبىئەتكە ھۆرمەت قىلىش، تەبىئەتكە بويسۇنۇش، ئادەم بىلەن تەبىئەت بىرلەشكەن كۆز قاراشنى گەۋدىلەندۈرۈپ، ھازىر بار بولغان تاغ – دەريا قاتارلىقلارنىڭ ئۆزگىچە مەنزىرىسىگە تايىنىپ، شەھەرلەرنى چوڭ تەبىئەتكە قوشۇپ، ئاھالىلەرنى تاغلارنى، سۈزۈك سۇلارنى كۆرەلەيدىغان، سەھرانى ئېسىدە تۇتالايدىغان قىلىش كېرەك››.

خەلقئارا ئىستىراھەت كەسپىي جەمئىيىتىنىڭ مۇئاۋىن رەئىسى جۇ جىجېن مۇنداق دېدى: ‹‹يۇرتىنى ئېسىدە تۇتۇش›› كەلگۈسىدە سەھرا ساياھەتچىلىكىنىڭ پەرقلىق تەرەققىياتىدىكى سېھرىي كۈچكە، شۇنداقلا ئىستىراھەت ساياھەتچىلىكى دەۋرىنىڭ مەدەنىيەت كەچۈرمىشىگە ئايلىنىدۇ. ئېلىمىزنىڭ سەھرا ساياھەتچىلىكى تەرەققىياتىنىڭ ھازىرقى ئەھۋالىغا نەزەر سالىدىغان بولساق، نۇرغۇن رايوندا پەسكويغا چۈشۈپ قېلىش، تارقاق بولۇش، كىچىك بولۇش قاتارلىق مەسىلىلەر ساقلانماقتا. بۇ ئەھۋالنى ئۆزگەرتىشتە، بىر رايوننىڭ مەدەنىيەت ئالاھىدىلىكى ۋە گۈزەل سەھرالىرىنى بايلىقلارنى بىرلەشتۈرۈشنىڭ ئاساسىي لىنىيەسى قىلىش كېرەك. يۇرتىنى سېغىنىش سەھرا ساياھەتچىلىكىدىكى ئەڭ مۇھىم مەدەنىيەت كەچۈرمىشى، مەدەنىيەت بولمىغان ساياھەتچىلىكنىڭ جېنى بولمايدۇ. سەھرا ساياھەتچىلىكىدە داڭلىق ماركا يارىتىش ئۆزگىچە ‹‹سەھرانى سېغىنىش››تىن كېلىدۇ، پەقەت مۇشۇنداق قىلغاندىلا پەسكويغا چۈشۈپ قېلىش، تارقاق بولۇش، كىچىك بولۇشنى يېڭى بولۇش، جۇغلانغان بولۇش ۋە چوڭ بولۇشقا يۈزلەندۈرگىلى، شۇندىلا مەھسۇلاتلاردا يېڭىلىق يارىتىشنى كەسىپلەرنى كۆپ مەنبەلەشتۈرۈپ، كەسىپلەرنىڭ بىرلىشىشىنى ئىشقا ئاشۇرغىلى بولىدۇ. شەھەر – بازارلاشتۇرۇش قەدىمىنىڭ تېزلىشىشىگە ئەگىشىپ، گۈزەل سەھرانى ماركا قىلغان يېڭى تىپتىكى سەھرا ساياھەتچىلىكىنىڭ بازىرى كۈنسايىن ئىتتىك بولىدۇ.