ئەنگلىيە رادىيو شىركىتىنىڭ 10-دېكابىردىكى خەۋىرىگە قارىغاندا ، مىسىر زۇڭتۇڭ مەھكىمىسى زۇڭتۇڭ ئابدۇللا فاتاخ سىسىنىڭ 23-دېكابىردىن 24-دېكابىرغىچە جۇڭگودا زىيارەتتە بولىدىغانلىقىنى جاكارلىغان . سىسى بۇ يىل 5-ئايدا مىسىرنىڭ زۇڭتۇڭ سايلىمىدا غەلىبە قىلىپ ، 6-ئايدا قەسەم بېرىپ مىسىرنىڭ يېڭى بىر نۆۋەتلىك زۇڭتۇڭى بولغان .
مىسىر خەلقئارا ھەمكارلىق مىنىستىرلىقىنىڭ مىنىستىرى ناگلا ئەل ئەھۋانى مۇنۇلارنى بىلدۈرگەن : زۇڭتۇڭ سىسىنىڭ ئاساسلىق مەقسىتى جۇڭگو بىلەن ئىستراتېگىيەلىك شېرىكلىك مۇناسىۋىتى بەرپا قىلىشتىن ئىبارەت .

ئىگىلىنىشىچە ، سىسى زۇڭتۇڭلۇق تەختىگە ئولتۇرغاندىن كېيىن چەت ئەللەردە كۆپ قېتىم زىيارەتتە بولغان . بۇ يىل 8-ئايدا رۇسىيەدە زىيارەتتە بولغاندىن كېيىنلا ، 11-ئاينىڭ 24-كۈنىدىن 27-كۈنىگىچە ئۇ ۋەزىپىگە ئولتۇرغاندىن بۇيانقى تۇنجى قېتىملىق ياۋروپا سەپىرىنى باشلاپ ، ئىلگىرى-كېيىن بولۇپ ئىتالىيە ، ۋاتىكان ۋە فىرانسىيەلەردە زىيارەتتە بولغان . سىسى بۇ زىيارەتلىرى ئارقىلىق مىسىرنىڭ خەلقئارادىكى ئورنىنى قايتا تىكلەشنى ئۈمىد قىلىدىكەن .