9 – ئۆكتەبىر ئۈرۈمچى شەھەرلىك پار بىلەن تەمىنلەش كەسپىنى باشقۇرۇش ئىشخانىسىدىن ئۇقۇشىچە، ئۈرۈمچى شەھىرىدە، بۈگۈن ئۈرۈمچى ۋاقتى سائەت 0 دىن ئېتىبارەن رەسمىي پار بېرىلىدىكەن، پار بىلەن تەمىنلەش باشلانغاندىن كېيىن، ئاھالىلەرنىڭ ئۆي ئىچى تېمپېراتۇرىسى ئۆلچەمگە يەتمىسە، قارىمىقىدىكى پار بىلەن تەمىنلەش ئورۇنلىرىغا ئەھۋال ئىنكاس قىلسا بولىدىكەن، ناۋادا قارىمىقىدىكى پار بىلەن تەمىنلەش ئورۇنلىرى كۆرۈلگەن مەسىلىنى ۋاقتىدا ھەل قىلمىسا، ئۈرۈمچى شەھەرلىك پار بىلەن تەمىنلەش كەسپىنى باشقۇرۇش ئىشخانىسىنىڭ قىزىق لىنىيەسى 2811532 گە تېلېفون بېرىپ، ئەھۋالنى مەلۇم قىلسا بولىدىكەن.

پار تۇرۇبىلىرى كونىراش، تۇرۇبا دىيامېتىرى ماسلاشماسلىق ياكى ئۆيدىكى پار بىلەن تەمىنلەش ئەسلىھەلىرىدىن كاشىلا كۆرۈلۈش سەۋەبلىك ئۆي ئىچى ئىسسىمىسا، ئاھالىلەر دەرھال ئۆزى ئولتۇرۇشلۇق ئورۇنلاردىكى خوجىلىق بۆلۈملىرىگە كىرىپ، مەسىلىنى ۋاقتىدا ئىنكاس قىلىشى كېرەككەن.

پار بىلەن تەمىنلەش مەزگىلىدە، ئورۇن ۋە شەخسلەرنىڭ پار بىلەن تەمىنلەش ئەسلىھەلىرىنى خالىغانچە بۇزۇۋېتىشىگە، يۆتكىۋېتىشىگە ياكى قوشۇپ ياسىۋېلىشىغا، ئىسسىقلىق بىلەن تەمىنلەش كۆلىمىنى يوشۇرۇشىغا، پار بىلەن تەمىنلەش ئەسلىھەلىرىگە ئىسسىق سۇ ئايلاندۇرۇش ئەسۋابىنى سەپلىۋېلىشىغا قەتئىي يول قويۇلمايدىكەن. قائىدىگە خىلاپلىق قىلغان ئورۇنلارغا 10 مىڭ يۈەندىن يۇقىرى، 30 مىڭ يۈەندىن تۆۋەن جەرىمانە قويۇلىدىكەن، شەخسلەرگە 500 يۈەندىن يۇقىرى، 1000 يۈەندىن تۆۋەن جەرىمانە قويۇلىدىكەن.

بۇنىڭدىن سىرت، شەھەر ئاھالىلىرى پار ھەققىنى توختامدا بەلگىلەنگەن مۇددەت ئىچىدە تاپشۇرۇشى شەرت ئىكەن. قەرەلىدە پار ھەققىنى تاپشۇرمىغان ئاھالىلەرگە جەرىمانە قويۇلىدىكەن.