ئىز تورى-爱智网

2010-يىللىق دۇنيا لوڭقىسى گۇرۇپپىلار ئارا مۇسابىقىسىنىڭ G گۇرۇپپا 1-ئايلانما مۇسابىقىسى شۇ يەر ۋاقتى تۈنۈگۈن كەچ يوھاننىسبۇرگدىكى ئايرېس باغچىسى توپ مەيدانىدا ئۆتكۈزۈلدى . 5 نۆۋەتلىك دۇنيا لوڭقىسى چېمپيونى برازىلىيە كوماندىسى 2-1 نەتىجىدە 44 يىلدىن تۇنجى قېتىم دۇنيا لوڭقىسىغا قاتناشقان چاۋشيەن كوماندىسىنى مەغلۇب قىلىپ ، بۇ نۆۋەتلىك مۇسابىقىدىكى تۇنجى مەيدان غەلىبىنى قولغا كەلتۈردى ھەمدە 3 نومۇر بىلەن مەزكۇر گۇرۇپپىدا 1-ئورۇنغا ئۆتتى .

ئالدىنقى يېرىم مەيدان مۇسابىقە 0-0 بىلەن ئاياغلاشقان بولۇپ ، كېيىنكى يېرىم مەيدان باشلىنىپ ئۇزۇن ئۆتمەي برازىلىيە كوماندىسىنىڭ يان مۇداپىئەچىسى مايكون تۆۋەن بۇلۇڭدىن بىر توپ ئۇرۇپ كىرگۈزۈپ نەتىجىنى ئۆزگەرتتى ، 72-مىنۇتتا ئوتتۇرا مەيدان ماھىرى ئېلانو يەنە بىر توپ ئۇرۇپ برازىلىيە كوماندىسى 2-0 ئۈستۈنلۈكنى ئىگىلىدى . ئاخىرقى مىنۇتلاردا چاۋشيەن كوماندىسىنىڭ 8-نومۇرلۇق ھۇجۇمچىسى جىيىنەن بىر توپ قايتۇرىۋالغان بولسىمۇ ئاخىرقى نەتىجە يەنىلا 2-1 دە مۇقىملاشتى .

برازىلىيە كوماندىسىنىڭ نۆۋەتتىكى ئەمەلىي كۈچى دۇنيا بويىچە 1-ئورۇندا بولۇپ ، چاۋشيەن كوماندىسى بولسا 85-ئورۇندا ، يەنى بۇ قېتىمقى دۇنيا لوڭقىسىدىكى 32 كوماندىنىڭ ئىچىدە ئەڭ كەينىدە تۇرىدۇ . چاۋشيەن كوماندىسىنىڭ ئەڭ داڭلىق ماھىرى جېڭ داشىنىڭ يىللىق كىرىمى برازىلىيە چولپىنى كاكانىڭ 450 مىڭدىن بىرىگىمۇ يەتمەيدۇ . شۇنداقتىمۇ تارىختا تېخى 2-قېتىم دۇنيا لوڭقىسىغا قاتناشقان <سىرلىق قوشۇن> چاۋشيەن كوماندىسى 5 نۆۋەتلىك دۇنيا چېمپيونى برازىلىيە كوماندىسى بىلەن بىر مەيدان كەسكىن مۇسابىقە ئويناپ تاماشىبىنلارنى رازى قىلدى .