تونۇش: ھەر خىل سەۋەبلەر تۈپەيلىدىن تۇتقۇچى قۇۋۋەتلەر ئاجىزلاپ، جىنسىي مۇناسىۋەت باشلىنىش بىلەنلا ياكى زەكەر جىنسىي يولغا كىرىش بىلەنلا مەنىي چىقىپ كېتىش، جىنسىي مۇناسىۋەت سوغۇق كەيپىيات ئىچىدە ئاخىرلىشىش بىلەن ئىپادىلىنىدىغان مىزاج بۇزۇلۇش خاراكتېرلىك كېسەللىك.
پەرۋىش: روھىنىڭ پاك، ساغلام بولۇشىغا دىققەت قىلىش، شەھۋەتكە زىيادە بېرىلىپ كېتىشتىن ساقلىنىش، بەدىنىدە مەلۇم كېسەللىك بار دەپ گۇمان قىلىنسا دوختۇرغا كۆرۈنۈش، مەسلىھەت سوراش لازىم. يۇقىرىقىلاردىن سىرت جىنسىي مۇناسىۋەت جەريانىدا، ئىككى تەرەپ ئوتتۇرىسىدا كۆڭۈل ئازادىلىكى بولۇشى، ھودۇقۇش، جىددىيلىشىش بولماسلىقى كېرەك، ئوزۇقلىنىشتا مىزاجىغا قارىتا مۇناسىپ ئوزۇقلىنىش، يەنى ئاسان سىڭىدىغان يېمەكلىكلەرنى ئىستېمال قىلىش، سوغۇق سۇدا يۇيۇنۇشتىن، سوغۇق ئىچىملىكلەرنى كۆپ ئىچىشتىن، غەم ئەندىشە قىلىشتى، زىيادە چارچاشتىن ساقلىنىش، جىنسىي مۇناسىۋەتنىڭ ئوڭۇشلۇق بولماسلىقىدىن ئەنسىرەپ جىددىيلەشمەسلىك، ھاراق ئىچىشتىن، زىيادە تار ئىشتان كىيىشتىن ، شەھۋانى كىنو ۋە سىنالغۇلارنى كۆرۈشتىن، شەھۋانى رومانلارنى ئوقۇشتىن، شەھۋانى خىياللارنى كۆپ قىلىشتىن، قولدا مەنىي ماڭدۇرۇشتىن ساقلىنىش، توغرا جىنسىي تۇرمۇش قارىشى تۇرغۇزۇش، شەخسىي تازىلىق ۋە مۇھىت تازىلىقىغا ئەھمىيەت بېرىش، توغرا تۇرمۇش ئادىتى ۋە ئوزۇقلىنىش ئادىتىنى يېتىلدۈرۈش لازىم.
پەرھىز: غىدىقلىغۇچى يېمەك- ئىچمەكلەردىن لازا- ئاچچىقسۇ، تاماكا- ھاراق، كالا گۆشى، ھەمدە تەستە ھەزىم بولىدىغان، يەل پەيدا قىلىدىغان، سوغۇق تەبىئەتلىك يېمەكلىكلەردىن پەرھىز قىلىنىدۇ.