بەزى ياشانغان كىشىلەرنىڭ سۈيدۈكى راۋان بولمايدۇ . بەزىدە سۈيدۈكى ئۈزۈلۈپ كېلىدۇ . سىيىپ بولغاندىن كېيىنمۇ سۈيدۈكى تېمىپ تۇرىدۇ . بۇ ياشانغان ئەرلەردە كۆپ بولىدىغان مەزى بېزى قېلىنلاپ , يوغىنايدىغان كېسەلدىن ئىبارەت . بۇ كېسەل ياش چوڭايغانسېرى ئېغىرلىشىدۇ .
    مەزى بېزى يوغىناش مەزى بېزىنىڭ ياللۇغلىنىش ئاساسىدا پەيدا بولۇپ , 50 ياش ئەتراپىدا ئالامەتلىرى كۆرۈلىدۇ , كېچىلىرى سۈيدۈك قېتىم سانى كۆپىيىش , كۈندۈزلىرى تەرەتكە ئولتۇرۇپ 1~2مىنۇتتىن كېيىن تەستە سۈيدۈك كېلىش قاتارلىق ئەھۋاللار كۆرۈلىدۇ . كېسەلنىڭ راۋاجلىنىشى ئاستا , دەسلىپىدە سالامەتلىككە كۆپ زىيانى بولمىغاچقا , ياشانغانلارنىڭ دىققىتىنى قوزغىمايدۇ . ۋاقىتنىڭ ئۆتۈشىگە ئەگىشىپ , سۈيدۈك راۋان ماڭماي ,سۈيدۈك دوۋساققا يىغىلىپ , بىئاراملىنىش , تاماق يېگۈسى كەلمەسلىك , ماغدۇرسىزلىنىش , ھەتتا سۈيدۈكتىن زەھەرلىنىش كېلىپ چىقىدۇ .
     مەزى بېزى - ئەرلەرنىڭ جىنسىي سىستېمىسىدىكى بىرخىل بەز بولۇپ , ئۇنىڭ ئېغىرلىقى 20گرام ئەتراپىدا , دوۋساقنىڭ ئاستىدا , سۈيدۈك يولىنىڭ يۇقىرى قىسمىغا جايلاشقان , مەزى بېزىنىڭ يوغىنىشى 40ياشلاردىن باشلىنىپ , ياش چوڭايغانسېرى روشەن بولىدۇ . مەزى بېزى يوغىناش ياشانغانلارغا ئازاب ئېلىپ كېلىدىغان كېسەل بولسىمۇ , كېسەل سېزىلسە , قورقۇپ كېتىشنىڭ ھاجىتى يوق .
     مەزى بېزى يوغىناش كېسىلىنىڭ دەسلەپكى مەزگىلىدە ھاراق ئىچمەسلىك , سوغۇقتىن ساقلىنىش, ئۇزۇن ئولتۇرماسلىق ھەم ئۇزۇن ۋېلىسىپىت مىنمەسلىك , ئاچچىق -چۈچۈك نەرسىلەرنى ئاز يېيىش , ئىمكان قەدەر جىنسىي مۇناسىۋەتنى كونترول قىلىش كېرەك .
     ئەگەر مەزى بېزى ياللۇغلىنىش قوشۇلۇپ كەلسە , ئىسسىق سۇدا ئولتۇرۇپ بېرىش , باكتېرىيىلەرگە قارشى دورىلارنى ئىشلىتىش كېرەك .
مەزى بېزى يوغىناش ئېغىرلاشقاندا ئوپېراتسىيە قىلدۇرۇش ئۈنۈملۈك ئۇسۇلدۇر. ئەمما     ياشانغانلارنىڭ يۈرەك , ئۆپكە كېسەللىكلىرى قوشۇلۇپ قالسا ۋە تېنى ئاجىزلار ئوپىراتسىينى كۆتۈرەلمەيدۇ. بۇنداقلارغا مەزى بېزى توڭلىتىپ داۋالاش ,ھورمۇن ئىشلىتىش ئۇسۇلىنى قوللىنىشقا بولىدۇ .