1) ھۆل چىڭسەيدىن مەلۇم مىقداردا پاكىزلاپ سوقۇپ ، پاكىز رەختكە ئوراپ سىقىپ سۈيىنى چىقىرىپ ، سەككىز مىسقال چىڭسەي سۈيىگە ئىككى قوشۇق ئاق شېكەر ئارىلاشتۇرۇپ ھەر كۈنى ناشتىدىن ئىلگىرى ئىچىش .
2) توقاچىگە يىلتىزى ، تاۋۇز شاپىقىنىڭ ئىچىدىكى ئاق قىسمى ئىككى جىڭ ، سۇ بىر چېلەك ، شېكەر ئۈچ يېرىم سەر تەييارلىنىدۇ . توقاچىگە يىلتىزىنى ئاقلاپ ، پاكىز يۇيۇپ ئۇششاق توغراپ ، تاۋۇزنىڭ شاپىقىنى سويۇپ ، يۇيۇپ ئۇششاق توغراپ ، توقاچىگە يىلتىزىنى سېلىپ بىر چېلەك سۇنىڭ ئۈچتىن ئىككى قىسمى قالغۇچە قاينىتىپ ، تىرىپىنى ئېلىۋېتىپ ، سۈيىنى بىرقانچە قېتىم داكا ياكى ئەلگەكتىن ئۆتكۈزۈپ سۈزۈپ ، قازانغا قۇيۇپ ، شېكەر سېلىپ بىر قانچە قېتىم قاينىتىپ قازاننى چۈشۈرۈپ ، دورا سۈيى سوۋۇغاندىن كېيىن مۇۋاپىق قاچىغا ئېلىپ ، ھەر كۈنى ئىككى قېتىم بىر پىيالىدىن تاماقتىن كېيىن ئىچىش .
3) پىلە قۇرتى ياكى مايىقىدىن ئىككى سەر يەتتە مىسقال ، ئۈجمە يوپۇرمىقىدىن سەككىز سەر ، قارا كۈنجۈتتىن تۆت يېرىم سەر ، شېكەردىن 13 يېرىم سەر ئېلىپ ، بۇلارنى تالقانلاپ ، كۈندە ئۈچ قېتىم ، ھەر قېتىمدا ئالتە مىسقالدىن چاي بىلەن ئىچىش .
4) كۆك ماشتىن ئۈچ يېرىم سەر ، كالىنىڭ ئۆتىدىن بىر دانە ياكى قوينىڭ ئۆتىدىن ئۈچ دانە ئېلىپ ئارىلاشتۇرۇپ ، ماشنى چالا پىشقۇچە قۇرۇپ تالقانلاپ ، شېكەر قىيامى بىلەن خېمىر قىلىپ ، بىر دانىسىنى چىلان ئۇرۇقىدەكتىن كۇمىلاچ قىلىپ تەييارلاپ ، ھەركۈنى ئىككى قېتىم ، ھەر قېتىمدا بەش - ئالتە دانىغىچە تاماقتىن كېيىن ئىچىش .
5) چوڭ چىلاننىڭ چېچىكىدىن يەتتە سەر ، كەكرە ئۇرۇقىدىن ئۈچ يېرىم سەر ئېلىپ ، بۇلارنى ئىككى يېرىم چىنە سۇدا ئىككى چىنە سۇ قالغۇچە قاينىتىپ ، تىرىپلارنى ئېلىۋېتىپ سۈيىنى ئوبدان سۈزۈپ تەييارلاپ ، كۈندە ئۈچ قېتىم ، ھەر قېتىمدا ئۈچ - تۆت قوشۇق ئىچىش .
6) خام خاسىڭنى سىركىگە بىر كېچە چىلاپ ، ھەر كۈنى ئۈچ - تۆت تالدىن ئىستېمال قىلىش .
7) گۈلنەپشە ياكى ھەمشىۋانىدىن ئىككى مىسقال ، نېلوپەردىن ئۈچ مىسقال ، توقاچىگە گۈلىدىن ئۈچ مىسقال ، توقاچىگە يوپۇرمىقىدىن ئىككى مىسقال ، ئەينۇلىدىن بەش مىسقال ، چىلاندىن 10 دانە ئېلىپ ، بۇلارنى ئىككىگە بۆلۈپ ، يېرىمىنى بىر چىنە قايناق سۇغا دەملەپ ، تەمى چىققاندىن كېيىن ئىلمان ھالدا كۈندە بىر قېتىملا ئىچىش .
يۇقىرىقى چارىلەردىن كېسەلنىڭ ئەھۋالىغا قاراپ تاللاپ قوللانسا بولىدۇ .