كۆز ئاجىزلىقى ( زەفئۇلبەسەرى ) ھەرخىل ئىچكى ۋە تاشقى ئامىللارنىڭ تەسىرىدىن كۆزنىڭ كۆرۈش كۈچى تەدرىجىي ئاجىزلاپ ، نورمال كۆرەلمەيدىغان بولۇپ قالغانلىقىغا قارىتىلغان .
سەۋەبى
كۆرۈش ئادەتلىرىنىڭ زەررلىنىشى ( كۆز سۇيۇقلۇقلىرىنىڭ نورمالسىزلىنىشى ) يەنى ئازىيىش ، كۆپىيىش ، قۇيۇلۇش - سۇيۇلۇشنى ، كۆز قەۋەتلىرىدىكى بىرەر كېسەللىك ئاسارىتى ، بالا ھەمراھسىمان پەردە يەنى رەڭدار پەردە ۋە تۇخۇم ئېقىسىمان سۇيۇقلۇقنىڭ نورمالسىزلىنىشى ، كىرپىكسىمان چاندىرلارنىڭ نورمالسىزلىنىشى ، سېرىق نۇقتىنىڭ زەخمىلىنىشى قاتارلىقلار ۋە مىزاجنىڭ بۇزۇلۇشىدىن كېلىپ چىقىدۇ . مىزاجنىڭ بۇزۇلۇشىدا ئومومىي بەدەنگە ھۆللۈك ، قۇرۇقلۇق ، ئىسسىقلىق ، سوغوقلۇققا ئوخشاش كەيپىياتلار خىلىتلىق ياكى خىلىتسىز ھالدا ئۆزگىرىپ ، بىرەرسى كېمىيىپ ياكى غالىب كېلىپ كۆز ئاجىزلىقىغا سەۋەب بولىدۇ . ئۇنىڭدىن باشقا نورمال ھەزىم نورمالسىزلىنىش ، سۈپىتى تۆۋەن ، يىرىك ۋە غەليىز يېمەكلىكلەرنى ئۇزۇن مۇددەت ئىستېمال قىلىش ، قىنسىي ئالاقىنى كۆپ قىلىش ، ئېغىر دەرىجىدىكى كەم قۇۋۋەت ، كەم قانلىق ، ئەقلىي ئەمگەك بىلەن كۆپ شوغۇللىنىش ، يورۇقلۇقى كەم شارائىتتا كىتابنى جىق كۆرۈش ، خەتنى كۆپ يېزىش ، كۆرۈش كۈچىنىڭ ئاجىزلىقىنى كەلتۈرۈپ چىقىرىدۇ . قېرىلىق ، مەس قىلغۇچى نەرسىلەرنى كۆپ ئىستېمال قىلىش ، ئوزۇقلۇق ماددىلار كەمچىل بولۇش ، ئۇزۇن مۇددەت ئۆتكۈر نۇرلۇق ياكى قارغا ئوخشاش نۇر قايتۇرغۇچى نەرسىگە بىۋاستە قاراش ۋە بەزى نەزلە ، زۇكام ، مېڭە كېسەللىكلىرى قاتارلىقلار تەدرىجىي ھالدا كۆرۈشنىڭ ئاجىزلىقىنى كەلتۈرۈپ چىقىرىدۇ .
ئالامىتى
كۆزنىڭ كۆرۈشى ناچارلىشىپ نەرسىلەرنى ئېنىق ، توغرا كۆرەلمەسلىك ئاساسلىق ئالامەت بولىدۇ . بەزىلەردە كۆز قارىچۇقىنىڭ چوڭ ياكى كىچىكلىكى مەلۇم بولىدۇ . بۇ نۇر ئۆتكۈزگۈچى تۆشۈكنىڭ كېڭەيگەن ياكى تارايغانلىقىنىڭ ئىپادىسى . ئەگەر قارىچۇقىنىڭ رەڭگى ئاق ياكى دۇغلاشقا بولسا ، نۇر ئۆتكۈزگۈچى تۆشۈككە يېڭىدىن سۇچۈشكەنلىك ياكى ئىچى سۈرۈپ سۇيۇقلۇق يوقاتقانلىق ، قان يوقاتقانلىق ، كۆپ جىنسىي ئالاقە قىلغانلىقىنىڭ بەلگىسسى بولۇپ ھېسابلىنىدۇ . ئەگەر كۆزگە پاشا ، چىۋىن ، چاڭ - توزانغا ئوخشاش نەرسىلەر كۆرۈنسە مۈڭگۈز پەردە ، توخۇم ئېقىسىمان سۇيۇقلۇقلارنىڭ قۇيۇق ، قېلىنلىشىپ قالغانلىقىنىڭ بەلگىسى بولۇپ ھېسابلىنىدۇ . ئەگەر بەدەن ئورۇق ، تومۇرى ئىنچىكە قاتتىق سالسا كۆزلىرى ئولتۇرۇشۇپ كەتسە جىگەر ، ئاشقازان ئاجىزلىقىدىن بولغان كۆز ئاجىزلىقى ئىكەنلىكىدىن دېرەك بېرىدۇ .
ئەگەر سىرتقى جەھەتتىن بىر قاراشتىنلا كۆزنىڭ چوڭ - كىچىكلىك ھەجمىدە ئۆزگىرىش بولمىسا ياكى قىزىرىشتەك ئالامەتلەر كۆرۈلمىسە ئاز - ئازدىن ياش ئېقىپ ، كۆزنىڭ بۇرۇن تەرەپ بۇرجىكىدىن پات - پات بۇغدايدەك قۇيۇق چاپاق چىقسا ، بۇ كۆپىنچە تاماق يەپ تولا كېكىرىشلەر تۈپەيلىدىن كۆز ئاجىزلىقى پەيدا بولغانلىقىنى بىلدۈرىدۇ .
ئۇنىڭدىن باشقا بىمارلاردىن تەپسىلىي سوراش ئارقىلىق ئىلگىرىكى كېسەللىك تارىخىنى سۈرۈشتە قىلىش ، ئوبدان مۇھاكىمە قىلىش ئارقىلىق بەلگىلىرىنى تەپسىلىي ئايرىش لازىم .
داۋاسى
ئالدى بىلەن سەۋەبنى تېپىپ ، سەۋەبىنى تۈگىتىشكە ئامال قىلىش كېرەك . ماددىدىن بولغان بولسا ، ماددىنى پىشۇرۇش ، تازىلاش ، تەڭشەش ، ئۇنىڭدىن كېيىن شۇ ئەزانى قۇۋۋەتلەپ ئەسلىگە كەلتۈرۈش لازىم .
خىلىتنى پىشۇرۇش ئۈچۈن ھەربىر خىلىتقا مۇناسىپ ھالدا مەتبۇخى ھەلىيلە ، شەربىتى بىنەپشە بېرىلىدۇ . تازىلاش ئۈچۈن ئىيارەجى پەيقەرا ، ھەببى زەھەب ، ھەببى شەبيار ، ھەبيى قوقىيالار بېرىلىدۇ .
قۇۋۋەتلەش ئۈچۈن ئىترىيفېلى بادىيان ، سۇفۇفى ئامىلە بېرىلىدۇ . تۇرۇپ ، چامغۇرنى كۆپ ئىستېمال قىلىش ، ناۋات بىلەن يۇمغاقسۈت ، كاسىننى سوقۇپ بېرىش لازىم . سىرتتىن كۆھلى روشنائى ، كۆھلى باسلىقۇن ئىشلىتىلدۇ .
كۆرۈش ئاجىزلىقى ئىسسىقتىن بولغانلىرىغا سىرتقى جەھەتتە بىنەپشە ۋە نىيلۇفەر يېغى قاتارلىق سوغۇق تەبىئەتلىك ياغلار بىلەن باشنى ياغلاش ، تاتلىق بادام يېغىنى كۆزگە تېمىتىش كېرەك . چىلاننى قاينىتىپ ئىچكۈزسىمۇ ئوبدان مەنپەئەت قىلىدۇ .
سوغوقتىن بولغانلىرىغا پاقلان ياكى مىكيان توخۇ گۆشىنى كاۋاپ قىلىپ قوۋزاق دارچىن قاتارلىق ئىسسىق دورىلار بىلەن پىشۇرۇپ يىيىش ، ياسىمەن يېغىنى بۇرۇنغا تېمىتىش ، ئىسسىق دورىلار سۈيى بىلەن يۇيۇنۇش ياكى ھورىدا باشنى تەرلىتىش لازىم . بادىيان ، بادىيان يىلتىزى ، چۈچۈكبۇيا يىلتىزى ، پىرىسياۋشان ، ئۈستۇخۇددۇس قاتارلىقلارنى ناۋات بىلەن قوشۇپ قاينىتىپ بەرسە تېخىمۇ ياخشى . كۆزگە پاشا ، كۇمۇتىغا ئوخشاش نەرسىلەر ئۇچقاندەك بىلىنىدىغان كۆرۈش زەئىپلىكىدە مەئجۇنى ۋەج قاتارلىقلارنى مەلۇم ۋاقىت ئىستېمال قىلىش كېرەك .
كۆرۈشنىڭ ئاجىزلىشىشى قېرىلىق ياكى بەدەن ئاجىزلىقتىن بولغان بولسا ھەببى شەبيار ، ھەببى قوقىيا ، ماددە تۇلھايات ، ئىترىيفېلى كەبىر ، شەربىتى مائۇلئەسەل قاتارلىق دورىلارنى ئىستېمال قىلدۇرۇش ، سىرتىدىن كۆھلى جەۋاھىر ئىشلىتىش لازىم .
ئەگەر ، باشقا كېسەللىكلەر سەۋەبىدىن بولغان بولسا شۇ كېسەلنى داۋالاش بىلەن بىرگە كۆزنىڭ كۆرۈش كۈچىنى ئاشۇرغۇچى دورىلارنى ئىشلىتىش لازىم .
ھەرخىل سەۋەبلەردىن بولغان كۆرۈشنىڭ ئاجىزلىقىغا كۆھلى جەۋاھىرنىڭ ئۈنۈمى ياخشى .
