دىيابېت كېسىلى بىر خىل سوزۇلما، پۈتۈن بەدەن خاراكتېرلىك ئىچكى ئاجرالما مېتابولىزم كېسىلى بولۇپ ، ئاساسلىقى ئىچكى ئورگانىزىمدىكى ئىنسۇلىننىڭ مۇتلەق ياكى نىسبىي ھالدا يېتىشمىگەنلىكى سەۋەبىدىن قەنت، ياغ، ئاقسىلنىڭ مېتابولىزملىشىشىنىڭ قالايمىقانلىشىشىدىن كېلىپ چىقىدىغان كېسەللىك. ئالاھىدىلىكلىرى قان شېكىرىنىڭ بەك يۇقىرىلاپ كېتىشى ھەم قەنت سىيىشتە ئىپادىلىنىدۇ. دەسلەپكى مەزگىلدە روشەن كېسەللىك ئالامىتى كۆرۈلمەيدۇ، قان شېكىرى بەك يۇقىرىلاپ كەتكەندە ‹‹ ئۈچ كۆپ، بىر ئاز ›› يەنى كۆپ سىيىش، كۆپ ئۇسساش، كۆپ يېيىش شۇنداقلا بەدەن ئېغىرلىقى يېنىكلەپ كېتىش، بۇنىدىن باشقا يەنە ھارغىنلىق، ماغدۇرسىزلىنىش، روھسىزلىنىش قاتارلىق ئالامەتلەر كۆرۈلىدۇ ، ئېغىر بولغاندا مىس كېسىلى كىسلاتاسىدىن زەھەرلىنىشنى كەلتۈرۈپ چىقىرىدۇ. تېببىي خادىملار كلىنىكىدا كۆزىتىش ئارقىلىق تۆۋەندىكى 10 خىل ئادەمنىڭ دىيابېت كېسىلىگە ئاسان گىرىپتار بولىدىغانلىقىنى بايقىغان:
1. بەدەن ئېغىرلىقى يېنىكلەپ كەتسىمۇ سەۋەبى ئېنىق ئەمەس، ئەمما ئىشتىھاسى نورمال ئادەملەر . بولۇپمۇ ئىلگىرى تېنى سېمىز بولۇپ يېقىنقى مەزگىلدىن بۇيان بەدەن ئېغىرلىقى يېنىكلەپ ماغدۇرسىز بولۇپ قالغانلار .
2.ئالاھىدە چوڭ ( 7400 گىرامدىن ئارتۇق ) بوۋاق يەڭگىگەن ئاياللار .
3. ھامىلدارلىق ئەگەشمە كېسىلىگە گىرىپتار بولغان ئاياللار. مەسىلەن، كۆپ قېتىم بويىدىن ئاجراش ، ھامىلدار مەزگىلىدە زەھەرلىنىش، ھامىلە بالىياتقۇ ئىچىدە ئۆلۈپ قېلىش، ئۆلۈك بالا تۇغۇش قاتارلىقلار .
4. يېشى 40 تىن ئاشقانلار .
5. پۇت- قولىغا جاراھەت چىقىپ ئۇزۇن مەزگىلگىچە ساقايمىغانلار .
6. ئۇرۇق- ئەۋلادىدا 30 ياشتىن ئاشقاندا دىيابېت كېسىلىگە گىرىپتار بولغانلىق تارىخى بارلار .
7. سېمىرىپ بەدەن ئېغىرلىقى ئېشىپ كەتكەن بولۇپمۇ قورساق سېلىپ كەتكەنلەر .
8. يۇقىرى قان بېسىپ ، قاندىكى ماي تەركىبى ئارتىپ كېتىش كېسىلىگە گىرىپتار بولۇپ قالغانلار .
9. رېئاكسىيىلىك قان شېكىرى تۆۋەنلەپ كەتكەنلەر .
10. چات ئارىلىقى قىچىشىش ، كۆرۈش قۇۋىتى ئاجىزلاپ كېتىش ، تېرىسى تەكرار ياللۇغلىنىش ، ئىككى پۇتى ئاغرىيدىغان ياكى غەيرىلىك ھېس قىلىسىمۇ ئەمما سەۋەبى ئېنىق بولمىغانلار .
تېببىي مۇتەخەسىسلەرنىڭ قارىشىچە ، يۇقىرىقى 10 خىل ئادەم ناھايىتى ئاسانلا دىيابېت كېسىلىگە گىرىپتار بولۇپ قالىدىكەن، شۇڭا بۇنىڭغا يۈكسەك دەرىجىدە ئەھمىيەت بېرىپ، قەرەللىك ھالدا تەكشۈرتۈپ كېسەللىكنىڭ پەيدا بولۇپ شەكىللىنىپ قېلىشىدىن ساقلىنىش كېرەك .
