2013– يىللىق قۇربان ھېيىتلىق سەنئەت كېچىلىكى سۈرەتكە ئېلىنىپ بولدى
ئانا تۇپراق تورى خەۋىرى : 2013– يىللىق قۇربان ھېيىتلىق سەنئەت كېچىلىكى 9 – ئۆكتەبىر شىنجاڭ تېلېۋىزىيە ئىستانسسىدا سۈرەتكە ئېلىندى. بۇ قېتىملىق سەنئەت كېچىلىكىدىكى نومۇرلار خېلىلا يۇقىرى سەۋىيەدە ئورۇندالغان بولۇپ، ساھىبجامال دۆلەت، زەپەر ئابلىز قاتارلىق پەخىرلىك ئالىملىرىمىزنىڭ ئىش – ئىزلىرىنى تونۇشتۇرغان قىسقا فىلىممۇ كىرىشتۈرلۈپتۇ. كېچىلىكتىكى بىرىنىچى ئېتوت ھېسام ئاكا توغرىسىدا ئىشلەنگەن بولۇپ، سىنارىيەسىنى ياش يازغۇچى ئەكبەر ئەخمەتجان سابىرى يېزىپتۇ. ئەكرەم سېتىۋالدى، پەرھات «باجى»، ئۈمىد غەنى قاتارلىقلار ئورۇنلاشقا قاتنىشىپ، كۆرگۈچىلەرنىڭ يۈرەك تارىنى تىتىرەتكۈدەك ئاجايىپ تەسىرلىك مەزمۇن ئىپادىلىنىپتۇ. ئىككىنچى ئېتىتوتتا ھېيىت – بايرامدا ئاتا – ئانىنى يوقلاش مەزمۇن قىلىنغان بولۇپ، مەندە ئانچە چۇڭقۇر تەسىر قالدۇرالمىدى. ئۈچىنچى ئېتوتنىڭ سىنارىيەسىنى جۈرئەت ۋاھىت يازغان بولۇپ، بۇ ئېتوتتا ھازىرقى قاتناش قىستاڭلىقى كۆرۈلۈشنىڭ سەۋەبى مەزمۇن قىلىنغان ئىكەن، بۇ ئېتوتقا رېھىم قان، ئابدۇكېرىم ئابلىمىت قاتارلىقلار رولغا چىققان بولۇپ، ئورۇندىلىشى ئىنتايىن قىزىقارلىق، مەزمۇنى تولىمۇ ئىبرەتلىك ئىكەن. كېچىكتە ئابدۇللا ئابدۇرېھىم، شىرئەلى ئەلتېكىن، مەۋلان مەمتىمىن قاتارلىق ناخشىچىلارنىڭ ناخشىسى، كوللىكتىپ ئۇسۇل ۋە سېرىك قاتارلىق نومۇر شەكىللىرى ئۆزگىچە شەكىلدە ئورۇندىلىپتۇ. بۇ كېچىلىك قۇربان ھېيىتنىڭ ھارپىسىدىن باشلاپ تاماشىبىنلار بىلەن يۈز كۆرۈشىدىكەن.
«ھېسام ئاكا» ناملىق ئېتوتنىڭ سىنارىيە يازغۇچىسى ئەكبەر ئەخمەتجان سابىرى، بۇ ئېتوتنىڭ ئورۇندىغۇچىلىرى بىلەن بىللە.
