ئۆز مۇخبىرىمىز توخنىياز ئىسمائىل خەۋىرى: 30-يانۋار، ھەممەيلەننىڭ دىققىتىنى تارتقان 13-نۆۋەتلىك مەملىكەتلىك قىشلىق تەنھەرىكەت مۇسابىقىسى غەلىبىلىك ئاياغلاشتى. چۈشتە، ئۈرۈمچى شەھىرى جەنۇبىي شەھەر ئەتراپىدىكى ‹‹يىپەك يولى›› خەلقئارا قار تېيىلىش مەيدانىدا، پۈتۈن مەملىكەتنىڭ ھەرقايسى جايلىرىدىن كەلگەن تەنھەرىكەتچىلەر، ترېنېرلار ۋە ئەزىز مېھمانلار ئىناق، شادىمان كەيپىياتتا، 13-نۆۋەتلىك قىشلىق تەنھەرىكەت مۇسابىقىسىنىڭ غەلىبىلىك ئاياغلاشقانلىقىنى تەبرىكلىدى.
13-نۆۋەتلىك مەملىكەتلىك قىشلىق تەنھەرىكەت مۇسابىقىسى تەشكىلىي كومىتېتىنىڭ ئىجرائىيە مۇدىرى، ئاپتونوم رايوننىڭ رەئىسى شۆھرەت زاكىر يېپىلىش مۇراسىمىدا تەبرىك سۆزى قىلدى.
13-نۆۋەتلىك مەملىكەتلىك قىشلىق تەنھەرىكەت مۇسابىقىسى تەشكىلىي كومىتېتىنىڭ مۇدىرى، دۆلەتلىك تەنتەربىيە باش ئىدارىسىنىڭ باشلىقى ليۇ پېڭ يېپىلىش مۇراسىمىدا تەبرىك سۆزى قىلدى ھەمدە 13-نۆۋەتلىك مەملىكەتلىك قىشلىق تەنھەرىكەت مۇسابىقىسىنىڭ ئاياغلاشقانلىقىنى جاكارلىدى.
14-نۆۋەتلىك مەملىكەتلىك قىشلىق تەنھەرىكەت مۇسابىقىسى 2020-يىلى ئىچكى موڭغۇلدا ئۆتكۈزۈلىدۇ. يېپىلىش مۇراسىمىدا، ئىچكى موڭغۇل ئاپتونوم رايونىنىڭ مۇئاۋىن رەئىسى ليۇ شىنلې مەملىكەتلىك قىشلىق تەنھەرىكەت مۇسابىقىسىنىڭ بايرىقىنى تاپشۇرۇۋالدى.
13-نۆۋەتلىك مەملىكەتلىك قىشلىق تەنھەرىكەت مۇسابىقىسى تەشكىلىي كومىتېتىنىڭ مۇئاۋىن مۇدىرى، ئاپتونوم رايونلۇق پارتكوم دائىمىي كومىتېتىنىڭ ئەزاسى، ئاپتونوم رايوننىڭ دائىمىي مۇئاۋىن رەئىسى خۇاڭ ۋېي يېپىلىش مۇراسىمىغا رىياسەتچىلىك قىلدى.
13-نۆۋەتلىك مەملىكەتلىك قىشلىق تەنھەرىكەت مۇسابىقىسى تەشكىلىي كومىتېتىنىڭ مۇئاۋىن مۇدىرى، دۆلەتلىك تەنتەربىيە باش ئىدارىسىنىڭ باشلىقىنىڭ ياردەمچىسى گاۋ جىدەن، 13-نۆۋەتلىك مەملىكەتلىك قىشلىق تەنھەرىكەت مۇسابىقىسى تەشكىلىي كومىتېتىنىڭ مۇئاۋىن مۇدىرى، ئاپتونوم رايونلۇق پارتكوم دائىمىي كومىتېتىنىڭ ئەزاسى، تەشۋىقات بۆلۈمىنىڭ باشلىقى لى شۆجۈن ئايرىم-ئايرىم ھالدا ‹‹تەنتەربىيە ئەخلاق ئىستىل مۇكاپاتى››، ‹‹مۇسابىقىگە قاتنىشىش خاتىرە مۇكاپاتى›› ۋە مۇنەۋۋەر پىدائىيلار، پىدائىيلار خىزمىتىدىكى ئىلغا كوللېكتىپ، ئىلغار شەخسلەرنى تەقدىرلەش توغرىسىدىكى قارارنى ئوقۇدى.
دۆلەتلىك تەنتەربىيە باش ئىدارىسى ۋە ئالاقىدار رەھبەرلەردىن ياڭ شۇئەن، زو شياۋپىڭ، لى يىڭچۈەن، ئاپتونوم رايون ۋە شىنجاڭ ئىشلەپچىقىرىش-قۇرۇلۇش بىڭتۇەنى رەھبەرلىرىدىن جۇ خەيلۈن، ليۇ شىنچى، جۇ چاڭجيې، تيەن ۋېن قاتارلىقلار يېپىلىش مۇراسىمىغا قاتناشتى.
