جەمئىي بەش ئالتۇن مېدال، ئۈچ كۈمۈش مېدال، بەش مىس مېدال ئالدى
سادىق ئىمىر خەۋەر قىلىدۇ: مەملىكەتلىك 13 – نۆۋەتلىك قىشلىق تەنھەرىكەت مۇسابىقىسىنىڭ تېز كانكى تېيىلىش مۇسابىقىسى تۆت كۈن داۋاملىشىپ، 1 – ئاينىڭ 25 – كۈنى ئاخىرلاشتى، ئاپتونوم رايونىمىز ماھىرلىرى بۇ تۈردە جەمئىي بەش ئالتۇن مېدال، ئۈچ كۈمۈش مېدال، بەش مىس مېدالغا ئېرىشتى.
1 – ئاينىڭ 25 – كۈنى ئەرلەر ۋە ئاياللارنىڭ 1000 مېتىرغا، ئەرلەرنىڭ 10 مىڭ مېتىرغا، ئاياللارنىڭ 5000 مېتىرغا تېز كانكى تېيىلىش مۇسابىقىسى ئۆتكۈزۈلدى. سانجى كوماندىسىدىن گو جىۋېن ئەرلەرنىڭ 10 مىڭ مېتىرغا تېز كانكى تېيىلىش مۇسابىقىسىدە كۈمۈش مېدالغا، ئۈرۈمچى كوماندىسىدىن جۇ جيافەن مىس مېدالغا ئېرىشتى. ئۈرۈمچى كوماندىسىدىن ليۇ يىچى ئاياللارنىڭ 5000 مېتىرغا تېز كانكى تېيىلىش مۇسابىقىسىدە مىس مېدالغا ئېرىشتى.
تىلغا ئېلىشقا ئەرزىيدىغىنى شۇكى، خاربىن كوماندىسىدىن جاڭ خۇڭ بىلەن ليۇ يىمىڭ تېز كانكى تېيىلىش مۇسابىقىسىدىكى ئەڭ مول ھوسۇللۇق ماھىرلاردىن بولۇپ، ھىر بىرى ئۈچتىن ئالتۇن مېدال ئالدى.
بۇ نۆۋەتلىك قىشلىق تەنھەرىكەت مۇسابىقىسىنىڭ تېز كانكى تېيىلىش تۈرىدە 18 ئالتۇن مېدال تارقىتىلغان بولۇپ، قىسقا يولدا تېز كانكى تېيىلىش مۇسابىقىسىنىڭكىگە ئوخشاش ئالتۇن مېدال ئەڭ كۆپ تەسىس قىلىنغان تۈردۇر.
دۆلەت تەنھەرىكەت باش ئىدارىسى قىشلىق تەنھەرىكەت تۈرلىرىنى باشقۇرۇش مەركىزى تېز كانكى تېيىلىش بۆلۈمىنىڭ باشلىقى جياڭ شىسەينىڭ تونۇشتۇرۇشىچە، بۇ نۆۋەتلىك قىشلىق تەنھەرىكەت مۇسابىقىسىگە جەمئىي 52 ۋەكىللەر ئۆمىكى قاتناشقان بولۇپ، ئۇلاردىن 41 ۋەكىللەر ئۆمىكى تېز كانكى تېيىلىش مۇسابىقىسىگە قاتناشتى، ھەتتا بەزى ئۆمەكلەر خاس تېز كانكى تېيىلىش مۇسابىقىسىگىلا قاتنىشىشقا تىزىملاتتى. بۇنىڭدىن تېز كانكى تېيىلىش مۇسابىقىسىدىكى رىقابەتنىڭ قانچىلىك كەسكىن بولغانلىقىنى، شۇنداقلا تېز كانكى تېيىلىش تۈرىنىڭ ئېلىمىز قار – مۇز تەنھەرىكىتىدە قانچىلىك مۇھىم ئورۇندا تۇرىدىغانلىقىنى كۆرۈۋالغىلى بولىدۇ.
ئاپتونوم رايونىمىز كوماندىلىرى تېز كانكى تېيىلىش مۇسابىقىسىدە كارامىتىنى كۆرسىتىپ، جەمئىي بەش ئالتۇن مېدال، ئۈچ كۈمۈش مېدال، بەش مىس مېدال ئېلىشتەك زور نەتىجە بىلەن مەملىكەتنىڭ تېز كانكى تېيىلىش ساھەسىدە مۇھىم ئورۇنغا ئېرىشتى. شۇنىڭ بىلەن بىللە، رەقىمباي تالابقان، جۇ جيافەن، دەستۇر تۇرسۇنخان ئەرلەرنىڭ تېز كانكى تېيىلىش تۈرىنىڭ 500 مېتىرغا كوللېكتىپ قوغلىشىش مۇسابىقىسىدە چېمپىيون بولدى، بۇ، تېز كانكى تېيىلىش تۈرىدىكى قىممىتى ئەك يۇقىرى ئالتۇن مېدال بولۇپ، بۇ ئارقىلىق مەملىكىتىمىزگە ئاپتونوم رايونىمىزنىڭ تېز كانكى تېيىلىش تۈرىدىكى ئەمەلىي كۈچى نامايان قىلىندى.
ئەسلى مەنبە: http://uy.ts.cn/13dong/2016-01/26/content_493182.htm
