«كاتتا مۇسابىقىنىڭ ئاپتونوم رايونىمىزدا ئۆتكۈزۈلگەنلىكىدىن پەخىرلەندىم»

خالىدە ئوبۇل

    يەكەن ناھىيەسىدىن كەلگەن مۇھەممەتتۇرسۇن سادىق 25 – يانۋار ئەتىگەندىلا خوتۇنى بىلەن ئاپتونوم رايونلۇق مۇز ئۈستى تەنھەرىكەت مەركىزىگە كەلدى، 24 – يانۋار ئۇ تېز مۇز تېيىلىش تۈرىنىڭ 500 مېتىرغا كوللېكتىپ قوغلىشىش مۇسابىقىسىدە ئۈرۈمچى ئەرلەر كوماندىسىنىڭ ئالتۇن مېدالغا، ئاياللار كوماندىسىنىڭ كۈمۈش مېدالغا ئېرىشكەنلىكىنى ئۆز كۆزى بىلەن كۆرۈپ ئىنتايىن شادلانغان ئىدى.

    ئۇ ھاياجانلانغان ھالدا مۇنداق دېدى: بۈگۈنمۇ شىنجاڭلىق تەنھەرىكەتچىلەرنىڭ كارامىتىنى كۆرەي، دەپ كەلدىم. مۇسابىقىلەرنى 21 – يانۋاردىن باشلاپ ئۇدا كۆرۈۋاتىمەن. ئاياللار مۇز توپ مۇسابىقىسىدە ئۈرۈمچى كوماندىسى كۈمۈش مېدالغا ئېرىشتى، بۇمۇ كىشىنى خۇشاللاندۇرىدىغان ياخشى نەتىجە. باشقا مۇسابىقە مەيدانلىرىدىمۇ ئاپتونوم رايونىمىز ماھىرلىرىنىڭ ئۇدا مېدال ئېلىۋاتقانلىقىنى ئاڭلاپ تۇردۇم. تەنھەرىكەتچىلىرىمىزنىڭ تېخىمۇ ياخشى نەتىجىلەرنى قولغا كەلتۈرۈشىگە تىلەكداشمەن!

    مۇھەممەتتۇرسۇن سادىق بىر ھەپتە بۇرۇن خوتۇنى بىلەن سەنيادىكى ساياھىتىنى ئاخىرلاشتۇرغاندىن كېيىن ئۆيىگە كەتمەي، ئۈرۈمچىدە مۇسابىقە كۆرۈش ئۈچۈن قېپقالغانىدى. مۇھەممەتتۇرسۇن سادىق پېنسىيەگە چىقىشتىن بۇرۇن يەكەن ناھىيەلىك مەدەنىيەت – تەنتەربىيە ئىدارىسىنىڭ مۇئاۋىن باشلىقى بولۇپ، 34 يىل تەنتەربىيە خىزمىتى بىلەن شۇغۇللانغانىدى.

    شىنجاڭدا تۇنجى قېتىم ئۆتكۈزۈلگەن بۇ كاتتا مەرىكىگە كەلمىگەن بولسام ئارماندا قالاتتىم. مۇسابىقە مەيدانلىرىدا دۇنيا چېمپىيونلىرىنى كۆرۈپ بەكمۇ ھاياجانلاندىم. بۇ مېنىڭ تۇنجى قېتىم نەق مەيداندا ئولتۇرۇپ، مۇز ئۈستى تەنھەرىكەت مۇسابىقىسىنى كۆرۈشۈم. مەملىكەتلىك قىشلىق تەنھەرىكەت مۇسابىقىسىنىڭ تۇنجى قېتىم دىيارىمىزدا ئۆتكۈزۈلۈشى ئاپتونوم رايونىمىزنىڭ يېقىنقى يىللاردىن بۇيان ھەرقايسى ساھەلەردە يۈكسىلىۋاتقانلىقىدىن دېرەك بېرىدۇ. ئېچىلىش مۇراسىمىنىڭ تەشۋىقات فىلىمىدىن يۇرتىمىزدىكى ئالەمشۇمۇل ئۆزگىرىشلەرنى كۆرۈپ شىنجاڭلىق بولغانلىقىمدىن چەكسىز پەخىرلەندىم، دېدى ئۇ.

    مۇھەممەتتۇرسۇن سادىقنىڭ سۆزلىرىدىن ئۇنىڭ ئېچىلىش مۇراسىمىدىكى ھاياجانلىق مىنۇتلارنى تېخىچە ئەستىن چىقارمىغانلىقىنى كۆرۈۋالغىلى بولاتتى.

    26 – يانۋاردىن باشلاپ فىگۇرا چىقىرىپ مۇز تېيىلىش مۇسابىقىسى باشلىنىدىكەن، بۇمۇ مەن ئەڭ ياقتۇرۇپ كۆرىدىغان مۇسابىقە تۈرى. مەن يۇرتداشلىرىمنىڭ مۇسابىقىنى كۆرۈش پۇرسىتىنى قولدىن بەرمەسلىكىنى، ئومۇمىي خەلق بەدەن چېنىقتۇرۇش پائالىيىتىگە ئاكتىپ ئاۋاز قوشۇشىنى، ئاپتونوم رايونىمىزدىن مەملىكەتكە، دۇنياغا تونۇلغان تېخىمۇ كۆپ مۇنەۋۋەر تەنھەرىكەتچىلەرنىڭ يېتىشىپ چىقىشىنى ئۈمىد قىلىمەن.

ئەسلى مەنبە: http://uy.ts.cn/13dong/2016-01/26/content_493188.htm