ئاسىيا كىندىكى تورى يېقىندا كەسىپ ئەھلىلىرىنىڭ شىنجاڭ مىللىي تېبابەت دورىگەرلىكىنىڭ تەرەققىياتىغا بولغان ئانالىزىنى ئېلان قىلغان بولۇپ، بۇنىڭدا ھازىر شىنجاڭنىڭ مىللىي تېبابەت دورىگەرلىك تەرەققىياتىدىكى ھەل قىلىشقا تېگىشلىك 3 مەسىلە يىغىنچاقلاپ چىقىلغان.
1.مىللىي تېبابەت دورىلىرىنى ئۆلچەملەشتۈرۈش سىستېمىسىنىڭ قۇرۇلۇشىنى تېزلىتىش كېرەك.
شىنجاڭ ئۇيغۇر ئاپتونوم رايونلۇق ئۇيغۇر تېبابەت دورىگەرلىك تەتقىقات ئىدارىسىنىڭ باشلىقى ئىسراپىل ئەبەينىڭ تونۇشتۇرۇشىچە، يېقىنقى بىر نەچچە يىلدا ئاپتونوم رايون، ۋىلايەت، ناھىيە ئۈچ دەرىجىلىك مىللىي تېبابەت دوختۇرخانىلىرىنىڭ قاتتىق دېتال شارائىتى ئاساسىي جەھەتتىن تەلەپكە يېتىپ بولغان بولۇپ، داۋالاش ئۇسۇلى، داۋالاش تېخنىكىسى ۋە ياسالغان دورىلىرىنىڭ كىلىنىكىلىق داۋالاش ئۈنۈمى كۆرۈنەرلىك بولغان. لېكىن بۇ دوختۇرخانىلارنىڭ ئۆلچەملەشكەن داۋالاشتىكى ھالقىلىق تېخنىكىسىغا نىسبەتەن ئىلمىي تەتقىقات ئېلىپ بېرىلمىغاچقا، داۋالىنىش سۇغۇرتىسى، ئىجتىمائىي سۇغۇرتا، سودا سۇغۇرتىسى قاتارلىق 3-تەرەپنىڭ ئېتىراپ قىلىشىغا ئېرىشەلمەي تەرەققىياتى توسالغۇغا ئۇچرىغان.
2.مىللىي تېبابەت دورىگەرلىكىنى كەسىپلەشتۈرۈش قۇرۇلۇشى تەرتىپكە سېلىش ۋە يېڭىلىق يارىتىشقا موھتاج.
ھازىرغا قەدەر شىنجاڭ مىللىي تېبابەت دورىلىرى تۈر ۋە سان جەھەتتە مەملىكىتىمىزنىڭ ئوتتۇرىچە سەۋىيەسىدىن خېلىلا تۆۋەن بولۇپ، ئىستاتىستىكىغا ئاساسلانغاندا بازارغا سېلىنغان ئۇيغۇر تېبابەت دورىلىرىنىڭ تۈر سانى بازاردىكى تىبەت دورىلىرى بىلەن موڭغۇل دورىلىرىنىڭ ئايرىم-ئايرىم ھالدا %24 ۋە %40 كە توغرا كېلىدىكەن. بۇنىڭدىن باشقا شىنجاڭدىكى مىللىي تېبابەت دورىلىرىنى ئىشلەپچىقارغۇچى كارخانىلاردا كۆلىمى كىچىك بولۇش، تەتقىق قىلىش ئىقتىدارى كەمچىل بولۇش، سېتىش ئۇسۇلى ئارقىدا قېلىش، مەھسۇلاتنىڭ تونۇلۇش نىسبىتى تۆۋەن بولۇش قاتارلىق مەسىلىلەر ئومۇميۈزلۈك مەۋجۇت ئىكەن.
3.ئىختىساسلىق خادىملارنى تەربىيەلەشنى كۈچەيتىش كېرەك.
ئاپتونوم رايونلۇق دورا تەتقىقات ئىدارىسىنىڭ باشلىقى گۇ جېڭيى (顾正一) نىڭ قارىشىچە، ھازىر ئاپتونوم رايونىمىزدا ئۇيغۇر تېبابەت نەزەرىيەسىنى پىششىق بىلىش بىلەن بىرگە ھازىرقى زامان تېبابەت نەزەرىيەسىنىمۇ پۇختا ئىگىلىگەن كەسپىي خادىملار ئومۇميۈزلۈك كەمچىل بولۇپ، ئۇيغۇر تېبابەت نەزەرىيەسىگە بولغان تەتقىقات، قېزىش، رەتلەش، قوغداش باسقۇچىدىلا توختاپ قالغان. بۇنىڭ بىلەن ئۇيغۇر تېبابەت دورىلىرىغا بولغان ئاساسىي تەتقىقات خىزمىتىنى ئىلگىرى سۈرۈش تەس بولغان.
