سۆگەت ھەممىمىزگە تونۇشلۇق، تىبابەتچىلىكتە ئۇنىڭ يىلتىزىدىن تارتىپ تاكى مېۋىسىگىچە قىممەتلىك دورا ماتېرىيالى قىلىنىدۇ.
سۆگەت شېخى: كىچىك تەرەتنى راۋانلاشتۇرۇپ، ئاغرىق توختىتىدۇ. ئىششىقنى ياندۇرۇپ، سىفلىس قاتارلىق جىنسىي كېسەللىكلەرگە ، يۇقۇملۇق جىگەر ياللۇغى، ئاستا خاراكتېرلىك كاناي ياللۇغى قاتارلىقلارغا شىپا بولىدۇ. كېسەللىكلەرنى داۋالاشتا، 120 گىرام سۆگەت شېخىنى مۇۋاپىق مىقداردىكى سۇدا قاينىتىپ، كۈندە بىر قېتىمدىن ئون كۈننى بىر داۋالاش باسقۇچى قىلىپ ئىستىمال قىلسا بولىدۇ. سۆگەت شېخىنى يەنە شېكەر سېلىپ قاينىتىپ، قىيام قىلىپ ئىچىپ بەرگەندە، ئارتېرىيە قېتىشىش خاراكتىرلىك يۈرەك كېسەللىكىگە شىپا بولىدۇ.
سۆگەت يوپۇرمىقى: سۆگەت يوپۇرمىقىنى مۇۋاپىق مىقداردىكى سۇدا قاينىتىپ ئىستىمال قىلغاندا، چېچەكنىڭ سىرتقا تېپىشىگە ياردىمى بولىدۇ، سىفلىس، چىش ئاغرىقى، سۈت بېزى ياللۇغى قاتارلىقلارغىمۇ شىپا قىلىدۇ. ئۇنىڭدىن باشقا سۆگەت يوپۇرمىقىدىن مەلھەم ياساپ كۆيگەن ئورۇنغا سۈرۈپ بەرسە، ئۈنۈمى كۆرۈنەرلىك بولىدۇ. سۆگەتنىڭ يۇمران يوپۇرمىقىدىن پايدىلىنىپ بوغۇز ئىشىقىنىڭ ئالدىنى ئالغىلى ۋە داۋالىغىلى بولىدۇ.
سۆگەت قوۋزىقى: ئىششىقنى ياندۇرۇپ، ئاغرىق توختىتىدۇ. قاينىتىپ سۈيىنى ئىچسە، سېرىقلىق كېسىلى ۋە تۈرلۈك جاھىل خاراكتېرلىك جىسىي كېسەللىكلەرگە داۋا بولىدۇ. قوۋزىقىنى كۆيدۈرۈپ، كۈلىنى كۈيۈك ئورنىغا چېپىپ بەرسە، تېز مەنپەئەت قىلىدۇ.
سۆگەت گۈلى: سۆگەت گۈلىنى ئېزىپ سۈيىنى چىقىرىپ ھەسەل بىلەن ئارىلاشتۇرۇپ ئىستىمال قىلغاندا، سېرىق كېسەلگە شىپا بولىدۇ. سۆگەت گۈلىنى ئېزىپ ئالتە گىرامدىن ئىستىمال قىلغاندا، قان تۈكۈرۈش، قانلىق تەرەت، ھەيىز توختاپ قېلىش قاتارلىقلارغا شىپا قىلىدۇ.
سۆگەت يىلتىزى: سۇلۇق ئىششىق، سىفلىس، سېرىق كېسەلگە، رېماتىزىم ۋە تۈرلۈك كۆيۈكلەرنى داۋالشتىكى ياخشى دورا.
سۆگەت مېۋىسى: قان سەپرا، تېرىنىڭ تۈرلۈك زەخمە سەۋەبلىك قانىشىغا، رېماتىزىم خاراكتېرلىك تىز ئاغرىقىغا شىپا قىلىدۇ.


شىنجاڭ قانۇنچىلىق گېزىتى