جاھان ئاگېنتلىقى 25-مارت خەۋىرى؛ لەگلەك تورى تەرجىمىسى: سۇرىيە ئۆكتىچى ۋە ئىنقىلابچى كۈچلەر ئىتتىپاقى، بىرلەشكەن دۆلەتلەر تەشكىلاتى خەۋىپسىزلىك كېڭىشىدىن سۇرىيەدە ئۇچۇش چەكلەنگەن رايۇن قۇرۇش ۋە دۆلەتتىكى ۋەزىيەتنى خەلقئارا سوت مەھكىمىسىگە يوللاشنى تەلەپ قىلدى.
سۇرىيە ئۆكتىچىلەر ۋە ئىنقىلابچى كۈچلەر ئىتتىپاقى ، بىرلەشكەن دۆلەتلەر ئالاھىدە ۋەكىلى نەجىب غەدبىيان، تۈنۈگۈن ب د ت خەۋىپسىزلىك كېڭىشىدە ئېچىلىدىغان سۇرىيە يىغىنىدىن بۇرۇن كىڭەش مەمۇرىيتىگە ئىلتىماس مەكتۇبىنى ئەۋەتىپ بىر قانچە تەلەپلەرنى سۇندى.
غەدبىيان، سۇرىيە ھۆكۈمىتىنىڭ، ب د ت خەۋىپسىزلىك كېڭىشىنىڭ پۇقرالارنى قوغداش ۋە ئىنسانىي ياردەم يەتكۈزۈش قارارىغا رىئايە قىلمىغانلىقىنى، ۋارىل بومبىسى بىلەن پۇقرالارغا قارىتا خىمىيلىك قۇرال ھۇجۇملىرىنى داۋاملاشتۇرىۋاتقانلىقىنى تىلغا ئېلىپ، يۇقارقىلارنىڭ چەكلىنىشى ئۈچۈن ب د ت خەۋىپسىزلىك كېڭىشىنىڭ سۇرىيەنىڭ مەلۇم رايۇنىدا ئۇچۇش چەكلەنگەن رايۇن قۇرۇش قارارى چىقىرىشىنى تەلەپ قىلدى.
غەدبىيان، ئۇچۇش چەكلەنگەن رايۇن قۇرۇلۇپ ئىجرا قىلىنغان ئەھۋالدا پۇقرالارنىڭ ئۆلۈم-يىتىم ئەھۋالىنىڭ كەم دىگەندە يۈزدە 30% تۆۋەنلەيدىغانلىقى ۋە ئىنسانىي ياردەم يەتكۈزۈشنىڭ كاپالەتكە ئىگە بولىدىغانلىقىنى تەكىتلەپ، بۇ ئەھۋال سۇرىيەگە قوشنا دۆلەتلەرگە كۆچۈپ كەتكەن سۇرىيەلىكلەرنىڭ قايتىپ كېلىشىگە ئىمكانىيەت يارىتىدۇ. دېدى.
غەدبىيان، سۇرىيەدە ئەسەد تەرىپىدىن قورشاۋغا ئېلىنغان رايۇنلارنىڭ ئەھۋالىنىڭ بارغانسېرى ناچارلىشىۋاتقانلىقىنى، ۋە بۇ رايۇنلاردا ياشىۋاتقان 640 مىڭ كىشىگە ياردەم يەتكۈزۈلۈشىنىڭ توسقۇنلۇققا ئۇچراۋاتقانلىقىنى ئېيتىپ، دۆلەتتىكى ئۇرۇش جىنايەتلىرىنىڭ خەلقئارا سوت مەھكىمىسىگە سۇنۇلىشىنى تەلەپ قىلىدىغانلىقىنى بىلدۈردى. ئۇ يەنە، سۇرىيەدىكى ئىنسانىي كىرزىس ھەققىدە مەلۇمات بېرىپ، خەلقئارا جەمئىيەتنىڭ بولۇپمۇ ب د ت خەۋىپسىزلىك كېڭىشىگە ئەزا دۆلەتلەرنىڭ كۇۋەيتتە ئېچىلىدىغان ياردەم يىغىنىدا ب د ت تەرەپ نىشان قىلغان 8.4 مىليارد دوللارنىڭ كاپالەتكە ئېرىشىشى ئۈچۈن كۆپراق قوللاش كىرەكلىكىنى ئېيتتى.
سۇرىيە ئۆكتىچىلىرى ۋە ئىنقىلابچى كۈچلەر ئىتتىپاقى، ئۆتكەن ھەپتە ئىدلىب رايۇنى ئەتراپىدا سۇرىيە ھۆكۈمىتىنىڭ «كلور گېزى»ئىشلەتكەنلىكىنى تەكىتلەپ، ب د ت خەۋىپسىزلىك كېڭىشىدىن بۇ ھەقتە تەدبىر قوللىنىشىنى تەلەپ قىلدى. ب د ت خەۋىپسىزلىك كېڭىشىدە سۇرىيەدىكى ئۇرۇش جىنايەتلىرىنىڭ خەلقئارا سوت مەھكىمىسىگە سۇنۇلىشى ھەققىدىكى قارار لايىھەسىنى روسىيە ۋە جۇڭگو رەت قىلغان ئىدى. يېڭى لايىھە سۇنۇلغان ئەھۋالدا بۇ دۆلەتلەرنىڭ يەنە رەت قىلىش ھۇقۇقىنى ئىشلىتىشى كۈتۈلمەكتە.