جۇڭگو ئاخبارات تورى، 16-مارت تېلېگراممىسى: چەت ئەل تاراتقۇلىرىنىڭ خەۋىرىگە قارىغاندا، يېقىندا ۋېيتنامنىڭ خۇجىمىڭ شەھىرىدە لەگلەك ئۇچۇرۇش سەۋەبلىك ئادەم قازا قىلىش ۋەقەسى يۈز بەرگەن. بىر چوڭ لەگلەك ئاسماندا ئۇچۇرلۇۋاتقاندا ئۇنىڭ يىپى بەش ياشلىق بىر ئوغۇل بالىغا يۆگىشىپ قېلىپ، بۇ بالا لەگلەك بىلەن تەڭلا ئاسمانغا چىقىپ كەتكەن، ئاخىرىدا يەرگە چۈشۈپ كېتىپ قازا قىلغان.
خەۋەرگە قارىغاندا، بۇ ۋەقە شۇ يەر ۋاقتى 15-مارت چۈشتىن كېيىن يۈز بەرگەن. بۇ بالىنى ئاسماندىن چۈشۈرۈۋەتكەن لەگلەكنىڭ كەڭلىكى 18 مېتىر بولۇپ، شۇ يەردىكى بىر لەگلەك جەمئىيىتىگە تەۋە ئىكەن.ۋەقە يۈز بەرگەن ۋاقىتتا ئالاقىدار كىشىلەر بۇ لەگلەكنى سىناق قىلىپ ئۇچۇرتماقچى بولغان، دەل شۇ چاغدا بۇ بالا ئۇلارغا يېقىنلاپ كەلگەن، خىزمەتچى خادىملار ئەينى ۋاقىتتا پۈتۈن زېھنى بىلەن لەگلەك ئۇچۇرۇش بىلەن بولۇپ كېتىپ، بۇ بالىنىڭ يېقىن كېلىپ قالغانلىقىغا دىققەت قىلمىغان، نەتىجىدە، لەگلەكنىڭ يىپى بۇ بالىغا يۆگىشىپ قېلىپ، بۇ بالىنى كۆككە ئېلىپ چىقىپ كەتكەن.
لەگلەك بالىنى 20 مېتىر ئېگىزلىككە ئېلىپ چىققاندىن كېيىن، بالا يەرگە چۈشۈپ كەتكەن، بالا دوختۇرخانىغا ئېلىپ بېرىلىپ جىددىي قۇتقۇزۇلغان بولسىمۇ قۇتقۇزۇش ئۈنۈم بەرمەي قازا قىلغان.
نۆۋەتتە، ۋېيتنام دائىرىلىرى بۇ ۋەقەنى تەكشۈرۈۋېتىپتۇ.