تەڭرىتاغ مۇخبىرىنىڭ جىڭ ناھىيەسىدىن ئەۋەتكەن خەۋىرى : جۇڭگو شىنجاڭ 9- نۆۋەتلىك سايرام كۆلىنى ئايلىنىش تاشيول ۋېلىسىپىت مۇسابىقىسى ( قىسقارتىپ سايرام كۆلىنى ئايلىنىش مۇسابىقىسى دەپ ئېلىندى ) 27- ماي كەچقۇرۇن شىنجاڭ جىڭ ناھىيەسىدە باشلاندى. ئاپتونوم رايونلۇق تەنتەربىيە ئىدارىسىنىڭ باشلىقى زۇنۇن قېيۇم مۇنداق دېدى: بورتالا ئوبلاستى توققۇز يىلدىن بۇيان ئىزچىل تۈردە سايرام كۆلىنى ئايلىنىش مۇسابىقىسىنى ئۆتكۈزۈپ كېلىۋاتقان بولۇپ، بۇ مۇسابىقە دۆلەت ئىچى - سىرتىدا بىر قەدەر ياخشى ۋە بىر قەدەر زور تەسىرگە ئىگە يۇقىرى سەۋىيەدىكى ئىشتىن سىرتقى مۇسابىقە بولۇپ قالدى.
خۇبېي ئۆلكىلىك تەنتەربىيە ئىدارىسىنىڭ باشلىقى خۇ دېچۈن نەق مەيداندا جۇڭگو شىنجاڭ 9- نۆۋەتلىك سايرام كۆلىنى ئايلىنىش تاشيول ۋېلىسىپىت مۇسابىقىسىنىڭ باشلانغانلىقىنى جاكارلىدى.
ئىگىلىنىشىچە، 27 - ماي سائەت 17:30 گىچە، 9- نۆۋەتلىك سايرام كۆلىنى ئايلىنىش تاشيول ۋېلىسىپىت مۇسابىقىسىنىڭ تىزىملاش خىزمىتى پۈتۈنلەي ئاياغلاشقان بولۇپ، شىنجاڭنىڭ سىرتىدىكى كوماندىلاردىن 11 ى ، شىنجاڭ ئىچىدىكى كوماندىلاردىن 11 ى بولۇپ ، جەمئىي 126 نەپەر تەنھەرىكەتچى تىزىملاتقان، يېتەكچى ۋە ترېنېردىن 24 ى كەلگەن، بۇنىڭ ئىچىدە چەت ئەللىك تەنھەرىكەتچىدىن 12 سى بار بولۇپ، ئايرىم - ئايرىم ئەنگىلىيە، يېڭى زېلاندىيە، كانادا، ئامېرىكا، مالايشيا، قازاقىستان قاتارلىق دۆلەتلەردىن كەلگەن.
ئىگىلىنىشىچە، بۇ نۆۋەتلىك مۇسابىقە 28-مايدىن 5- ئىيۇنغىچە بەش كۈن داۋاملىشىدىغان بولۇپ، جىڭ ناھىيەسى، ئالاتاۋ شەھىرى، بورتالا شەھىرى، ئارشاڭ ناھىيەسى، سايرام كۆلى قاتارلىق جايلاردىن ئۆتىدىغان بولۇپ، مۇسابىقە ئومۇمىي مۇساپىسى جەمئىي 436 كىلومېتىر، بەش مۇسابىقە بۆلىكىگە بۆلۈنگەن . 1-بۆلەك جىڭ ناھىيەسىدىن ئالاتاۋ شەھىرىگىچە، مۇساپىسى 101.7 كىلومېتىر؛ 2- بۆلەك : ئالاتاۋ شەھىرىدىن بورتالا شەھىرىگىچە، مۇساپىسى 78.5 كىلومېتىر؛ 3-بۆلەك: بورتالا شەھىرىدىن ئارشاڭ ناھىيەسىگىچە، مۇساپىسى 91 كىلومېتىر؛ 4-بۆلەك: ئارشاڭ ناھىيەسىدىن سايرام كۆلىگىچە، مۇساپىسى 100 كىلومېتىر؛ 5-بۆلەك : بورتالا شەھىرىنى ئايلىنىش مۇسابىقىسى، مۇساپىسى 64.8 كىلومېتىر.
ئاپتونوم رايونلۇق تەنتەربىيە ئىدارىسىنىڭ باشلىقى زۇنۇن قېيۇم مۇنداق دېدى: جۇڭگو دۇنيادىكى ۋېلىسىپىت مىنىدىغانلار ئەڭ كۆپ دۆلەت، سايرام كۆلىنى ئايلىنىش تاشيول ۋېلىسىپىت مۇسابىقىسىنىڭ ئوڭۇشلۇق ئۆتكۈزۈلۈشى دۆلەت ئىچى ۋە سىرتىدىكى ۋېلىسىپىت ماھىرلىرىنىڭ ئۆز ئارا ئالاقىسىنى ئىلگىرى سۈرۈپلا قالماي يەنە، ۋېلىسىپىت تەنھەرىكىتىنىڭ ئاپتونوم رايونىمىزدا ئومۇملىشىشى ۋە تەرەققىياتىنى ئىلگىرى سۈرىدۇ. دۆلەت تەنتەربىيە باش ئىدارىسى، خۇبېي ئۆلكىسى، ئاپتونوم رايوندىكى مۇناسىۋەتلىك تارماقلارنىڭ كۆڭۈل قويۇپ يېتەكلىشى ئاستىدا، بورتالا ئوبلاستى ئومۇمىي خەلق بەدەن چېنىقتۇرۇشنى يولغا قويدى، بولۇپمۇ ۋېلىسىپىت تەنھەرىكىتىنى كەڭ قانات يايدۇرۇپ، خەلقنىڭ ساغلاملىق سەۋىيەسىنى كۆرۈنەرلىك يۇقىرى كۆتۈردى. سايرام كۆلى بورتالا ئوبلاستىدىكى نۇرغۇن ئۆزىگە خاس ساياھەتچىلىك مەنبەسى ئىچىدىكى ئەڭ يارقىن نۇقتا ، شۇنداقلا دۆلەت ئىچى ۋە سىرتىدىكى نۇرغۇن ۋېلىسىپىت ھەۋەسكارلىرىنىڭ بىر ئايلىنىپ چىقىشنى ئارزۇ قىلىدىغان « جەننىتى » .
جىڭ ناھىيەلىك پارتكومنىڭ مۇئاۋىن شۇجىسى، ھاكىم ئۆمەرجان لوقمان مۇنداق دېدى : جىڭ ناھىيەسى داڭلىق « ئالقات ماكانى» ، قەدىمدىن تارتىپ « يىپەك يولى » نىڭ شىمالىدىكى مۇھىم جاي. بىز ياشلىق ھاياتىي كۈچكە تولغان ۋېلىسىپىت ماھىرلىرىنىڭ مۇسابىقىدە ئۆز كۈچىنى نامايان قىلىپ، ئۆز ئۆزىدىن ھالقىپ، شانلىق نەتىجىلەرنى يارىتىشىنى ئۈمىد قىلىمىز.
بورتالا ئوبلاستى شىنجاڭنىڭ غەربىگە جايلاشقان، قازاقىستان بىلەن چېگرىلىنىدۇ، يىپەك يولىنىڭ شىمالىدىكى مۇھىم جاي، سايرام كۆلى دۆلەت ئېنىق بەلگىلىگەن نۇقتىلىق مەنزىرە داڭلىق رايونى ۋە شىنجاڭدىكى تۇنجى دۆلەتلىك سۇلۇ يەر باغچىسى ( سىناق نۇقتا ) بولۇپ، شىنجاڭدىكى دېڭىز يۈزىدىن ئەڭ ئېگىز، كۆلىمى ئەڭ چوڭ ئېگىز تاغ سوغۇق سۇ كۆلى ھېسابلىنىدۇ، نۆۋەتتە، بۇ ناھىيە دۆلەت 5A دەرىجىلىك ساياھەت مەنزىرە رايونى بەرپا قىلىش ئۈچۈن تىرىشماقتا.