رۇسىيە زۇڭتۇڭىنىڭ ئاخبارات كاتىپى پېرسكوۋ يېقىندا مۇنۇلارنى بىلدۈردى: رۇسىيە زۇڭتۇڭى پۇتتىن بىخەتەرلىك كومىتېتىنىڭ ئەزالىرى بىلەن ئۆتكۈزگەن يىغىندا ئۇكىرائىنانىڭ شەرقى قىسمنىڭ ۋەزىيىتىنى مۇزاكىرە قىلدى.

ئۇ مۇنداق دېدى: يېقىندا تىرىشىپ ياراشتۇرۇش ئەھۋالى ئاستىدا ئۇكىرائىنانىڭ شەرقىي جەنۇبىنىڭ ۋەزىيىتى تەپسىلىي مۇزاكىرە قىلىندى. يىغىنغا قاتناشقۇچىلار لۇگەنسېك ۋە دونىتسېك ئوبلاستىلىرىنىڭ ئىنسانپەرۋەرلىك ۋەزىيتىنىڭ جىددىيلىشىپ كېتىشىدىن ئىنتايىن ئەندىشە قىلدى. بۇنىڭدىن باشقا، رۇسىيەنىڭ دىپلوماتىيە مىنىستىرى راۋلوۋ 12- دېكابىر مۇنۇلارنى قايتا تەكىتلىدى: رۇسىيە ئۇكىرائىنا مەسىلىسى بويىچە ئالاقە گۇرۇپپىسى يىغىنىنىڭ تېزراق ئۆتكۈزىلىشىنى تىرىشىپ ئىلگىرى سۈرىدۇ.

رۇسىيە دىپلوماتىيە مىنىستىرلىقى تور بېكىتىنىڭ خەۋىرىگە قارىغاندا، راۋلوۋ شۇ كۈنى رۇسىيەنىڭ ئاممىۋى دىپلوماتىيە فوندى جەمئىيىتى پائالىيىتىنى قوللىغاندا مۇنداق دېگەن: نۆۋەتتىكى جىددىي ۋەزىپە يۇقارقى ئالاقە گۇرۇپپىسىنىڭ ھەرىكىتىنى ئەسلىگە كەلتۈرۈش يوللىرىنى تېپىش. يېقىنقى بىر نەچچە كۈندە ھەر قايسى تەرەپلەر ئالاقە گۇرۇپپا يىغىنى ئۆتكۈزۈشنى كېڭەشمەكتە، رۇسىيە يىغىننىڭ تېزراق ئۆتكۈزىلىشىنى پائال ئىلگىرى سۈرىدۇ.

راۋلوۋ مۇنداق دېدى: گەرچە جەريان مۈشكۈل بولسىمۇ، ئەمما ئۇكىرائىنادا توقۇنۇشىۋاتقان ئىككى تەرەپ ئۇرۇش توختىتىشنى ئىشقا ئاشۇرۇپ، ئۇرۇش تو‍ختىتىش مېخانىزىمىنى ئورناتتى. ئۇ مۇنۇلارنى تەكىتلىدى: ئىجادىي پوزىتسىيە بىلەن باشقا ئالاقىدار مەسىلىلەرنى ھەل قىلىش كېرەك. بۇ دونتسېك ئوبلاستى بىلەن لۇگەنسېك ئوبلاستىنىڭ ئىقتىسادىنى ئەسلىگە كەلتۈرۈش، ئۇكىرائىنانىڭ سىياسىي سۆزلىشىشى، ئۇكىرائىنادىكى ھەر قايسى رايون ۋە ھەر قايسى سىياسىي كۈچلەر قاتناشقان ئاساسىي قانۇن ئىسلاھاتىنى باشلاشنى ئۆز ئىچىگە ئالىدۇ.

باشقا خەۋەرگە قارىغاندا، ئاۋسترالىيەدە زىيارەتتە بولىۋاتقان ئۇكىرائىنا زۇڭتۇڭى پوروشىنكو 12-دېكابىر مۇنداق دېگەن: ئۆتكەن 24 سائەتتە ئۇكىرائىنا 7 ئايدىن بۇيانقى تۇنجى ئۇرۇشسىز بىر كۈننى كۈتۈۋالدى. بۇ خىل ئۇرۇشسىز ھالەتنىڭ ئىزچىل داۋاملىشىشىنى ئۈمىد قىلىمىز.

بۇ يىل 9-ئايىڭ 5-كۈنى ئۇكىرائىنا مەسىلىسى بويىچە ئۈچ تەرەپنىڭ ئالاقە گۇرۇپپىسى ئۇكىرائىنا، ياۋروپا بىخەتەرلىك تەشكىلاتى، رۇسىيە ئۇكىرائىنانىڭ شەرقى قىسمىدىكى ئەل ئىچى قۇراللىق كۈچلىرىنىڭ ۋەكىللىرى بىلەن مىنسكىيدا ئۇرۇش توختىتىش كېلىشىمى ئىمزالىدى. 9-ئاينىڭ 19-كۈنى، ئالاقە گۇرۇپپىسى ئۇكىرائىنانىڭ شەرقى قىسمىدىكى ئەل ئىچى قۇراللىق كۈچلىرىنىڭ ۋەكىللىرى بىلەن يەنە ئەسلەتمە ئىمزالاپ، توقۇنىشۋاتقان ئىككى تەرەپنىڭ ئۇرۇشىۋاتقان رايوندىن 15 كېلومېتىر يىراقلىققا چېكىنىپ، 30 كىلومېتىرلىق توقۇنۇشنى پەسەيتىش رايونى بەرپا قىلىشنى بەلگىلىدى. ئەمما ئىككى تەرەپنىڭ بىر بىرىگە ئىشەنچىسى كەمچىل بولغاچقا، ئۇرۇش توختىتىش كېلىشىمى بىلەن ئەسلەتمە بىردەك ئۈنۈملۈك ئەمەلىيلەشمىدى.