جاھان ئاگېنتلىقى 19-مارت خەۋىرى؛ لەگلەك تورى تەرجىمىسى: تۇنىس پرېزىدېنتى سىبسى، چەتئەللىك ساياھەتچىلەرنى ئۆز ئىچىگە ئالغان 20 نەپەر كىشى ئۆلتۈرۈلگەن مۇزىي ۋەقەسىدىن كېيىن تۇنىستىكى چوڭ شەھەرلەرنى تۇنىس ئارمىيسىنىڭ قوغدىشى ھەققىدە قارار چىقاردى.
پرېزىدېنت ئىشخانسىدىن ئېلان قىلىنغان باياناتتا، يۇقارقى قارارنىڭ تۇنىس ئارمىيسى دائىرلىرى بىلەن ئۆتكۈزۈلگەن يىغىندىن كېيىن ماقۇللانغانلىقى بىلدۈرۈلدى. بۇ جەرياندا مۇزىي ۋەقەسىگە ئالاقىدار دەپ قارالغان 4 گۇماندار قولغا ئېلىندى. تۇنىس پايتەختىدە تۈنۈگۈن مەجلىس بىناسىغا يېقىن جايدىكى بىر مۇزىي ھۇجۇمغا 19 پۇقرا ۋە بىر ساقچى ھاياتىدىن ئايرىلدى. ئىككى نەپەر ھۇجۇم قىلغۇچى قۇراللىق ئېتىپ ئۆلتۈرۈلدى. باش مىنىستىر ھەبىب سىد بۇ ھەرىكەتتىن كېيىن ئېلان قىلغان باياناتىدا، ھۇجۇم قىلغۇچىلارنىڭ مۇزىيغا ھەربىي فورما بىلەن كىرگەنلىكىنى ۋە ئۇلارنىڭ كىملىكىنىڭ تېخى ئېنىقلانمىغانلىقىنى بىلدۈردى.
تۇنىس باش مىنىستىرى تېرورغا قارشى كۈرەشنىڭ ئۇزۇن مەزگىللىك بىر كۈرەش ئىكەنلىكىنى تەكىتلەپ، بارلىق پارتىيە ۋە پۇقراۋى جەمئىيەتلەرنى بۇ مۇساپىدە تۇنىستا مۇقىملىقنىڭ كاپالەتكە ئېرىشىشى ئۈچۈن ھۆكۈمەتنى قوللىشىغا چاقىرىق قىلدى.
باش مىنىستىر سىد، ئۆتكۈنچى مەزگىلدە مۇھىم ئىلگىرلەشلەر بولغانلىقىنى ۋە بىر قانچە كىشىنىڭ تۇنىسنى ئۆز يولىدىن قايتۇرۇش ئۈچۈن پۇرسەتپەرەسلىك قىلىۋاتقانلىقىنى تىلغا ئېلىپ، خەلقتىن بىخەتەرلىك قىسىملىرىنىڭ يېنىدا تۇرۇشىنى تەلەپ قىلدى. ھەبىب سىد يەنە، ئارمىيە ۋە ساقچى قىسىملىرىنىڭ بارلىق ئىمكانىيتىنى چىقىرىشى كىرەكلىكىنى ئېيتتى.

تۇنىس نەھزە «ئويغىنىش» ھەرىكىتى رەھبىرى راشىد غەننۇشى، مۇزىي ۋەقەسىنى سادىر قىلغانلارغا خىتاب قىلىپ، «سىلەرنىڭ تېرورلۇق قىلمىشىڭلار تۇنىس خەلقىنىڭ ئاياق ئاستىدا قالىدۇ» دېدى. غەننۇشى ئېلان قىلغان باياناتىدا، 21 كىشىنىڭ ئۆلۈمىگە سەۋەب بولغان بۇ ۋەقەنى سادىر قىلغۇچىلارغا «كۈچىمىزنى ئ‍اجىزلاشتۇرالمايدۇ ۋە بىرلىكىمىزنى پارچىلىيالمايدۇ» دېدى. باياناتتا يەنە «بۇ ۋەقە تۇنىسنىڭ بىخەتەرلىكى ۋە مۇقىملىقىغا زىيان يەتكۈزۈش بىلەن بىرگە تۇنىس ساياھەتچىلىكىگىمۇ تەسىر يەتكۈزۈپ دۆلەتنىڭ ئىقتىسادىغا زەربە بېرىشنى مەقسەت قىلغان» دېيىلدى.