بىخەسىتە شوپۇر ماشىنىنى يول بويىغا توختىتىپ ئەتمىگەن، بۇنى كۆرگەن جاڭ ماشىنىنى ئوغرىلاپ ھەيدەپ ماڭغان ھەمدە يولۇچى توشۇپ پۇل تاپقان. تۈنۈگۈن مۇخبىرنىڭ ئۈرۈمچى شەھىرى شىمىگو رايونلۇق خەلق تەپتىش مەھكىمىسىدىن ئىگىلىشىچە، 32 ياشلىق جاڭ ئۈرۈمچىدىكى مەلۇم بىر رېستۇراننىڭ كۈتكۈچىسى بولۇپ، خىزمەتتە دائىم ھورۇنلۇق قىلغاچقا، 11-ئاينىڭ 2-كۈنى ئىشتىن توختىتىۋېتىلگەن. ئىقتىسادىي مەنبەسىدىن ئايرىلىپ قالغان جاڭ تىرىكچىلىك غېمىدە يۈرگەن بولسىمۇ، ئەمما ھورۇن بولغاچقا يېڭى خىزمەت تاپقۇسى كەلمىگەن.

     بىر كۈنى چۈشتىن كېيىن ئىلگىرىكى خىزمەتدېشىنىڭ بىر سودا-ساراينىڭ ئالدىغا ئېتىلمىگەن پىكاپنىڭ ئۇزۇن ۋاقىت توختىتىپ قويۇلغانلىقى ھەققىدە دېگەن گېپىنى ئەسكە ئالغان جاڭ بۇ ماشىنىنى تاپقان ھەمدە ماشىنىنىڭ ئىشىكىنى ئېچىپ ھەقىقەتەن ئېتىلمىگەنلىكىنى بايقىغان. ئەمما سودا-ساراينىڭ ئالدىدا كىشىلەرنىڭ كۆپلىكىنى ئويلاپ، كەچرەك قول سېلىشنى پىلانلىغان.

شۇ كۈنى چۈشتىن كېيىن جاڭ ماشىنىنىڭ قېشىغا كېلىپ كىشىلەرنىڭ دىققەت قىلمىغان پۇرسىتىدىن پايدىلىنىپ ئوغىرلىقچە ھەيدەپ كەتكەن. ئىككىنچى كۈنى جاڭ رېمونتچىنى چاقىرىپ كەلگەن، رېمونتچى جاڭنىڭ كىنىشكىسىنى تەكشۈرمەيلا ماشىنىنىڭ بىر يۈرۈش قۇلۇپىنى ئالماشتۇرۇپ بەرگەن. شۇنىڭدىن باشلاپ جاڭ پىراۋىسىز ھالەتتە ئوغرىلاپ كەلگەن ماشىنىسى بىلەن تىجارەت قىلغان.

نەچچە كۈندىن كېيىن ماشىنىنىڭ ئىگىسى ماشىنىسىنىڭ يوقاپ كەتكەنلىكىنى بايقاپ تېزدىن ساقچىغا مەلۇم قىلغان. تەكشۈرۈش ئارقىلىق جامائەت خەۋپسىزلىكى تارمىقى ناھايىتى تېزلا جاڭنى قولغا ئالغان.

    ئىگىلىنىشىچە، 2012-يىلى جاڭ ئوغىرلىق جىنايىتى بىلەن سوت مەھكىمىسى تەرىپىدىن ئۈچ يىللىق قاماق جازاسىغا ھۆكۈم قىلىنغان بولۇپ، تۈرمىدىن چىققىلى ئۇزۇن بولمىغانىكەن.