 |
ئەنئەنىۋى ئويۇنلار-جۈپ – تاق ئويۇنى
بۇ ئويۇن ئۇيغۇر بالىلىرىنىڭ ئەنئەنىۋىي ئويۇنى بولۇپ، بۇ ئويۇننى ئوغۇل بالىلار ئوينايدۇ. ئويۇنغا قانچە بالا قاتناشسىمۇ ئىككى بالا جۈپ – تاق ئوينايدۇ. بۇ ئويۇندا شاپتۇل، ئۆرۈك ئۇرۇقچىسى ئىشلىتىدۇ. بىر قانچە ئۇرۇقچا سىغقۇدەك بىر دانە ئورەكچە كولىنىپ، كولانغان ئورەكتىن 1.5 مېتىر يىراقلىقتىكى ئورۇنغا ئورەككە ئۇرۇقچا تاشلاش ئورنى بەلگىلىنىدۇ. ئويناش ئۇسۇلى: ئويۇنغا قاتناشقۇچى ئىككى بالىنىڭ بىرسى تاق سان، يەنە بىرسى جۈپ ساننى تاللايدۇ. بىرى قانچە ئۇرۇقچا چىقارغان بولسا يەنە بىر بالىمۇ شۇنچە ئۇرۇقچا چىقىرىپ نۆۋەت بىلەن كولانغان ئورەككە بىر قولىنىڭ چاڭگىلى (سىقىمى) بىلەن ئۇرۇقچا تاشلايدۇ. ئورەككە چۈشكەن ئۇرۇقچا جۈپ بولسا، جۈپ سان بولغۇچى بالا ئۇتقان بولۇپ، ئورەكتىكى ھەممە ئۇرۇقچىنى ئالىدۇ. ئەگەر تاق چۈشسە، تاق سان بولغۇچى ئۇتقان بولىدۇ. ئورەككە ئۇرۇقچا ئاتقان بالا قولىدىكى ئۇرۇقچىلارنى ئويناپ تۈگەتكەندىن كېيىن، قايتىدىن يەنە ئۇرۇقچا چىقىرىشىپ يەنە بىر بالا ئۆرەككە ئۇرۇقچا تاشلايدۇ. ئويۇن ئاشۇ ئۇسۇلدا داۋاملىشىپ، ئويۇننى ئىككى بالا توختاتقاندا ياكى ئىككى بالىنىڭ بىرسىنىڭ ئۇرۇقچىسى تۈگىگەندە ئويۇن ئاخىرلىشىدۇ. جۈپ – تاق ئويۇننىڭ يەنە بىر تۈرلۈك ئوينىلىشى بولۇپ، ئۆرۈك ئۇرۇقچىسى ياكى ئۇششاقراق چىلاندىن بىر قانچىسىنى ئويۇنغا چۈشكۈچى ئىككى بالىنىڭ بىرى يەنە بىر بالىغا كۆرسەتمەي، قولىنى ئارقىسىغا قىلىپ سىقىمداپ ئاندىن قولىنى چىقىرىپ ‹‹جۈپمۇ – تاقمۇ؟›› دەيدۇ. جاۋاب بەرگۈچى بالا جۈپ دېگەن بولسا، قولىدىكى ئۇرۇقچا جۈپ بولسا، جاۋاب بەرگۈچى بالا ئۇتقان بولىدۇ، ئەكسىچە بولسا ئۇتتۇرغان بولىدۇ.
|
