سىيگەك بالىلارنى داۋالاشنىڭ بەش رىتسىپى

1. ياۋا توشقان بېشى بىلەن داۋالاش. ياۋا توشقان بېشىنى ئۈكلىگەندىن كېيىن 25 گىرام قارا ماش بىلەن قوشۇپ مۇۋاپىق مىقداردىكى سۇدا قاينىتىش كېرەك، سۇغا سامساق، سۇڭپىياز، زەنجىۋىل ۋە تۇز سېلىنىدۇ. يېمەكلىك تەييارلانغاندىن كېيىن سىيگەك بالىغا توشقان بېشىنىڭ گۆشىنى يېگۈزۈش، مۇھىمى شورپىسىنى ئىسسىقىدا ئىچۈرۈش لازىم. بۇ ئۇسۇلنى ئۇدا بىر ئايغىچە داۋاملاشتۇرۇش كېرەك.

      2. ياۋا توشقان كاۋىپى بىلەن داۋالاش. ياۋا توشقان گۆشىنى ئوتتا قاقلاپ كاۋاپ قىلىش، كاۋاپقا مۇۋاپىق مىقداردا قارىمۇچ، زىرە قاتارلىق دورىلارنى سېپىپ، كاۋاپى سىيگەك بالىلارغا مۇۋاپىق مىقداردا يېگۈزۈش لازىم. بۇ ئۇسۇلنى ئۇزاققىچە داۋاملاشتۇرغاندا، ئۇنىڭ ئۈنۈمى كۆرۈلىدۇ.

      3. ياڭاق بىلەن داۋالاش. ياڭاقنى قوقاسقا كۆمۈپ 15 مىنۇت ئۆتكەندىن كېيىن شاكىلىدىن ئايرىپ سىيگەك بالىلارغا يېگۈزۈش لازىم. بىر ياشقا توشىمىغان بالىلارغا بىر دانە، بىر ياشتىن ئۈچ ياشقىچە بولغان بالىلارغا ئىككى دانە، ئۈچ ياشتىن ئاشقان بالىلارغا ئۈچ دانىدىن بەش دانىغىچە ياڭاقنى ھەركۈنى كەچتە يۇقىرىدىكى ئۇسۇلدا يېگۈزۈش كېرەك.

      4. قۇرۇق ئۈزۈم بىلەن داۋالاش. قۇرۇق قىزىل ئۈزۈمنىڭ ئۇرۇقىنى ئېلىۋىتىپ، بىر دانە قۇرۇق قىزىل ئۈزۈمگە بىر دانىدىن قارىمۇچ قوشۇپ، ئاندىن ئۇنى مۇۋاپىق مىقداردىكى ياڭاق مېغىزى بىلەن يۇمشاق سوقۇپ، سىيگەك بالىلارغا ئۇدا بىر قانچە ئايغىچە يېگۈزۈش كېرەك، ھەركۈنى كەچكە يېقىن يېگۈزۈش مۇۋاپىق.

      5. 15گىرام قانىسە (توخۇ تاشلىقىنىڭ ئىچكى سېرىق پەردىسى)نى قورۇپ ئۇندەك سوقۇپ، 15گىرام ئاپېلسىن پوستى قاينىتىلغان سۇ بىلەن قوشۇپ سىيگەك بالىلارغا كۈندە بىر گرامدىن، ھەركۈنى 2–3 ۋاخ ئىچۈرۈپ بەرگەندە ئۇ ئاجايىپ ئۈنۈم بېرىدۇ.