بوۋاقلار زۇكام بولغاندا ئۆيدە داۋالاش پىرىنسىپلىرى

 

بوۋاقلارنىڭ بىر يىل ئىچىدە بەش ــ ئالتە قېتىم زۇكام بولۇشى تەبىئىي ئەھۋالدۇر، زۇكام بولغاندا بۇرنىدىن سۇ ئېقىپ، بۇرۇن پۈتۈپ، يۆتىلىپ، گېلى ئاغرىپ، چارچاپ، ئىشتىھاسىزلىنىپ، قىزىپ قالىدۇ. بىر ياشقا توشمىغان بالىلار زۇكام بولسا، كۆپىنچە ھاللاردا قىزىپ، بەدەن تېمپىراتۇرىسى 38 گىرادۇستىن ئېشىپ كېتىدۇ. ئالتە ئايلىقتىن تۈۋەن بالىلار بولسا، بۇرنى پۈتۈپ، ئىمىشى تەسكە توختايدۇ.
      ئادەتتە زۇكام ۋاقتى 7 ــ 10 كۇنگىچە بولىدۇ، بوۋاقلارنىڭ بولسا ئىككى ھەپتە ئەتراپىدا بولىدۇ، ھەتتا قىشتا بىر قىش دېگۈدەك بۇرنىدىن ماڭقا، سۇ ئاقىدۇ.
      ئۈچ ئايلىق بولغان بوۋاقلارنىڭ زۇكام بولغانلىقىنى بايقىغان ھامان دەرھال دوختۇرغا ئېلىپ بېرىش كېرەك. ئۇنىڭدىن چوڭراق بولغان بوۋاقلارنىڭ بەدەن تىمپىراتورىسى 39 گىرادوستىن ئاشسا، قۇلىقى ئاغرىسا، نەپەس ئېلىشى قىيىنلاشسا، يۆتەلسە دەرھال دوختۇرغا ئاپىرىش كىرەك. ئەگەر ۋىرۇسلۇق زۇكام بولسا، بۇنىڭغا ئالاھىدە دورا يوق، پەقەت بۇۋاقنى ياخشى كۈتۈپ ئاغرىقنى پەسەيتىپ بەرسىلا بولىدۇ، ئادەتتە  7 ــ 10 كۇندىن ئېشىپ كەتمىسىلا بولىدۇ.  ئەگەر مىكروب پەيدا قىلغان زۇكام بولسا دوختۇرغا بېرىپ بىر قىسىم ئانتىبىئوتىك دورىلارنى يازغۇزۇپ، دورانى ۋاقتىدا ئىچكۈزۈش كېرەك. بەزى ئانىلار بالىلىرىنى تېزراق ياخشى بولسۇن دەپ دورا مىقدارىنى كۆپەيتىپ بىرىدۇ، قەتئىي بۇنداق قىلماسلىق كېرەك.
      ئەگەر بوۋاق قىزىسا، دوختۇرنىڭ كۆرسەتمىسى بويىچە قىزىتما قايتۇرۇش دورىسى ئىچكۈزۈش كېرەك، ئەگەر بەدەن تېمپىراتورىسى 38.5تىن تۈۋەن بولسا دورا ئىچكۈزۈشنىڭ ھاجىتى يوق. زۇكام دورىسىنىمۇ قالايمىقان ئىچكۈزمەسلىك كېرەك. بىر ياش بالىلارغا زۇكام دورىسىنى قالايمىقان ئىچكۈزگەندە پايدىسىدىن زىيىنى چوڭ بولۇپ قالىدۇ.
      ئەگەر بوۋاقنىڭ بۇرنى پۈتۈپ ئىمىشى قىيىنلاشسا، دوختۇرنىڭ كۆرسەتمىسى بويىچە ئىمىشتىن 15 مىنۇت بۇرۇن بۇرۇنغا تېمىتىدىغان سۇيۇقلۇقتىن تېمىتىپ بەرسە بۇرۇننى تازىلىۋەتكىلى بولىدۇ، ئەگەر دوختۇر رۇخسەت قىمىسا، ئۆز بېشىمچىلىق بىلەن قالايمىقان دورا ئىشلىتىشكە بولمايدۇ.