مەمۇرلار مەسئۇل تارماقلىرى مەمۇرلار ئىمتىھانى مەسىلىسى ھەققىدە مۇخبىرلارنىڭ سوئاللىرىغا جاۋاب بەردى جۇڭگو ئۇيغۇرچە رادىيو تورى 27-نويابىر بېيجىڭ خەۋىرى:مەركەز ئورگانلىرى ۋە ئۇنىڭغا بىۋاسىتە قاراشلىق ئاپپاراتلار مەمۇرلىرى ئىمتىھانىدىكى ئومۇم پەن يېزىق ئىمتىھانى 27-نويابىر پۈتۈن مەملىكەت مىقياسىدا ئېلىپ بېرىلدى. تونۇشتۇرۇلۇشىچە، بۇ قېتىمقى ئىمتىھان پۈتۈن مەملىكەتتىكى 31 ئىمتىھان رايونىدىكى 869 ئىمتىھان نۇقتىسىدا ئېلىنغان، تىزىمغا ئالدۇرغانلاردىن تەخمىنەن 960 مىڭ كىشىنىڭ ئىمتىھانغا قاتناشقانلىقى بېكىتىلدى، قوبۇل قىلىنىش نىسبىتى 53 دە بىر بولدى. 27-نويابىر مەركەز مەمۇرلارنى باشقۇرۇش تارمىقىنىڭ ئالاقىدار مەسئۇلى مۇخبىرنىڭ زىيارىتىنى قوبۇل قىلىپ، مەمۇرلار ئىمتىھانىغا ئالاقىدار مەسىلىلەردە مۇخبىرنىڭ سوئالىغا جاۋاب بەردى. بۇ مەسئۇل كىشى بۇ قېتىمقى ئىمتىھانغا تىزىمغا ئالدۇرۇش ئالاھىدىلىكى ھەققىدە سورالغان سوئاللارغا جاۋاب بەرگەندە ئەھۋال تونۇشتۇرۇپ مۇنداق دېدى: بۇ قېتىم ئۆلكە دەرىجىلىكتىن يۇقىرى ئورگانلارغا تىزىمغا ئالدۇرغانلار ئىچىدە ئاساسىي قاتلامدا ئىككى يىلدىن ئارتۇق خىزمەت قىلغانلار 210 مىڭ، ئاساسىي قاتلامدىكى ئورۇنلارمۇ ئىمتىھان بەرگۈچىلەرنىڭ دىققىتىنى تارتتى، ئاساسىي قاتلامدا خىزمەت كۆرسىتىش ئىرادىسىگە كەلگەن بىر تۈركۈم ئالىي مەكتەپ پۈتتۈرگەن ئوقۇغۇچىلار مەركەزنىڭ چاقىرىقىغا ئاكتىپ ئاۋاز قوشۇپ، چەت، جاپالىق رايونلارغا ئىمتىھان بېرىشكە تىزىملاتتى، شەھەردىن تۆۋەن ئورۇنلارغا تىزىمغا ئالدۇرغان ئالىي مەكتەپنى پۈتتۈرگەن ئوقۇغۇچىلار %53.8 گە يەتتى، بۇ ئاساسىي قاتلام ئىختىساسلىقلار قوشۇنىنى تولۇقلاش ئۈچۈن ئاساس سالدى، ئىستۇدېنت كەنت ئەمەلدارلىرى، ئۈچكە ياردەم بېرىش، بىرنى يۆلەش قاتارلىق ئاساسىي قاتلاملارغا مۇلازىمەت قىلىش تۈرىگە ئىمتىھان بېرىشكە تىزىملاتقانلار ئۆتكەن يىلدىكىدىن خېلى ئاشتى. بۇ مەسئۇل كىشى مەمۇرلار ئىمتىھانىنىڭ مۇرەككەپ ئىجتىمائىي مۇھىتقا دۇچ كېلىۋاتقانلىقى، قىسمەن كىشىلەرنىڭ ناتوغرا ۋاسىتىلەرنى قوللىنىش ئارقىلىق ئىمتىھاندىن ئۆتۈشكە ئۇرۇنىۋاتقانلىقى ھەققىدە سورالغان سوئاللارغا جاۋاب بەرگەندە ئېنىق ئىپادە بىلدۈرۈپ مۇنداق دېدى: مەمۇرلار ئىمتىھانىدا ساختىلىق قىلىشقا بولمايدۇ، ساختىلىق قىلغانلار مەمۇر بولالمايدۇ. بۇ مەسئۇل كىشى بارلىق ئىمتىھان بەرگۈچىلەرنىڭ سەمىگە سېلىپ مۇنداق دېدى: نەتىجەڭلار ئېلان قىلىنغاندىن كېيىن، قوبۇل قىلغۇچى ئورگان ئۇقتۇرىدىغان يۈز تۇرانە ئىمتىھان ۋاقتىغا دىققەت قىلىڭلار، بۇ ۋاقىتنى ئۆتكۈزۈۋەتمەڭلار، تۈرلۈك يۈز تۇرانە ئىمىتىھانىغا قوشۇمچە يېتەكچىلىك قىلىش سىنىپلىرىغا ئالدانماڭلار، تەربىيەلەش سىنىپلىرىغا بىرمۇنچە پۇل خەجلەپ قاتنىشىپمۇ يۈرمەڭلار، ئالدىنىپ قالىسىلەر. تەھىرلىگۇچى:admin
|
