 |
تەنتەربىيە دەرسى ئارقىلىق ئوقۇغۇچىلارنى ساغلام بەدەنگە ئىگە قىلىش كېرەك  تەنتەربىيە دەرسى ئوقۇغۇچىلارنى جىسمانىي جەھەتتە ساغلاملاشتۇرۇپ، بەدەن ساپاسىنى ياخشىلايدۇ. ئوقۇغۇچىلارنىڭ ئوتتۇرا مەكتەپ باسقۇچى بەدەن ساپاسىدا روشەن ئۆزگىرىش بولىدىغان مەزگىل بولۇپ، ئوقۇغۇچىلارنىڭ بەدەن تۈزۈلۈشى، جىسمانىي كۈچ - قۇۋۋىتىنىڭ ئوخشىماسلىقىدەك سەۋەبلەر تۈپەيلى، قىسمەن ئوقۇغۇچىلاردا تەنتەربىيە دەرسىگە قىزىقمايدىغان ئەھۋاللار كۆرۈلىدۇ. بۇنداق ئوقۇغۇچىلارغا قارىتا تەنتەربىيە دەرسى ئوقۇتقۇچىلىرى ئوقۇغۇچىلارنىڭ سالامەتلىك ئەھۋالى، پىسخىك روھى ھالىتى قاتارلىقلارنى نەزەردە ئېلىپ، ئۇلارنى مۇۋاپىق مەشىققە قاتناشتۇرۇش كېرەك. تەنتەربىيەگە قىزىقمايدىغان ئوقۇغۇچىلار باشقا دەرستە تىرىشچان، ئۆگىنىش نەتىجىسى ئالاھىدە ياخشى بولسىمۇ، تەنتەربىيە دەرسىنىڭ مۇھىملىقىغا بولغان چۈشەنچىسى يېتەرسىز بولغاچقا، تەنتەربىيە دەرسىگە قاتنىشىش ئارقىلىق بەدەن چېنىقتۇرۇپ، سالامەتلىكنى ياخشىلاشقا، بەدەن ساپاسىنى ئۆستۈرۈشكە سەل قارايدۇ. مېنىڭچە، تەنتەربىيە دەرسى ئارقىلىق ئوقۇتقۇچىلارنى ساغلام بەدەنگە ئىگە قىلىش ئۈچۈن، تۆۋەندىكى ئۇسۇللارنى قوللىنىش كېرەك: بىرىنچى، تەنتەربىيە ئوقۇتقۇچىلىرى ئوقۇغۇچىلارغا قارىتا تەنتەربىيە دەرسىنىڭ ساغلاملىق، تەن ساپاسىنى ياخشىلاشتىكى رولىنى ئىلمىي نۇقتىدىن چۈشەندۈرۈپ، ئەمەلىي مىساللار ئارقىلىق ئۇلارنى قايىل قىلىش كېرەك. ئىككىنچى، ئوقۇغۇچىلارغا تەنتەربىيە دەرسى ئۆتۈلۈۋاتقاندا، مەدەت بېرىپ ۋە تەنتەربىيە دەرستىن ئىمتىھان ئېلىپ، لاياقەتلىك بولغانلىرىنى مۇكاپاتلاش ئارقىلىق رىغبەتلەندۈرۈپ، ئۇلارنىڭ تەنتەربىيە دەرسىگە بولغان قىزىقىشىنى قوزغاپ، تەنتەربىيە دەرسكە تولۇق قاتنىشىدىغان، دەرستىن سىرتقى ۋاقىتلاردىمۇ چېنىقىشقا ئەھمىيەت بېرىدىغان كەيپىياتنى يېتىلدۈرۈش كېرەك. ئۈچىنچى، تەنتەربىيە ئوقۇتقۇچىلىرى تەنتەربىيە دەرسىنىڭ ئوقۇغۇچىلارغا بولغان تەن ساپاسى، جىسمانىي قۇۋۋىتىنىڭ پايدىسىنى چۈشەندۈرۈپ، ئۇلارغا يەڭگىل، قىزىقارلىق مەشىقلەرنى ئورۇنلاشتۇرۇپ، ئۇلارنىڭ تەنتەربىيە دەرسىگە بولغان قىزىقىشىنى قوزغاپ، چېنىقىشنى دائىملىق ئادەتكە ئايلاندۇرىدىغان، تەنتەربىيە دەرسىنى ياخشى كۆرىدىغان كەيپىياتنى يېتىلدۈرۈش كېرەك. تۆتىنچى، تەنتەربىيە ئوقۇتقۇچىلىرى تەنتەربىيە دەرسىگە قىزىقمايدىغان ئوقۇغۇچىلارغا قارىتا ئوخشاش بولمىغان تەربىيە شەكىللىرى ئارقىلىق، ئۇلارنىڭ تەنتەربىيە دەرسىگە بولغان تونۇشىنى ئۆستۈرۈپ، ئوقۇغۇچىلارنى ئومۇميۈزلۈك ھالدا تەنتەربىيە دەرسىگە قىزىقىدىغان، دەرستىن چۈشكەندىن كېيىنمۇ ئۆزلىرى قىزىقىدىغان تەنتەربىيە تۈرلىرى بويىچە تەنتەربىيە پائالىيەتلىرى بىلەن شۇغۇللىنىدىغان ئادەتنى يېتىلدۈرۈش كېرەك.
|
