تۇرمۇشىمىزدىكى قانچىلىك كىشىلەرنىڭ چوڭ-كىچىك ئىشلاردىن قاقشاپ-زارلايدىغانلىقى نامەلۇم. بەزىلىرى تەقى-تۇرق، ئائىلە كېلىپ چىقىش، ئىقتىسادىي شارائىت، بەزىلىرى قىلىۋاتقان كەسىپ-خىزمەتلىرىمىزدىن ئوخشىمىغان دەرىجىدە نارازى بولىدۇ. ئەمما ئېرىشىشنى ئارزۇ قىلغان ئاشۇ تەقى-تۇرق، ئىقتىسادىي شارائىت، كەسىپ-خىزمەتلەرگە ئىگە كىشىلەرنىڭمۇ يەنە باشقا كويلاردا قاقشاپ يۈرگەنلىكى خىيالىڭىزغا كېلەرمۇ؟ يېزا-سەھرادىكىلەرنىڭ ئىقتىسادىي تەرەققىيات، ھاللىق تۇرمۇش دەپ شەھەرگە ئىنتىلىۋاتقان ۋاقىتتا، ئوخشاشلا شەھەردىكىلەرنىڭ ئالدىراش تۇرمۇش رېتىمى، بۇلغانغان مۇھىت، ۋاراڭ-چۇرۇڭ، قىستى-قىستاڭدا شەھەردىن بىزار بولۇپ يېزا-سەھراغا تەلپۈنۈۋاتقانلىقى كۆز ئالدىڭىزغا كېلەرمۇ؟ يۈكسەك دەرىجىدە تەرەققىي قىلغان دۆلەت كىشىلىرىمۇ يا ئۇ ئىش يا بۇ ئىش بىلەن شارائىتتىن، دۇنيادىن ئوخشاشلا نارازى بولىۋاتقان بولىدۇ. خۇددى دۇنيانى نارازىلىق قاپلاپ كەتكەندەك. مەسىلە زادى نەدە؟ ئادەمنىڭ ئېھتىياجىنى زادى قاندۇرغىلى بولامدۇ-يوق؟ مەسىلە زادى تەندىمۇ ياكى روھتىمۇ؟