(1)


گېپى يوغان بولسىمۇ ، ئالدايدۇ ئۇ قەدىناس ،
تاتلىق شىكەر سۇلكىتى ، گولدايدۇ ئۇ قەدىناس .

<< قىرىق يىلدا بىر تال چاچ ئەل بولىدۇ >> دەيدىغۇ ؟
قىرىق يىلمۇ بەك ئۇزاق ، ئەل بولمايدۇ قەدىناس .

مۇھەببىتى، سۆيگۈسى دېڭىزدىنمۇ بەك چوڭقۇر ،
لېكىن ھەسرەت ئىچىدە ، ئۇھ تارتىدۇ قەدىناس .

ۋۇجۇدىدىن قەلبىدىن ، مىكىر ئورۇن ئالغانمۇ ؟
ناز- كەرەشمە جىلۋىسى ، داپ چالىدۇ قەدىناس .

كېسەل ئاغرىق قەتىگە ، چوڭقۇر باغلاپ ئالغاندا ،
بىر تاۋاقتا ئۈگرىنى ، قوش قوللايدۇ قەدىناس .

ھايات شۇنداق، كۈن شۇنداق ، چىرماس ھېسلىق تۈن شۇنداق ،
بىرسى كەتسە ئالەمدىن ، ياش تۆكىدۇ قەدىناس .

بۇ ئالەم ئۇزۇن ئالەم ، سىناق ھەممە ئادەمگە ،
بىردە كۈلسە يەنە بىر ، قاخشايدىغۇ قەدىناس .

(2)

بىرى كەتتى ئالەمدىن ، يەنە بىرى ئەسنەيدۇ ،
ئۆتمۈشىگە ئاھ ئۇرۇپ، ياد ئېتىدۇ قەدىناس .

يالغۇز قالسا گۆرۈستان، تۇيۇلىدۇ ئۆز ئۆيى ،
ئاستا بىرىپ قەۋرىنى ، يوقلايدىغۇ قەدىناس .

قەۋرىستاندىن يانغۇچە ، سىقىرايدۇ بەل-پۇتى ،
قاراپ نەچچە كەينىگە ، ئاھ ئۇرىدۇ قەدىناس .

ئۆيگە كىرسە مۇڭ بېسىپ، غىچىرلايدۇ ئىشىكمۇ ،
ئوتۇن يېرىپ ،ئاش ئېتىپ، چۈش كۆرىدۇ قەدىناس .

قېنى ئۈگرە- چۆچۈرە، كەڭ يېيىلغان داستىخان ؟
بازار ئىدى ئۆيىمۇ ، كۆرۈنمەيدۇ قەدىناس .

ئوغۇل-قىزى پاناھ بوپ ، باقاي دېسە ئۇلارنى ،
ئوت كۆرىنەر ئۆز ئۆيى ، كېتەلمەيدۇ قەدىناس .

ھايات شۇنداق، كۈن شۇنداق، قانۇنىيەت ئالىمى ،
مېھىر ئۇلۇغ، ئۇ ئۇلۇغ، تارتىشىدۇ قەدىناس .