تۇنجى تۈركۈمدىكى 110 يولۇچى ئولتۇرغان جەنۇب ئاۋىياتسىيەسى شىنجاڭ شۆبە شىركىتىنىڭ نۆۋەتچى ئايروپىلانى 19 – سېنتەبىر بېيجىڭ ۋاقتى سەھەر سائەت 1 دىن ئاشقاندا ئۈرۈمچى ئايروپورتىدىن ئۇچتى، بۇ ئايروپىلان بەش سائەتتىن كېيىن شياڭگاڭغا يېتىپ بارىدۇ، بۇ ئۈرۈمچىدىن شياڭگاڭغا بىۋاسىتە ئۇچىدىغان ھۆددە ئايروپىلاننىڭ رەسمىي قاتناشقا باشلىغانلىقىدىن دېرەك بېرىدۇ.

   بۇ قېتىمقى يولۇچىلارنىڭ بىر قىسمى قەشقەر ئايروپورتىدىن ئايروپىلانغا چىققان بولۇپ، ئۇلار ئۇرۇمچى ئارقىلىق شياڭگاڭغا بارغاندىن كېيىن، ئۇ يەردە ئىككى – ئۈچ كۈن ساياھەت قىلىپ، ئاندىن تەيۋەن ۋە تايلاندقا بارىدۇ، ئۇلارنىڭ بېرىپ – كېلىشىگە ئون كۈن كېتىدۇ.

   شياڭگاڭ جۇڭگو ساياھەت گۇرۇھ شىركىتى شىنجاڭ شىركىتىنىڭ باش دىرېكتورى جاۋ شيۇخۇڭ: ئىلگىرى شياڭگاڭغا بىۋاسىتە ئۇچىدىغان ئايروپىلان يوق ئىدى، گۇاڭجۇ ياكى شېنجېندا ئايروپىلان ئالمىشىشقا، ئالمىشىش ئۈچۈن ئىككى كۈن ساقلاشقا توغرا كېلەتتى، ھازىر بىۋاسىتە ئايروپىلان ئۇچقاندىن كېيىن، يولۇچىلارنىڭ سەپەر ۋاقتى قىسقىراپ، مەنزىلدىكى ساياھەت ۋاقتى ئۇزىرايدۇ، شۇنىڭ بىلەن بىللە، كىشىلەرنىڭ سودا ئىشلىرى بىلەن سىرتقا چىقىشى تېخىمۇ قولايلىشىدۇ، دېدى.