ئالدىنقى كۈنلەردە ئېلان قىلىنغان بۇ يىلقى ئەڭ تۆۋەن مائاش ئۆلچىمىگە ئاساسەن، شىنجاڭدا ئىشسىزلىق سۇغۇرتىسىدىن بەھرىمەن بولىدىغانلارنىڭ تەمىناتىمۇ ئۆستۈرۈلدى. تەڭشەلگەندىن كېيىن، بۇلتۇرقىغا سېلىشتۇرغاندا ھەر قايسى جايلار 83 يۈەندىن 129.2 يۈەنگىچە ئۆستۈردى. ئۈرۈمچى شەھىرىنىڭ ئىشسىزلىق سۇغۇرتا تەمىناتى بۇلتۇرقى 816 يۈەندىن 899 يۈەنگە ئۆرلىدى.
يېڭى ئۆلچەم 7-ئاينىڭ 1-كۈنىدىن باشلاپ ئىجرا قىلىندى. تۈنۈگۈن مۇخبىرنىڭ ئاپتونوم رايونلۇق ئادەم كۈچى بايلىقى ۋە ئىجتىمائىي كاپالەت نازارىتىدىن ئىگىلىشىچە، شىنجاڭنىڭ ھەر قايسى جايلىرى «ئۈچ سۇغۇرتا بىر فوند» نى ئۆز ئىچىگە ئالمىغان ئايلىق ئەڭ تۆۋەن ئىش ھەققى ئۆلچىمىگە ئاساسەن شۇ جاينىڭ ئىشسىزلىق سۇغۇرتا پۇل ئۆلچىمى ۋە باشقا ئىشسىزلىق سۇغۇرتا تەمىناتىنى بېكىتىدۇ. 2015-يىلى رايونىمىزنىڭ «ئۈچ سۇغۇرتا بىر فوند»نى ئۆز ئىچىگە ئالمىغان ئايلىق ئەڭ تۆۋەن مائاش ئۆلچىمى تۆت دەرىجە بولۇپ، ئايرىم-ئايرىم ھالدا 1314 يۈەن، 1124 يۈەن، 1048 يۈەن ۋە 972 يۈەن. تەڭشەلگەندىن كېيىن، ئىشسىزلىق سۇغۇرتىسىغا قاتناشقانلار ھەر ئايدا شۇ جاينىڭ ئەڭ تۆۋەن مائاش ئۆلچىمىنىڭ %75 ياكى %85 بويىچە ئىشسىزلىق سۇغۇرتا تەمىناتى ئالسا بولىدۇ.
ئۈرۈمچى شەھىرىنىڭ 2015-يىللىق «ئۈچ سۇغۇرتا بىر فوند» نى ئۆز ئىچىگە ئالمىغان ئايلىق ئەڭ تۆۋەن ئىش ھەققى ئۆلچىمى 1124 يۈەن بولۇپ، شۇنداق بولغاندا، نىسبىتى ئۆستۈرۈلگەندىن كېيىن ئىشسىزلىق سۇغۇرتا مۇددىتىنىڭ 1-ئېيىدىن 12-ئېيىغىچە، ئىشسىزلىق سۇغۇرتا تەمىناتى ئەسلىدىكى 816 يۈەندىن 899 گە ئۆستۈرۈلىدۇ؛ ئىشسىزلىق سۇغۇرتا مۇددىتىنىڭ 13-ئېيىدىن 24-ئېيىغىچە ئەسلىدىكى 765 يۈەندىن 843 يۈەنگە ئۆستۈرۈلىدۇ.
ئىگىلىنىشىچە، رايونىمىزدا ھازىرغىچە ئىشسىزلىق سۇغۇرتىسىغا قاتناشقانلار 2 مىليون 290 مىڭ بولۇپ، بۇنىڭ ئىچىدە ئۈرۈمچىدىكى قاتناشقانلارنىڭ سانى 736 مىڭ بولغان.
