2015-يىللىق شىنجاڭ (ئۈرۈمچى) ياز پەسىللىك ئۆي-جاي-مۈلۈك سودا كۆرگەزمىسىدە يېڭى سېلىنغان تاۋار ئۆي سېتىۋالغان ۋە شەرتكە مۇۋاپىق كېلىدىغان شەھەر ئاھالىلىرى ئۈچ جايدىكى كىنىشكا بېجىرىش زالىدا يەر خېتى بېجى، ئۆينىڭ ھوقۇق تەۋەلىكىنى تىزىملىتىش ھەققى پۈتۈن سومما تولۇقلىمىسىنى ئىلتىماس قىلسا بولىدۇ. داۋاملىشىش ۋاقتى 11-ئاينىڭ 20-كۈنىگىچە.
8-ئاينىڭ 6-كۈنى، مۇخبىرنىڭ شەھەر تۇرالغۇ كاپالىتى ۋە ئۆي-مۈلۈك باشقۇرۇش ئىدارىسىدىن ئىگىلىشىچە، بۇ قېتىملىق تولۇقلىما بېرىش ئوبيېكتىنىڭ ئۆلچىمى ئىككى خىل بولۇپ، بىرىنچى خىل ئەھۋالدا، يېڭىدىن سېلىنغان تاۋار ئۆي سېتىۋالغان باج تاپشۇرغۇچى تەمىنلىگەن يەر خېتى بېجى ئىسپاتى ئاساس قىلىنىپ، پۈتۈن سوممىسى تولۇقلاپ بېرىلىدۇ؛ ئىككىنچى خىل ئەھۋالدا، يېڭىدىن سېلىنغان تاۋار ئۆي سېتىۋالغان باج تاپشۇرغۇچى تەمىنلىگەن ئۆينىڭ ھوقۇق تەۋەلىكىنى تىزىملىتىش ھەققىنى تاپشۇرغانلىق ئىسپاتى ئاساس قىلىنىپ، پۈتۈن سوممىسى تولۇقلاپ بېرىلىدۇ.
7-ئاينىڭ 3-كۈنىدىن 6-كۈنىگىچە، 2015-يىللىق شىنجاڭ (ئۈرۈمچى) ياز پەسىللىك ئۆي-جاي-مۈلۈك سودا كۆرگەزمىسى شىنجاڭ خەلقئارا كۆرگەزمە مەركىزىدە ئۆتكۈزۈلدى. كۆرگەزمە مەزگىلىدە، شەھەرلىك ھۆكۈمەت «يېڭى سېلىنغان تاۋار ئۆي (دۇكان، ئىشخانا بىناسىنى ئۆز ئىچىگە ئالىدۇ) سېتىۋالغانلار يەر خېتى بېجى، ئۆينىڭ ھوقۇق تەۋەلىكىنى تىزىملاش ھەققىگە پۈتۈن سومما بويىچە تولۇقلىما بېرىشتىن بەھرىمەن بولۇش» تەك خەلققە پايدىلىق سىياسەتنى يۈرگۈزگەن. تولۇقلىما بېرىش سىياسىتىدە ئاۋۋال تۆلەپ كېيىن قايتۇرۇش شەكلى قوللىنىلىدۇ.
