كومپىيۇتېرىڭىز كونىراپ قالدى، يىڭى چىققان ئالاھېدە چوڭ ئويۇنلارنى ئوينىيالمىدىڭىز ؟ يەنە بىرنى ئېلىشىڭىزغا ئاپىڭىز ئۇنىمايدۇ، چۈنكى بۇ كومپيۇتېرنى ئالغىلىمۇ ئانچە ئۇزۇن بولمىدى. زادى قانداق قىلىش كېرەك ؟ بۇ نەسباسقان كومپىيۇتېرمۇ بۇزۇلماستا قالدى شۇنداقمۇ ؟ بۈگۈن كەمىنە ۋىروس سىز ئۈچۈن يىڭى كومپىيۇتېر سېتىۋالىدىغانغا ئوبدان باھانە تېپىپ بېرىدۇ. بۇنىڭ ئۈچۈن سىز كۈندىلىك كومپىيۇتېر مەشخۇلات ئادىتىڭىزنى تۆۋەندە مەن تاپشۇرغان يۇسۇنغا تەڭشىشىڭىز كېرەك. قېنى ئەمسە قۇلىقىڭىز ئاغىزىمدا بولسۇن …

كومپيوتېرنى قۇياش نۇرى بىۋاسىتە چۈشىدىغان يەردە ئىشلىتىڭ. پار، مەش… دېگەندەك ئىسسىتىش ئۈسكۈنىلىرىگە يېقىن يەردە ئىشلەتسىڭىز تېخىمۇ ياخشى. ئەڭ ياخشىسى ئەتراپنىڭ ئازراق ھۆل، نەم بولۇشىنى قولغا كەلتۈرۈڭ.

كومپيوتېرىڭىزنى ئەتكەندە، ئاۋارە بولۇپ «باشلاش» تىزىملىكىدىن «كومپيوتېرنى ئۆچۈرۈش» نى تاللاپ ئۆچۈرۈپ يۈرمەڭ، بىۋاسىتە Power كونۇپكىسىنى بېسىپلا ئۆچۈرۈڭ. ئۆچۈرۈپ بولۇپلا، دەرھال قايتا كومپيوتېرىڭىزنى قوزغىتىڭ.

كومپيوتېرىڭىزنى ئىشلىتىۋاتقاندا توك كەتسە، كومپيوتېرنى ئېتىپ يۈرمەڭ، توك كەلگەندە ئېلىكتىر بېسىمىنىڭ ئۆزگىرىشلىرىدىن كېلىپ چىقىدىغان ئېكراندىكى غەلىتە رەسىملەر، ئانا تاختىدىن چىققان غەلىتە ئاۋازلار بىلەن كارىڭىز بولمىسۇن، "ئەجەب قىزىقكەن" دەپ قويسىڭىزمۇ بولىدۇ.

كومپيوتېرنى قويغان ئۈستىلىڭىز مۇستەھكەم بولۇپ كەتمىسۇن. بۇنداق بولغاندا ھەر قېتىم كونۇپكا باسقىنىڭىزدا لەپەڭشىپ، چىڭراق باسىسىز، نىشانغىمۇ بالدۇر يېتىسىز.

ئانا تاختىنى تامغا يېقىن، ھاۋا ئالماشتۇرۇش تۆشۈكچىلىرىنى تام توسۇۋالغۇدەك دەرىجىدە يېقىن ئورۇنلاشتۇرۇڭ، بۇنداق بولغاندا كومپيوتېرنى ئىشلىتىش جەريانىدا ھاسىل بولغان ئىسسىقلىق، ۋە كېرەكسىز ئىسلارنىڭ ئىسراپ بولۇپ كېتىشىنىڭ ئالدىنى ئېلىپ، كومپيوتېرىڭىزنىڭ ئىللىق ھالىتىنى ساقلىيالايسىز.

ئېكرانىڭىزدا بىر رەسىمنى چىقىرىۋېلىپ، نەچچە سائەتكىچە ئۆزگەرتمەڭ، (رەسىم قانچە رەڭلىك بولسا شۇنچە ياخشى) بۇنداق بولغاندا ئېكرانىڭىزنىڭ رەڭ كۆرسىتىش ئۈنۈمى يۇقىرىلاپ، سىز كومپيوتېرنى ئېتىۋەتكەندىمۇ شۇ رەسىمنى كۆرەلەيدىغان بولىسىز.

كومپيوتېرىڭىزنىڭ توك سىملىرىنى ئۇلىغاندا يەر سىمى ئىشلەتمەڭ. باشقا ئېلىكتىر ئۈسكۈنىلىرى بىلەن بىرلىكتە يەر سىمىسىز بىر توك مەنبەسىگە چېتىپ ئىشلەتسىڭىز ئۈنۈمى تېخىمۇ ياخشى بولىدۇ.

كىچىك ئىنى-سىڭىللىرىڭىز، ياكى بالىلىرىڭىز بولسا، كومپيوتېرىڭىز بار ئۆينىڭ ئىشىكىنى ئادەتتە ئوچۇق قويۇڭ. كومپيوتېرىڭىزنىڭ ئەتراپىغا پارچە-پۇرات پۇل، ئويۇنچۇق بىرنەرسىلەرنى قويۇپ قويسىڭىز تېخىمۇ ياخشى.

كومپيوتېرىڭىزنىڭ تور كارتىسى، ئاۋاز كارتىسى… دېگەندەك ئانا تاختىنىڭ ئىچىگە ئورۇنلاشتۇرۇلىدىغان كارتىلارنى پات-پات چىقىرىپ، "ھاۋالاندۇرۇپ" تۇرۇڭ. ئەلۋەتتە، تۆت قىرلىق ئەتۋىركە تاپماق دائىم ئاسان ئەمەس، شۇڭا خالىسىڭىز ئانا تاختىڭىزنى ئوچۇق قويۇڭ. بۇنداقتا بەك قولايلىق بولىدۇ. بولسا ئانىڭىزغا تاپىلاپ قويۇڭ، شىرەلەرنى، ئوچاق بېشىلىرىنى سۈرتكەندە كومپيوتېرىڭىزدىنمۇ بىر خەۋەر ئېلىپ قويسۇن.

ئەگەر بۇ ئۇسۇللارنىڭ ھەممىنى سىنىسىڭىزمۇ كومپيوتېرىڭىز يەنە جاھىللىق بىلەن ئىشلەۋەرسە، ئامال يوق، ئەڭ ئاخىرقى ۋە ئەڭ ئۈنۈملۈك ئۇسۇلنى قوللىنىڭ: كومپيوتېرىڭىزنى كۆتىرىپ دېرىزىدىن تاشلاپلىۋېتىڭ.