ئاپتونوم رايونلۇق مېيىپلەر بىرلەشمىسىدىن ئىگىلىنىشىچە، ئاپتونوم رايونلۇق مېيىپلەر بىرلەشمىسى 1990 - يىلىدىن باشلاپ ئەمالارنىڭ ئۇۋۇلاش كەسپىدە تەربىيەلىنىشىگە ئالاھىدە ئەھمىيەت بېرىپ، ئۇلارنىڭ ئىشقا ئورۇنلىشىشىغا ئاسانلىق يارىتىپ بەرگەن.
　　مەملىكەت بويىچە مېيىپلەرنى تەكشۈرۈپ ئېنىقلاش نەتىجىسىگە قارىغاندا، ئاپتونوم رايونىمىزدا 1 مىليون 69 مىڭ مېيىپ بار بولۇپ، ئومۇمىي ئاھالىنىڭ %5.31ىنى ئىگىلەيدىكەن، ئارىسىدا كۆرۈش قۇۋۋىتى ئاجىزلار 531 مىڭ كىشى بولۇپ، مېيىپلەر ئومۇمىي سانىنىڭ %12.63ىنى ئىگىلەيدىكەن. ئاپتونوم رايونلۇق مېيىپلەر بىرلەشمىسى پارتكومىنىڭ شۇجىسى جو جۈنلىننىڭ تونۇشتۇرۇشىچە، ئاپتونوم رايونىمىزدا 3000دەك ئەما (كۆرۈش قۇۋۋىتى ئاجىزلارنىمۇ ئۆز ئىچىگە ئالىدۇ) ئۇۋۇلاپ ساقلىقنى ساقلاش كەسپىدە تەربىيەلىنىپ كەسپىي سالاھىيەتكە ئېرىشكەن بولۇپ، كۆپ قىسمى ھەر دەرىجىلىك مېيىپلەر بىرلەشمىلىرىنىڭ ياردىمى ۋە ئۆز تىرىشچانلىقى بىلەن ئۇۋۇلاپ ساقلىقنى ساقلاش ئورنى ئاچقان ياكى شۇ ئورۇنلاردا ئىشلىگەن. ئاپتونوم رايونىمىزدا ئۇۋۇلاپ داۋالاش كەسپىي تېخنىكا ئۇنۋانىغا ئېرىشىپ، ئۇۋۇلاپ داۋالاش بىلەن شۇغۇللىنىش سالاھىيىتىنى ھازىرلىغان بولسىمۇ، ئالاقىدار سىياسەتلەر يولغا قويۇلمىغانلىقى ئۈچۈن يەنىلا ئۇۋۇلاش، ساقلىقنى ساقلاش كەسپى بىلەن شۇغۇللىنىۋاتقان ئەمالاردىن 227سى بار ئىكەن.
　　ئەمالارنىڭ كەسپىي تەرەققىيات يولىنى كېڭەيتىش ھەم ئەمالار ئۇۋۇلاش كەسپىنى باشقۇرۇشنى كۈچەيتىش ۋە ئۆلچەملەشتۈرۈش ئۈچۈن، 2013 - يىلىنىڭ ئاخىرىدا ئاپتونوم رايونلۇق مالىيە نازارىتى، ئاپتونوم رايونلۇق سودا سانائەت مەمۇرىي باشقۇرۇش ئىدارىسى، ئاپتونوم رايونلۇق مېيىپلەر بىرلەشمىسى بىرلىكتە «ئاپتونوم رايوننىڭ ئەمالار ئۇۋۇلاپ ساقلىقنى ساقلاش كەسپىگە مەدەت بېرىش ۋاقىتلىق چارىسى»نى تۈزۈپ ئېلان قىلدى. بۇ يىل 2 - ئايدا ئاپتونوم رايونلۇق سەھىيە - پىلانلىق تۇغۇت كومىتېتى، ئاپتونوم رايونلۇق ئادەم كۈچى بايلىقى ۋە ئىجتىمائىي كاپالەت نازارىتى، ئاپتونوم رايونلۇق جۇڭگو تېبابىتى، ئۇيغۇر تېبابىتى دورىلىرى ئىدارىسى، ئاپتونوم رايونلۇق مېيىپلەر بىرلەشمىسى بىرلىكتە «ئاپتونوم رايوننىڭ <ئەمالار ئۇۋۇلاپ داۋالاشنى باشقۇرۇش چارىسى>نى يولغا قويۇش قائىدىسى»نى تۈزۈپ ئېلان قىلدى.
　　ئاپتونوم رايونلۇق ئەمالار ئۇۋۇلاش كەسپى يېتەكچىلىك مەركىزىنىڭ خادىمى زۆھرە مەمەت مۇنداق دېدى: «چارە»دە ئۇۋۇلاپ ساقلىقنى ساقلاش ئورنى، ئەمالار ئۇۋۇلاپ داۋالاش ئورنى ئاچقان ئەمالارغا بىر قېتىمدا 20 مىڭ يۈەن، كارخانا قانۇنىي ئىگىسى سالاھىيىتىنى ھازىرلىغان ئەمالار ئۇۋۇلاپ ساقلىقنى ساقلاش ئورنى، ئەمالار ئۇۋۇلاپ داۋالاش ئورنىدا ئىشلەۋاتقان ھەر بىر ئەماغا 5000 يۈەن ياردەم پۇلى بېرىلىدۇ؛ ئادەم كۈچى بايلىقى ۋە ئىجتىمائىي كاپالەت تارماقلىرى ئالاقىدار شەرتلەرنى ھازىرلىغان ئەمالار ئۇۋۇلاپ داۋالاش ئورۇنلىرىنى شەھەر، بازار ئاساسىي داۋالاش كاپالىتى بويىچە بېكىتىلگەن ئورۇنلار قاتارىغا كىرگۈزىدۇ، دەپ بەلگىلەندى. دېمەك، ئەمالار ئۇۋۇلاپ داۋالاش ئورۇنلىرىدا داۋالىنىش سۇغۇرتىسى كارتىسى ئىشلەتكىلى بولىدىغان بولدى.