بىرلەشكەن دۆلەتلەر تەشكىلاتى 18-سېنتەبىر ئافرىقىدىكى بىر قانچە دۆلەتتە يامرىغان ئېبولا يۇقۇمىدا 2600دىن كۆپرەك ئادەمنىڭ قازا قىلغانلىقىنى ئاشكارىلىدى، بىرلەشكەن دۆلەتلەر تەشكىلاتى خەۋپسىزلىك كېڭىشى شۇ كۈنى جىددىي يىغىن ئېچىپ ئېبولا يۇقۇمىغا تاقابىل تۇرۇشقا ئالاقىدار قارارلارنى ماقۇللىدى.

بىرلەشكەن دۆلەتلەر تەشكىلاتى باش كاتىپىنىڭ باياناتچسىى دۇگارىك دۇنيا سەھىيە تەشكىلاتنىڭ سانلىق مەلۇماتىنى نەقىل كەلتۈرۈپ، ئېبولا يۇقىمىدا ھازىرغىچە 2622 ئادەم قازا قىلدى، بۇندىن باشقا يەنە 5335 ئادەم يۇقۇملاندى. ھازىرقى ئەھۋال ئىنتايىن ئېغىر، دېدى.خەۋپسىزلىك كېڭىشى ئېبولا يۇقۇمى توغرىسىدا جىددىي يىغىن ئېچىپ 2177-نومۇرلۇق قارارنى ماقۇللاپ، بىرلەشكەن دۆلەتلەر تەشكىلاتىغا ئەزا دۆلەتلەرنىڭ يۇقۇم يامرىغان دۆلەتلەرگە جىددىي ياردەم بېرىشىنى مۇراجىئەت قىلدى.

قاراردا ئېبولا يۇقۇمىنىڭ خەلقئارا تىنچلىقى ۋە مۇقىملىقىغا تەھدىت بولىۋاتقانلىقى ئوتتۇرىغا قويۇلدى، ھەمدە لىبىرىيە، سېرالىئون ۋە گىۋېنىيەنىڭ يۇقۇمنىڭ ئالدىنى ئېلىش كونترول قىلىشى توغرىسىدا بىر قانچە تەدبىر ۋە تەكلىپ بېرىلدى. ئېبولا يۇقۇمى بىلەن يۇقۇملانغۇچىلار ۋە قازا قىلغانلارنىڭ كۆپىنچىسى يۇقارقى ئۈچ دۆلەتتىن.بىرلەشكەن دۆلەتلەر تەشكىلاتىنىڭ باش كاتىپى خەۋپسىزلىك كېڭىشىنىڭ بۇ قېتىمقى جىددىي يىغىنىغا قاتناشتى ھەمدە سۆز قىلىپ، خەۋپسىزلىك كېڭىشى ئىلگىرى ئاممىۋى سەھىيە ساھەسىنىڭ خەلقئارا بىخەتەرلىكىگە تەسىر كۆرسىتىش مەسىلىسى توغرىسىدا پەقەت ئىككى قېتىملا رەسمىي مۇزاكىرە ئېلىپ بارغان، ئۇ ئىككى قېتىمقى يىغىندا مۇھاكىمە قىلىنغان قارالما ئەيدىز ئىدى، بۇنىڭدىن ئېبولا يۇقۇمى ۋەزىيىتىنىڭ جىددىي ئىكەنلىكىنى كۆرىۋالغىلى بولىدۇ، دېدى.

بانكىمون مۇنۇلارنى تەكىتلىدى: ئېبولا يۇقۇمىنىڭ كەڭ كۆلەمدە يامرىشى ھەممە ئادەمگە تەسىر كۆرسەتتى، يۇقۇم يامرىغان رايوندا ھەر ئۈچ ھەپتىدە يۇقۇملانغانلارنىڭ سانى ھەسسىلەپ ئېشىۋاتىدۇ. يۇقۇم لىبىرىيە، سېرالىئون ۋە گىۋېنىيەنىڭ داۋالاش سىستېمىسىنى ۋەيران قىلىۋاتىدۇ.

بانكىمون يىغىندا بىرلەشكەن دۆلەتلەر تەشكىلاتى ئېبولا يۇقۇمىغا جىددىي ئىنكاس قايتۇرۇش ئالاھىدە ئۆمىكى تەشكىللەشنى، ئافرىقا ئەللىرى ئىتتىپاقى ۋە غەربىي ئافرىقا ئەللىرى ئىقتىسادىي ئورتاق گەۋدىسى بىلەن زىچ ھەمكارلىشىپ، يۇقۇمنىڭ ئالدىنى ئېلىش، كونترول قىلىش قاتارلىق 5 چوڭ نىشاننى ئىشقا ئاشۇرۇشنى جاكارلىدى. بانكىمون يىغىندا يەنە جۇڭگو، كۇبا، كانادا قاتارلىق دۆلەتلەر ھۆكۈمەتلىرىنىڭ تۆھپىسىگە رەھمەت ئېيتتى.

دۇنيا سەھىيە تەشكىلاتىنىڭ باش ئىش بىجۈرگۈچىسى چىنفىڭ فۇجىنمۇ يىغىنغا قاتناشتى ھەمدە سۆز قىلدى. ئۇ ئەسكەرتىپ، يۇقۇم يامرىغان رايون تەھدىتكە ئۇچراپلا قالماي، ئاشلىق كەمچىل بولۇش قاتارلىق نۇرغۇن قىيىنچىلىقىلارغا دۇچ كېلىۋاتىدۇ، دېدى. ئۇ خەلقئارا جەمئىيەتنىڭ تېزدىن تاقابىل تۇرۇپ، يۇقۇمنىڭ يەنە يامراپ كېتىشىنىڭ ئالدىنى ئېلىشىنى مۇراجىئەت قىلدى.بىرلەشكەن دۆلەتلەر تەشكىلاتىنىڭ ئېبولا يۇقۇمىغا سىستېمىلىق تاقابىل تۇرۇش جەھەتتىكى ئالىي ماسلاشتۇرغۇچىسى نابارو، لىبىرىيەنىڭ دىپلوماتىيە مىنستىرى قاتارلىق يۇقۇم يامرىغان رايوندىكى دۆلەتلەرنىڭ ۋەكىللىرى يىغىنغا قاتناشتى ھەمدە سۆز قىلدى.