قاتار ئەمىرى؛ مەسىلە ئىسلامدا ئەمەس، ئۈمىدسىزلىكتە! دېدى نىيۇ يورك تايمىس گېزىتى 24-فېۋرال خەۋىرى؛ لەگلەك تورى تەرجىمىسى: ئامېرىكىغا زىيارەتكە بارغان قاتار ئەمىرى تەمىم ئىبنى ھاماد ئەل- سانى ئامېرىكا پرېزىدېنتى بىراك ئوباماغا «ئوتتۇرا شەرقتىكى تېرورنىڭ سەۋەبى ئىسلام ئەمەس، سۇرىيە، لىۋىيە، يەمەن ، ئىراق ۋە غەززەدىكى ئۈمىدسىزلىكتۇر» دېدى. ئۈچ كۈنلۈك رەسمى زىيارەت ئۈچۈن ئامېرىكىغا بارغان قاتار ئەمىرى ئەل- سانى ، ئ‍امېرىكا پرېزىدېنتى بىراك ئوباما بىلەن كۆرۈشۈپ رايۇندىكى بىر قىسىم مەسىلىلەر ھەققىدە سۆھبەتلەشتى.

مەسىلە ئىسلامدا ئەمەس، ئۈمىدسىزلىكتە

قاتار ئەمىرى تەمىم ئىبنى ھاماد ئەل-سانى ئۇچرىشىشتىن بۇرۇن ئامېرىكا نىيۇ يورك تايمىس گېزىتىگە« قاتارنىڭ ئامېرىكىغا خېتى» نامىدا بىر ماقالە يازدى، ئەمىر ئەل-سانى ماقالىسىدە «ۋاشىنگتوندا پرېزىدېنت ئوباما بىلەن كۆرۈشكىنىمدە ئۇنىڭغا تەكلىپىم تېخىمۇ ئاشكارا بولىدۇ، ئوتتۇرا شەرقنى ۋەيران بولۇشتىن قۇتقۇزۇش ئۈچۈن بىرلىكتە كۈچ چىقىرىشىمىز كىرەك » دەپ ئىپادە بىلدۈردى. غەرب ئەللىرىنىڭ كۆپىنچىسنىڭ تېرورىزىمنىڭ سەۋەبى ئىسلام دەپ قارايدىغانلىقى ھەققىدە ئەمىر ئەل- سانى مۇنۇلارنى ئېيتتى: «مۇسۇلمان بولغانلىقىمدىن مەسىلىنىڭ سەۋەبى ئىسلام ئەمەس، بەلكى ئۈمىدسىزلىك ئىكەنلىكىنى ئېيتالايمەن، سۇرىيە ۋە پەلەستىندىكى مۇساپىرلار لاگېرىدا، ئۇرۇش داۋام قىلىۋاتقان سۇرىيە، ئىراق، يەمەن، لىۋىيە ۋە غەززە تۇپراقلىرىدا ئۈمىدسىزلىكنى كۆرەلەيسىز. ياۋرۇپانىڭ ھەتتا ئامېرىكىنىڭ چوڭ شەھەرلىرىدىكى نامراتلار مەھەللىسىدە ھەم ئۈمىدسىزلىكنى كۆرىۋاتىمىز، ۋە بىز تېرور ئېقىمىنىڭ ئالدىنى ئالماقچى بولساق دۆلەت ۋە دىن ئايرىمچىلىقى بولمىغان ب ئۈمىدسىزلىككە دىققەت قىلىشىمىز كىرەك، بۇ تېرورىزىمغا بىر باھانە بولۇپ كۆرۈلمەيدۇ، قاتار ئاشقۇن گۇرۇپىلارنىڭ ھەرىكەتلىرىنى كەسكن شەكىلدە ئەيىپلەيدۇ ۋە تېرورغا قارشى كۈرەش مەقسىتىدە ئوتتۇرغا چىققان خىزمەتلەرگە ياردەم بېرىدۇ. ئەمما ئوقلار ۋە بومبىلار تېرورغا قارشى كۈرەشتە غەلبە قىلىشقا كۈچى يەتمەيدۇ. تېرورىزىمنىڭ تۈپ يىلتىزىنى يۇقىتىش ئۇزۇن مەزگىللىك ، ئىستىراتىگىيەلىك ۋە چوڭقۇر بىر مۇساپىدۇر» دېدى.

دىكتاتورلار مەۋجۇتلىقىنى ساقلاۋاتىدۇ

ئەمىر ئال-سانى تېرورغا قارشى كۈرەشنىڭ ئوتتۇرا شەرقتىكى دىكتاتورلارنىڭ مەۋجۇتلىقىنى داۋاملاشتۇرىشىغا سەۋەب بولغانلىقىنى تەكىتلەپ مۇنداق دېدى: «ئەپسۇسكى بەزى ئەھۋاللاردا تېرورىزىمغا قارشى يۈرگۈزگەن ئۇرۇش تېرورنىڭ يۈكسىلىشىگە كۈچ قوشىدىغان قانخور دىكتاتورلارنىڭ مەۋجۇتلىقىنى داۋاملاشتۇرىشىغا يادەمچى بولدى. ئاشقۇنلۇققا قارشى كۈرەش پەقەت رايۇن خەلقلىرى ئاۋال بەششار ئەسەدكە ئوخشاش خەلقىنى قىرغىن قىلىدىغان زومىگەر دىكتاتورلارنى يۇقىتىشقا قايىل بولسا ئاندىن غەلبە قىلغىلى بولىدۇ، بۇنداق قىلىش ۋەزىپىسى پەقەت ئامېرىكاغا تەۋە ئەمەس، بەلكى ئەرەب دۆلەتلىرىمۇ سۇرىيەدە سىياسى بىر ھەل قىلىش چارىسى تېپىش ئۈچۈن بىرلىكتە كۈچ چىقىرىشى كىرەك» دېدى.

ئەرەب ياشلىرى ئۈمىدىنى يۇقاتماقتا

ئەمىر ئال- سانى ئەرەب باھارى بىلەن ئوتتۇرا شەرقتە ئوتتۇرغا چىققان ئەھۋاللار ھەققىدە ئوباماغا شۇنداق دېدى:« بىز بېسىپ ئۆتكەن ئۈچ يىلدىن بۇيان خەلقئارا جەمئىيەت، ئ‍ەرەب دۇنياسىدىكى ياشلارنىڭ ئەركىنلىك، ئادالەت ۋە ئىقتىسادى بىخەتەرلىك تېمىسىدىكى ئارزۇلىرى ئالدىدا ئۈن-تىنسىز تۇرماقتا، بۇ ئارزۇلار ھاكاۋۇر كۈچ سىياسەتلىرىنىڭ سايىسىدە قالدى، ئەمما بېسىم پەيدا قىلغان سەلبىيلىك بولغان بولسىمۇ ئەرەب ياشلىرى تېخىمۇ ياخشى بىر كەلگۈسى يارىتىش ھەققىدە ئىشەنچىسى ۋە قارارى مۇستەھكەمدۇر. ئۇلار ئىنسان ۋىجدانىغا ھۆرمەت بىلدۈرگەن ۋە ئادالەت ھەقىقى يۈزىنى كۆرسەتكەن بىر ئوتتۇرا شەرق ئۈچۈن ئۈمىدىنى داۋاملاشتۇرىدۇ. ئەمما بىز ھەرىكەتكە كېلىپ ئۇلارنىڭ ئىشەنچىسىگە ئېرىشىشىمىز ۋە ئەرەب باھارىدا قۇربانلىق بەرگەن ۋە كۈرەش قىلغان قىممەت قاراشلىرىمىزغا سادىقلىقىمىزنى ئىسپاتلىمىساق بۇ ئۈمىدلەر ئۇزۇن داۋاملاشمايدۇ» دېدى.