19-يانۋار ئۈرۈمچى شەھىرى شىمالىي باغچا كوچىسىدىكى بىر يەلقازان دۇكىنى ئىككى نەپەر ‹‹ماشىنا مۇلازىم›› نى ‹‹تەكلىپ›› قىلغان بولۇپ، خېرىدارلار بۇ ‹‹ماشىنا مۇلازىم›› لار بىلەن توختىماي سۈرەتكە چۈشكەن.

‹‹5-نومۇرلۇق مېھمان، سىز بۇيرۇتقان كۆكتاتلار كەلدى، كۆكتاتلىرىڭىزنى ئېلىۋېلىڭ، سول قولۇم ئاستىدىكى كۇنۇپكىنى باسسىڭىز مەن قايتىپ كېتىمەن››. ئۇچىسىغا سۆسۈن كۆڭلەڭ كىيگەن، يىپەك شارپا ئارتىۋالغان ‹‹كىچىك قىزچاق›› ئىسىملىك ماشىنا ئادەم ئۆلچەملىك خەنزۇ تىلىدا سۆزلىگەچ، ئۇياق – بۇياققا تاماق توشۇۋاتقان ئىدى، توسالغۇغا ئۇچرىسا دەل ۋاقتىدا ئۆزىنى تورمۇزلاپ، ئۆتۈپ كېتىۋاتقانلارغا: ‹‹ئالدىدىكى كېلىشكەن يىگىت (گۈزەل قىز)، مەن تاماق توشۇپ مېڭىۋاتىمەن، ماڭا يول بەرگەن بولسىڭىز، رەھمەت›› دەپ ئۇلارغا ئەسكەرتىش بېرەتتى.

ئىشىك ئالدىدا يەنە بىر ‹‹چوڭ سېرىق ھەرە›› ئىسىملىك ماشىنا ئادەم بولۇپ، ئۇنىڭ ئېگىزلىكى ئىككى مېتىر، ئېغىرلىقى يېرىم توننا كېلىدىكەن، بۇ ماشىنا ئادەم كارتون فىلىمدىكى ‹‹ئۆزگىرىشچان ۋاجرا›› غا ئوخشىتىپ ياسالغان بولۇپ، باش قىسمى مىدىرايدىكەن، لېكىن ماڭالمايدىكەن، سۆزلىيەلمەيدىكەن.

‹‹كىچىك قىزچاق›› ئىسىملىك ماشىنا مۇلازىمنىڭ ئېگىزلىكى 1.55 مېتىر، ئېغىرلىقى 80 كىلوگىرام كېلىدىكەن، ئۇ ئەينەك پولاتتىن ياسالغان بولۇپ، ئاستىدا ئىككى تال چاقى بار ئىكەن. ئۇنىڭ يەنە يۇمىلاق بېشى ۋە چاقناپ تۇرىدىغان ئىككى ئېلېكتىر نۇرىلىق كۆزى بار ئىكەن، پەقەت ئاددىي خەنزۇ تىلىنى سۆزلىيەلەيدىكەن.

بۇ ئىككى ماشىنا ئادەمنى شېنجېندىكى بىر شىركەت ياسىغان بولۇپ، بۇ شىركەتنىڭ تېخنىكا خادىمى شۈ چاڭگېڭنىڭ ئېيتىشىچە، ماشىنا مۇلازىمنىڭ ئىچىگە ئۇلترا ئاۋاز دولقۇنى تەكشۈرۈش قۇرۇلمىسى ئورنىتىلغان ئىكەن، توسالغۇلارغا ئۇچرىغاندا دەل ۋاقتىدا ئۆزىنى ‹‹تورمۇزلايدىكەن››، ماشىنا ئادەم لىنىيە بويىچە تاماق توشۇيدىكەن، مۇرەككەپ سۆزلەرنى ئىشلەتمەيدىكەن.

يەلقازان غوجايىنىنىڭ ئېيتىشىچە، ئۇ بۇ ئىككى ماشىنا ئادەمنى 80 مىڭ يۈەنگە سېتىۋالغان. ئۇنىڭ ھېسابلاپ بېرىشىچە، بىر ماشىنا ئادەم ئىككى مۇلازىمغا باراۋەر بولۇپ، ھەر بىر مۇلازىمنىڭ ئايلىق مائاشىنى 3000 يۈەن بويىچە ھېسابلىغاندا، يىلدا 70 مىڭ يۈەن تېجەپ قالغىلى بولىدىكەن.